Panorama.am

-Ինչպիսի՞ն է այսօր համաշխարհային հեռահաղորդակցության շուկայի վիճակը և ինչ՞ կարող եք ասել հայաստանյան շուկայի վերաբերյալ
-Այսօր համաշխարհային հեռահաղորդակցության շուկան գտնվում է ինտերնետ տեխնոլոգիաների յուրացման ակտիվ փուլում։ Հեռահաղորդակցության և տվյալների փոխանցման աշխարհում դինամիկ աճում է հաճախականության ռեսուրսների պահանջարկը։ Այդ միտումը հիմնականում կապված է ինտերնետից օգտվողների թվաքանակի աճի հետ, ինչպես նաև միջազգային օպերատորների համագործակցության և փոխանցվող տվյալների ծավալի աճի հետ։

Ինտերնետ տեխնոլոգիաների յուրացման ակտիվ փուլում է գտնվում նաև հայաստանյան հեռահաղորդակցության շուկան։ Ինտերենի անհրաժեշտության գաղափարը լայնորեն տարածվում է ինչպես բնակչության, այնպես էլ բիզնես հանրության մեջ։
Այսօր արդեն դժվար է պատկերացնել հաջողությամբ գործող ընկերություն առանց հուսալի և բարձր արագությամբ ինտերնետ հասանելիության, որը թույլ է տալիս արդյունավետ համագործակցել ինչպես ընկերության ներքին բաժանմունքների, այնպես էլ այդ ընկերության հաճախորդների և գործընկերների հետ։ Օրեցօր աճում է բնակարանային բաժանորդների պահանջարկը բարձր որակի, հուսալի և մեծ արագությամբ ինտերնետի համար։ Իսկ ինտերնետ կապի բարձր որակ կարելի է ստանալ լայնաշերտ միացման տեխնոլոգիաների կիրառմամբ։

- Ինչ՞ է նշանակում լայնաշերտ հաղորդումը։
-Լայնաշերտ հաղորդումը ապահովում է ոչ միայն տվյալների հաղորդման արագության բարձր մակարդակ, այլ նաև ինտերնետի անընդհատ միացում (միացնելու համար բաժանորդը չի զանգահարում պրովայդերին), ինչպես նաև ունենում է բարձր արագություններով տվյալների ներհոսքի և արտահոսքի միաժամանակյա հնարավորություն։ Լայնաշերտ միացման որակական ևս մեկ առավելություններից է այն, որը կապը շատ հազվադեպ է ընդհատվում և հեռախոսային գիծը չի զբազեցվում:
Լայնաշերտ ինտերնետ միացման համար տվյալների հաղորդման տեխնոլոգիաներից (օպտիկամանրաթելային միացում, պղնձալարային միացում, DSL, անլար կապ և այլն) ամենահզոր և ժամանակակից է համարվում օպտիկամանրաթելային ցանցը, որի դեպքում օպտիկամանրաթելային մալուխը հասցվում է մինչև բաժանորդ։ Մեծ հեռավորությունների վրա տեսապատկերի, ձայնի և տվյալների հաղորդման համար բարձր արագությամբ օժտված գծերի ստեղծման նպատակով օգտագործվող օպտիկամանրաթելային մալուխը ունի հսկայական թողունակության հնարավորություն։

Համեմատաբար վաղուց մշակված, սակայն ցածր արագությունների պատճառով լայն տարածում չստացած շատ մուլտիմեդիա տեխնոլոգիաներ այսօր ամբողջովին հասանելի և իրագործելի են ոչ միայն հարուստ կորպորացիաների, այլ նաև սովորական օգտվողների համար։ Այսօր բաժանորդները կարող են օգտագործել օպտիկական ինտերնետ՝ ցանցում ձայնի և տեսապատկերի փոխանցման նպատակով (Video-over-IP, Voice-over-IP):

-Որն՞ է օպտիկամանրաթելային ցանցի առավելությունը։
-Կապի օպտիկամանրաթելային գծի միացման հիմնական առավելություններից է առավելագույն հուսալի աշխատանքի և տվյալների հաղորդման գերարագ մակարդակի ստացման հնարավորությունը։
Սովորական պղնձալար հաղորդիչի փոխարեն օգտագործվում է օպտիկամանրաթելային հատուկ կվարցային մանրաթելերից կազմված թելիկ, որը առավել նման է սովորական ապակուն: Ռադիոալիքների փոխարեն մանրաթելի միջով անցնում է լուսային ճառագայթ, որը հնարավորություն է տալիս ապահովել տեղեկատվության տեղափոխման հսկայական արագություններ:
Օպտիկամանրաթելային միացման դեպքում թողունակությունը մեկ օգտվողի հաշվարկով սրընթաց աճում է։ Այդ պատճառով կապի ծառայություններ տրամադրողները ժամանակակից տեղեկատվական ցանցեր կառուցելիս շատ ավելի հաճախ օգտագործում են օպտիկամանրաթելային մալուխային համակարգեր։ Դա վերաբերվում է ինչպես հեռահաղորդակցության երկար կապուղիների, այնպես էլ լոկալ հաշվիչ ցանցերի կառուցմանը։ Օպտիկական մանրաթելը ներկայումս համարվում է տվյալների հաղորդման ամենակատարյալ ֆիզիկական միջավայրը, ինչպես նաև մեծ հեռավորությունների վրա տվյալների մեծ հոսքերի հաղորդման ամենահեռանկարային միջավայրը։ Այսօր մանրաթելային օպտիկան իրականում իր օգտագործումն է գտնում տվյալների հաղորդման հետ կապված բոլոր խնդիրներում։

Ներկայումս ողջ աշխարհում կապի ծառայություններ մատուցողները մեկ տարվա ընթացքում անց են կացնում օպտիկամանրաթելային մալուխների հազարավոր կիլոմետրեր՝ գետնի տակով, օվկիանոսների, ծովերի և գետերի հատակներով, ԷՀԳ-ով, թունելներում, խողովակաշարերում և կոլեկտորներում։ Բազմաթիվ ընկերություններ (այդ թվում նաև ամենամեծ) ինտենսիվ հետազոտություններ են իրականացնում օպտիկամանրաթելային տեխնոլոգիաների ոլորտում։

-Խնդրում ենք վերջում տալ Ձեր կարծիքը հայաստանյան ինտերնետ կապի զարգազման միտումների և հեռանկարների վերաբերյալ։
- Հայաստանում կապի և ինտերնետ տեխնոլոգիաների ոլորտը զարգանում է դինամիկ տեմպերով: Բարձրորակ և անխափան կապի պահանջարկը օրեցօր ավելանում է, ինչպես կորպորատիվ շուկայում, այնպես էլ բնակարանային բաժանորդների ոլորտում: Կապի և ինտերնետի տեխնոլոգիաների զարգացումը և նոր սարքավորումների ու տեխնոլոգիական լուծումների ներդրումը ոչ միայն շուկայից եկող հրամայական պահանջ է, այլ նաև երկրի ընդհանուր տնտեսական զարգացման հրամայական: Ուրախալի է, որ ՀՀ նորընտիր Կառավարությունը որդեգրել է էլեկտրոնային հաղորդակցության նորագույն լուծումները տնտեսության և կառավարման մեջ լայնորեն ներդնելու քաղաքականությունը: Դրա լավ օրինակ է այսպես կոչված «Էլեկտրոնային օրակարգը», որը կներառի էլեկտրոնային կառավարման, էլեկտրոնային առողջապահության, էլեկտրոնային փաստաթղթաշրջանառության, էլեկտրոնային վճարումների և բազմաթիվ այլ կիրառությունների համակարգերի ներդրումը պետական և կորպորատիվ կառավարման ոլորտներում: Նման համակարգերի և ընդհանուր առմամբ կապի արդյունավետության բարձր մակարդակի ապահովման համար անհրաժեշտ է լայնաշերտ հասանելիության ցանցերի ընդլայնում և տարածում, ոլորտում արդար և ազնիվ մրցակցություն ու լայնաշերտ հասանելիության ծառայությունների ներդրում հասարակության բոլոր ոլորտներում և նույնիսկ դժվար հասանելի աշխարագրագրական տեղանքներում։ ADC ընկերությունը ձեռնամուխ է եղել հենց այս խնդիրներին հասցեագրված պատասխան և համապատասխան լուծումներ տրամադրելու աշխատանքին: ADC ցանցի տեխնոլոգիական միջուկի տեղակայման ժամանակ հաշվի են առնվել այսպիսի, թվային հաղորդակցության կապի ու հասանելիության ոլորտի ներկայիս և առաջանցիկ նպատակները և հնարավոր պահանջարկը: Ուրախ եմ հավաստել, որ մեր ցանցն այսօր մատուցում է ամենաժամանակակից որակի և հզորությունների ծառայություններ: Իսկ մեր ընկերության ողջ անձնակազմը նպատակամիտված է մեր ծառայությունները օր առաջ հասանելի դարձնելու մեր բոլոր բաժանորդների գրասենյակներ: Հրավիրում ենք բոլորին արդյունավետ և երկարաժամկետ համագործակցության: