Ձեր վստահելի աղբյուրը

Հայաստանի Հրեական համայնքի նախագահ Ռիմա Վարժապետյանը ողջունում է Սահմանադրության նախագծով մեր երկրում ազգային փոքրամասնություններին տրվող հնարավորությունը, բայց ունի մտավախություններ:

Նկատենք, որ Սահմանադրության նախագծում Ազգային ժողովի կազմավորման վերաբերյալ 89-րդ հոդվածի 2-րդ կետում նշվում է. «Ազգային ժողովում Ընտրական օրենսգրքով սահմանված կարգով տեղեր են հատկացվում ազգային փոքրամասնությունների համար»:

Նրանց ընտրության կարգերը կսահմանի հետագայում փոփոխվող Ընտրական օրենսգիրքը, սակայն մինչ այդ Ռիմա Վարժապետյանը Panorama.am-ի հետ զրույցում ասաց, որ մտավախություն ունի, թե «հանկարծ պատահական մարդ չհայտնվի խորհրդարանում»:

Նա կարծում է, թե խորհրդարանում ներկայացված կլինեն մեծաքանակ փոքրամասնությունների ներկայացուցիչներ, ինչն էլ որոշ մտահոգություններ է առաջացրել:

«Մի համայնքը մեծ է մյուսից, բայց ես ոչ մի կերպ չեմ կարող վստահ լինել, որ մեծաքանակ համայնքից մարդիկ կարող են բարձր կրթական մակարդակ ունենալ, որոնք կարող են որոշել պետության խնդիրները: Այդ պատճառով, պետք է այդ հարցը դիտարկել մարդու օգտակար լինելու տեսանկյունից, որը կարող է մտնել խորհրդարան ու իսկապես լուծել խնդիրները: Անկասկած, ցանկալի է մասնակցել խորհրդարանական աշխատանքներին, անկասկած մեր պոտենցիալը շատ մեծ է, մեր ներկայացուցիչները բարձր մակարդակ ունեն: Մեզ համար կարևոր է, որ պատահական խորհրդարանի չվերածվի, որ նրանք լինեն պրոֆեսիոնալներ: Բայց սպասենք, ապագայում արդեն պարզ կլինի` ինչպես կդասավորվի»,-հավելեց Վարժապետյանը:

Նա չի կարծում, թե ընտրություն տեղի կունենա Ազգային փոքրամասնությունների ներկայացուցիչների միջև և հնարավոր է` սահմանվի որոշակի քվոտա, որի համաձայն էլ ազգային փոքրամասնությունների ներկայացուցիչները կմտնեն խորհրդարան:

Ինչ վերաբերում է պնդումներին, թե Ազգային փոքրամասնությունների մասին Հայաստանում օրենք պետք է լինի և հետո միայն Սահմանադրությամբ նրանց համար հնարավորություններ սահմանել, ապա տիկին Վարժապետյանը համաձայն չէ: Նա, հակառակը, կարծում է, որ ազգային փոքրամասնությունների մասին օրենք չպետք է լինի, և փոքրամասնությունների ներկայացուցիչները պետք է ապրեն հայկական օրենքներով: Ուղղակի Սահմանադրությամբ, ըստ Վարժապետյանի, պետք է հաշվի առնվեն ազգային փոքրամասնությունների կրոնական առանձնահատկությունները:

«Ես կարծում եմ հատուկ օրենք չպետք է լինի, առաջին հերթին, Հայաստանում ազգային փոքրամասնությունների ներկայացուցիչները քիչ տոկոս են կազմում: Մենք ինչ-որ առանձնահատկություններ չունենք, խնդիրներ չունենք, ինչպես Ռուսաստանում, Ուկրաինայում, որպեսզի օրենքով դրանց լուծում տրվեն: Կարծում եմ, որ պետք է ապրենք Հայաստանի Սահմանադրության, օրենքների համաձայն», -հավելեց տիկին Վարժապետյանը` նկատելով, որ գործող Սահմանադրությամբ ազգային փորքամասնությունների իրավունքները պաշտպանված են:

Այդուհանդերձ, Հրեական համայնքի ղեկավարի կարծիքով, Սահմանադրության նոր նախագծում ցանկալի կլիներ մի քանի դրույթներ լինեին ազգային փոքրամասնությունների ազգային, կրոնական առանձնահատկությունների մասին:

«Օրինակ, եզդիներն ու քրդերը առանձնահատկություններ ունեն իրենց ավանդույթներում, իսկ ահա հրեաների համար շաբաթ օրերը կարևոր են, տոնական են և ոչ աշխատանքային պետք է լինեն և չպետք է աշխատեն, դասի գնան այդ օրը», -հավելեց Ռիմա Վարժապետյանը:

Նշենք, որ Սահմաանդրության նախագծի 54-րդ հոդվածը, որը կազմված է 3 կետերից, սահմանում է ազգային և էթնիկական ինքնության իրավունքի պաշտպանությունը.

1. Յուրաքանչյուր ոք ունի իր ազգային և էթնիկական ինքնությունը պահպանելու իրավունք:
2. Ազգային փոքրամասնություններին պատկանող անձինք իրենց ավանդույթների, կրոնի, լեզվի և մշակույթի պահպանման ու զարգացման իրավունք ունեն:
3. Սույն հոդվածով երաշխավորված իրավունքների իրականացումը կարգավորվում է օրենքով: