Ձեր վստահելի աղբյուրը

Ադրբեջանը դիմել է Կարմիր խաչի միջազգային կոմիտեին Հայաստանի հետ «պատանդների փոխանակման» առաջարկով: Ադրբեջանական «Թրենդ» գործակալության փոխանցմամբ, նման հայտարարությամբ հանդես է եկել Ադրբեջանի` փախստականների և հարկադիր տեղահանվածների հարցերով կոմիտեի նախագահ Ալի Հասանովը:

Ըստ աղբյուրի, Հասանովը նշել է, որ Բաքուն առաջարկում է Հայաստանին Ադրբեջանում գտնվող հինգ հոգուց կազմված հայկական ընտանիքին և Տավուշի մարզի Չինարի գյուղի բնակիչ 31-ամյա Կարեն Պետրոսյանի դին փոխանակել Քարվաճառում ձերբակալված ադրբեջանցի դիվերսանտներ Դիլհամ Ասկերովի, Շահբազ Գուլիևի, ինչպես նաև ձերբակալման ժամանակ սպանված հանցավոր խմբի երրորդ անդամի` Հասան Հասանովի դիակի հետ:

Հասանովի խոսքերով, Կարմիր խաչի միջազգային կոմիտեից ադրբեջանական կողմին հայտնել են, թե իբր հայկական կողմը պատրաստ է փոխանակել Հասան Հասանովի դին Կարեն Պետրոսյանի մարմնի հետ, որին Բաքվում կոչում են «հայկական դիվերսանտ»:

Հասան Հասանովի պնդմամբ` ադրբեջանական կողմն այս ամենին «պատասխանել է» որ չի նահանջի իր նախնական առաջարկությունից:

Նշենք, որ Ադրբեջանի քաղաքացիներ Շահբազ Գուլիևը (ծնված 1968 թ) և Դիլհամ Ասկերովը (ծնված 1960 թ) ինչպես նաև Հասան Հասանովը, զինված լինելով զենքով և զինամթերքով, 2014 թ հուլինի 29-ին հետախուսական գործունեություն ծավալելու նպատակով ապօրինի հատել են ԼՂՀ պետական սահմանը և ներթափանցել են հանրապետության Շահումյանի շրջանի տարածք: Տվյալ անձինք հատուկ առաջադրանքով հավաքել են տեղեկություններ և իրականացրել են լրտեսական գործունեություն: Ավելին, նրանք զենքի կիրառմամբ հուլիսի 4-ին առևանգել են ԼՂՀ անչափահաս քաղաքացի Սմբատ Ցականյանին, որ դին հայտարաբերվել էր հուլիսի 15-ին Շահումյանի շրջանի Քարվաճառ և Մանաշիդ համայնքների հարակից անտառահատվածում: Բացի դրանից` հուլիսի 11-ին Վարդենիս-Քարվաճառ ճանապահրի 32-րդ կմ ազգային ատելության հողի վրա սպանվել է երևանի բնակիչ Սարգիս Սամվելի Աբրահամյանը (ծնված 1971 թ), իսկ Կոտայքի մարզի Ձորաղբյուր գյուղի բնակիչ (ծնված 1977 թ) Կարինե Արշավիրի Դավթյանին պատճառվել են հրազենային վնասվածքներ: Կրակողը զինված դիմադրություն է ցույց տվել և վնասազերծման գործողության ժամանակ սպանվել (ադրբեջանական կողմի պնդմամբ նրա անունը Հասան Հասանով է): Վերջինս թաղվել է ԼՂՀ տարածքում: Դիլհամ Ասկերովը և Շահբազ Գուլիևը ձերբակալվել են և կալանավորվել: Նրանց մեղադրանք է առաջադրվել ԼՂՀ քրեական օրենսգրքի միանգամից մի քանի հոդվածների հատկածիշներով. 316-րդ հոդվածով` (լրտեսություն), ԼՂՀ քրեական օրենսգրքի 350-րդ հոդվածի 2-րդ մասով (առանց պատշաճ թույլտվության Լեռնային Ղարաբաղի Հանրապետության պահպանվող պետական սահմանը կազմակերպված խմբի կողմից հատում), ԼՂՀ քրեական օրենսգրքի 245-րդ հոդվածի 3-րդ մասով` (կազմակերպված խմբի կողմից ապօրինի կերպով հրազեն և ռազմամթերք կրում), 129-րդ հոդվածի 3-րդ մասի 1-ին կետով` (մարդուն բացահայտ առևանգում, կյանքի համար վտանգավոր բռնություն գործադրելով, զենքի գործադրմամբ, անչափահասի նկատմամբ կատարված` կազմակերպված խմբի կողմից), ԼՂՀ քրեական օրենսգրքի 103-րդ հոդվածի 2-րդ մասի 3-րդ, 7-րդ և 14-րդ կետերով` (սպանությունը` զուգորդված մարդուն առևանգելով, կազմակերպված խմբի կողմից, ազգային ատելության շարժառիթով) և ԼՂՀ քրեական օրենսգրքի 33-րդ հոդվածով, 103-րդ հոդվածի 2-րդ մասի 1-ին, 7-րդ և 14-րդ կետերով (կազմակերպված խմբի կողմից ազգային ատելության շարժառիթով երկու անձանց սպանության փորձ):

Հարկ է նաև նշել, որ հինգ հոգուց բաղկացած հայկական ընտանիքը ինքնակամ է հատել հայ-ադրբեջանական սահմանը, որտեղ ապաստան է խնդրել: Ընտանիքի հայրը` բազմակի դատված Եղիշե Գևորգյանը 2010 թ հունվարի 10-ին «Երազ» մակնիշի մեքենայով հատել է Ադրբեջանի սահմանը` Նախիջևանի ուղղությամբ: Այսպիսով, Գևորգյանների ընտանիքը փախստականներ են, այլ ոչ թե գերիներ: Ադրբեջանական դիվերսանտներին այդ երկրում ապաստան խնդրած ընտանիքի հետ փախանակման առաջարկը ընդամենը մատնանշում է ադրբեջանական կողմի իրական վերաբերումքը մարդասիրական նորմերի նկատմամբ և ցույց է տալիս, որ Ադրբեջանը նույնիսկ ինքնակամ իր մոտ հայտնված հայազգի անձանց դիտարկում է լոկ որպես պատանդների:

Հատկաշական է, որ Ադրբեջանում բազմիցս հեռուստատեսությամբ ցուցադրել են «երջանիկ» Գևորգյանին, իսկ հիմա նրան պատրաստվում են ետ ուղարկել Հայաստան, որտեղ բազմակի անգամ դատված Գևորգյանը օրենքի հետ լուրջ խնդիրներ ունի:

Ինչ վերաբերում է Տավուշի մարզի Չինարի գյուղի բնակիչ 31-ամյա Կարեն Պետրոսյանին, որին Բաքվում սկսել են կոչել «հայկական դիվերսանտ», ապա նա օգոստոսի 7-ին գնացել է մոտակա անտառը վառելափայտի ետևից: Արդեն հաջորդ օրը օգոստոսի 8-ին ադրբեջանական ԶԼՄ-ները` հղում անելով երկրի պաշտպանության նախարարությանը հաղորդեցին Կարեն Պետրոսյանի մահվան մասին` իբր «սրտային անբավարարվածության» պատճառով: Դրա հետ միասին նշվում էր, որ «մահվան պատճառները պարզվում են Գյանջայի դատաբժշկական կենտրոնում»:

Հստակ է, որ Ադրբեջանի իշխանությունները փորձում են վերադարձնել իրենց համար չափազանց կարևոր, սակայն, միևնույն ժամանակ, ԼՂՀ-ում երկու անձ սպանած և մեկ մահափորձ կատարած դիվերսանտներ Դիլհամ Ասկերովին և Շահբազ Գուլիևին և դրա համար նույնիսկ պատրաստ են խախտել միջազգային իրավունքի նորմերը և հանձնել Ադրբեջանում ապաստան խնդրած ընտանիքին և տանջամահ արված քաղաքացիական անձի դին:

Հիմա ադրբեջանական դիվերսանտները ԼՂՀ-ում սպասում են դատին, որը կանցկացվի հնարավորինս թափանցիկ պայմաններում: