Panorama.am

Այսօր արդեն պաշտոնապես հաստատվեց կառավարության նոր կազմը, որում եղել են նաև փոփոխություններ: Առողջապահության, տրանսպորտի և կապի, քաղաքաշինության, աշխատանքի և սոցիալական հարցերի, սպորտի և երիտասարդության հարցերի գերատեսչությունները այսուհետ ղեկավարելու են նոր նախարարներ: Նախքան իրենք իրենց գործով հանրությանը ներկայանալը, մենք ներկայացնենք, թե ովքեր են նրանք ու ինչ անցած ճանապարհ ունեն:

ՀՀ տրանսպորտի և կապի նախարար է նշանակվել Գագիկ Բեգլարյանը: Ծնվել է 1964թ. հունվարի 1-ին Երևանում: 1971-1978 թթ. սովորել է Երևանի Մ. Նալբանդյանի անվան թիվ 33 միջնակարգ դպրոցում, 1978-1981 թթ. սովորել և ավարտել է Երևանի պետական համալսարանին կից ֆիզիկամաթեմատիկական դպրոցը։ 1981-1985 թթ. սովորել և ավարտել է Երևանի ժողովրդական տնտեսության ինստիտուտը և ստացել տնտեսագետի որակավորում:
1985-1987թթ. ծառայել է բանակում, զորացրվելուց հետո աշխատել է տնտեսության տարբեր ոլորտներում: 1993թ. ընտրվել է Հայաստանի Հանրապետության գերագույն խորհրդի առաջին գումարման պատգամավոր: 2002թ. ընտրվել է Կենտրոն համայնքի թաղապետ։ Վերընտրվել է 2005-ին և 2008-ի սեպտեմբերի 28-ին։ 2004թ. պաշտպանել է թեկնածուական ատենախոսություն՝ «Թաղապետարանական կառավարման սոցիալական հիմնախնդիրները» թեմայով, արժանացել է սոցիոլոգիական գիտությունների թեկնածուի կոչման։ Կենտրոն համայնքի մտավորականների «Նարեկ» ակումբի պատվավոր նախագահն է։ 2009թ. մարտի 4-ին ՀՀ նախագահի հրամանագրով նշանակվել է Երևանի քաղաքապետ: 2009թ. մայիսի 31-ին ընտրվել է Երևանի քաղաքապետ: 2006թ. Հայաստանի Հանրապետական կուսակցության անդամ է։ 2007թ. նոյեմբերի 10-ին (ՀՀԿ 11-րդ համագումար) ընտրվել է ՀՀԿ խորհրդի անդամ։ 2009թ. նոյեմբերի 28-ին (ՀՀԿ 12-րդ համագումար) ընտրվել է ՀՀԿ գործադիր մարմնի անդամ: 2012թ. մայիսի 6-ի ՀՀ ԱԺ ընտրություններում ՀՀԿ համամասնական ցուցակով ընտրվել է ԱԺ պատգամավոր: ՀՀԿ գործադիր մարմնի անդամ է: Ամուսնացած է, ունի երկու երեխա:

ՀՀ աշխատանքի և սոցիալական հարցերի նախարար է նշանակվել Արտեմ Ասատրյանը: Ծնվել է 1972թ. մայիսի 23-ին, Երևան քաղաքում:
Կրթություն
1979-1989 թթ. – ավարտել է Երևանի թիվ 194 միջնակարգ դպրոցը` ոսկե մեդալով,
1989-1994 թթ. – ավարտել է Երևանի ժողովրդական տնտեսության ինստիտուտը՝ ստանալով տնտեսագետի որակավորում՝ էկոնոմիկայի պետական կարգավորում մասնագիտացմամբ:

1995-97 թթ. - սովորել է ՀՀ Պետական Կառավարման ակադեմիայում՝ ստանալով պետական ծառայողի որակավորում՝ պետական կառավարում և տեղական ինքնակառավարում մասնագիտացմամբ:
2000-2003թթ. - սովորել է ՀՀ Պետական Կառավարման ակադեմիայի ասպիրանտուրայում և Հայաստանի Տնտեսագիտական հետազոտությունների ինստիտուտում և պաշտպանել թեկնածուական թեզ՝ «ՀՀ կենսաթոշակային ապահովության հիմնախնդիրները աղքատության հաղթահարման գործում» թեմայով՝ ստանալով տնտեսագիտության թեկնածուի գիտական աստիճան:
Մասնագիտական վերապատրաստում է անցել Հարվարդի Համալսարանում (ԱՄՆ), Համաշխարհային Բանկի ինստիտուտում, ինչպես նաև Շվեդիայի, Լեհաստանի, Ավստրիայի, Իսրայելի, Բուլղարիայի և Ուկրաինայի մի խումբ կրթական հաստատություններում:
Հեղինակ է բազմաթիվ գիտական հոդվածների, վերլուծությունների, հետազոտական աշխատությունների:
Աշխատանքային գործունեությունը
1998թ. հունվարին աշխատանքի է անցել ՀՀ կենսաթոշակային և զբաղվածության հիմնադրամում` որպես բաժնի պետ: 1998թ. դեկտեմբերին նշանակվել է ՀՀ աշխատանքի և սոցիալական հարցերի նախարարության սոցիալական ապահովագրության և կենսաթոշակային ապահովության վարչության պետ և աշխատել այդ պաշտոնում մինչև 2006թ-ը: 2006-2007թթ. եղել է ՀՀ աշխատանքի և սոցիալական հետազոտությունների ազգային ինստիտուտի տնօրենը: 2007թ.-ից սկսած զբաղեցրել է ՀՀ աշխատանքի և սոցիալական հարցերի նախարարի տեղակալի պաշտոնը՝ համակարգելով մի շարք ռազմավարական ոլորտներ: 2011թ.-ի մարտից՝ համատեղության կարգով ղեկավարում է ՀՀ սոցիալական ապահովության պետական ծառայությունը:
Արտեմ Ասատրյանը ղեկավարում է նաև Հայաստանի Կենսաթոշակային բարեփոխումների կառավարման խորհուրդը: Նրա անմիջական ղեկավարությամբ մշակվել են Հայաստանի Հանրապետության կենսաթոշակային համակարգի բարեփոխումների իրականացման, սոցիալական ապահովության քարտերի և անհատական հաշվառման համակարգերի ներդրումն ապահովող ռազմավարությունների, հայեցակարգերի, օրենքների, կառավարության որոշումների նախագծեր և այլ կարևոր փաստաղթեր:

Այլ տվյալներ

1994 - 1995թթ. ծառայել է Հայաստանի Հանրապետության զինված ուժերում:
Հայաստանի Հանրապետության Նախագահի հրամանագրով Հայատանի Հանրապետության պետական կառավարման համակարգում արդյունավետ աշխատանքի համար պարգևատրվել է Անանիա Շիրակացու մեդալով: Արդյունավետ կառավարման համար արժանացել է նաև ՀՀ Վարչապետի հուշամեդալի, բազմաթիվ մրցանակների և շնորհակալագրերի: 2004թ. մայիսին ստացել է Հայաստանի Հանրապետության քաղաքացիական ծառայության 1-ին դասի խորհրդականի դասային աստիճան:
Տիրապետում է ռուսերեն և անգլերեն լեզուներին:
Անձնական տվյալներ
Ամուսնացած է, ունի 3 երեխա:
Կուսակցական պատկանելություն
Հայաստանի Հանրապետական կուսակցության անդամ է:

ՀՀ առողջապահության նախարար է նշանակվել Դերենիկ Դումանյանը: Ծնվել է 1953թ. հունվարի 1-ին Երևանում: 1960-1970 թթ. սվորորել է Երևանի թիվ 94 միջնակարգ դպրոցում, 1972-1978 թթ.` Երևանի պետական բժշկական ինստիտուտի բուժական ֆակուլտետում, 1978-1979 թթ. Երևանի «Մալաթիա-Սեբասիտա» կլինիկա և Հոկտեմբերյանի շրջանային կենտրոնական հիվանդանոց՝ ինտերնատուրայում։

1970-1971 թթ. աշխատել է Երևանի պետական բժշկական ինստիտուտում՝ ցրիչ,1971-1972 թթ.` Երևանի տրիկոտաժի թիվ 2 ֆաբրիկայում՝ բանվոր, 1979-1984 թթ.` Հոկտեմբերյանի շրջանի Երվանդաշատ գյուղի տեղամասային հիվանդանոցի գլխավոր բժիշկ, 1984-1985 թթ.` Երևանի թիվ 19 պոլիկինիկայում՝ գլխավոր բժշկի բուժական գծով տեղակալ, 1985-1986 թթ.` Երքաղգործկոմի առողջապահության բաժնում՝ բժիշկ-տեսուչ, 1986-1992 թթ.` ՀԽՍՀ Նախարարների խորհուրդի առողջապահության և սոցիալական ապահովության բաժին ավագ ռեֆերենտ, գլխավոր մասնագետ, ապա՝ բաժնի վարիչի պաշտոնակատար:
1992-1997 թթ. Դ. Դումանյանը նշանակվել է ՀՀ առողջապահության նախարարի առաջին տեղակալ, 1997-2011 թթ. եղել է ՀՀ ԱՆ Առողջապահության ազգային ինստիտուտի տնօրեն, գիտական խորհրդի նախագահ, Առողջապահության քաղաքականության և օրենսդրության ամբիոնի վարիչ: 2011թ. մարտի 4-ից նշանակվել է Երևանի պետական բժշկական համալսարանի ռեկտորի պաշտոնակատար, իսկ 2011թ. ապրիլի 30-ին ընտրվել է ԵՊԲՀ-ի ռեկտոր:

Այլ տվյալներ
1982թ.- Մոսկվա, Հերցենի անվան օնկոլոգիական գիտահետազոտական ինստիտուտ, ասպիրանտուրայի հայցորդ,
1987 թ. – Մոսկվա, Հերցենի անվան օնկոլոգիական գիտահետազոտական ինստիտուտ՝ պաշտպանել է թեկնածուական թեզ՝ ստանալով բժշկական գիտությունների թեկնածուի գիտական աստիճան,
Ավելի քան 70 գիտական հոդվածների և 1 մենագրության հեղինակ է:
1992-1994թթ. – ակտիվ մասնակցություն է ցուցաբերել ՀՀ սահմանների համար մղվող մարտերին,
2005 թ.-ից բժշկական գիտությունների դոկտոր է, 2006-ից՝ պրոֆեսոր,
Կանխարգելիչ բժշկության և առողջապահության կազմակերպում 045 մասնագիտական խորհրդի նախագահն է:
ՌԴ Բնական գիտությունների ակադեմիայի իսկական անդամ է:
ՌԴ Բժշկա-տեխնիկական ակադեմիայի իսկական անդամ է:
2006թ.-ին պարգևատրվել է ՌԴ Բժշկա-տեխնիկական ակադեմիայի «Չիժևսկու» անվան ոսկե մեդալով: 2009թ.-ին՝ Ծովակալ Իսակովի անվան մեդալով:
1994 թ. պարգևատրվել է ՀՀ ՊՆ անվանական պարգևով,
1998 թ.՝ ՀՀ վարչապետի շնորհակալագրով «1988 թ. երկրաշարժի օրերին ցուցաբերած աշխատանքների համար»,
2002 թ.՝ ՀՀ Առողջապահության նախարարության պատվոգրով,
2003 թ.՝ ՀՀ վարչապետի շնորհակալագրով,
2004 թ.՝ ՀՀ ՊՆ «Անդրանիկ Օզանյան» մեդալով,
2005 թ.՝ ՀՀ Ազգային Ժողովի նախագահի պատվոգրով,
2006թ.՝ ՀՀ Նախագահի հրամանագրով՝ «Հայրենիքին մատուցած ծառայությունների համար» 2-րդ աստիճանի մեդալով,
2010թ.` ԼՂՀ նախագահի հրամանագրով` «Երախտագիտություն» մեդալով,
2011թ.` ՀՀ ՊՆ «Մարշալ Բաղրամյան» մեդալով։
Ունի բժշկական ծառայության պահեստի սպայի զինվորական կոչում:

Կուսակցական պատկանելություն
1998թ.-ից Հայաստանի Հանրապետական կուսակցության անդամ է։ 2001-2006թթ.-ին եղել է ՀՀԿ Կենտրոնի տարածքային կազմակերպության խորհրդի նախագահը։ 2005թ.-ից ՀՀԿ խորհրդի անդամ է։ 2007թ.-ից ՀՀԿ գործադիր մարմնի անդամ է։

Հասարակական, քաղաքական գործունեություն
2009թ. ընտրվել է Երևան քաղաքի ավագանու անդամ և ՀՀԿ խմբակցության ղեկավար:
2012թ. մայիսի 6-ի ՀՀ ԱԺ ընտրություններում ՀՀԿ համամասնական ցուցակով ընտրվել է ԱԺ պատգամավոր: ՀՀԿ գործադիր մարմնի անդամ է:
ՀՀ նախագահին կից հանրային խորհրդի անդամ է, առողջապահության և սոցիալական հարցերի հանձնաժողովի նախագահը:
Տավուշ հայրենակցական միություն» ՀԿ-ի նախագահն է:
«Առողջապահության կազմակերպիչների միավորում» ՀԿ-ի համանախագահն է:

Անձնական տվյալներ
Ամուսնացած է, ունի երեք որդի, չորս թոռնիկ:

ՀՀ սպորտի և երիտասարդության հարցերի նախարար է նշանակվել Հրաչյա Ռոստոմյանը: Ծնվել է 1981թ.մարտի 3-ին: Ավարտել է Նելսոն Ստեփանյանի անվան թիվ 71 միջնակագ դպրոցը: 1998 -2003թթ. սովորել է Երևանի Մխիթար Հերացու անվան պետական բժշկական համալսարանի ստոմատոլոգիական ֆակուլտետում` ստանալով բժիշկ ստոմատոլոգ թերապևտի մասնագիտացում: 2003-2006թթ.` սովորել և ավարտել է նույն համալսարանի կլինիկական օրդինատուրան: Ունի ստոմատոլոգ-օրթոպեդի որակավորում: 2006-2008թթ. դասավանդել է Երևանի պետական բժշկական համալսարանում: 2006-2010թթ. սովորել և ավարտել է Ֆիզիկական կուլտուրայի հայկական պետական ինտիտուտը՝ ստանալով մարզիչ մանկավարժի որակավորում: 1997-1999թթ. «Անի 90» ՍՊԸ-ում աշխատել է որպես ապրանքագետ: 2003թ. աշխատել է թիվ 5 մանկական ստոմատոլոգիական պոլիկլինիկայում որպես բժիշկ-ինտերն: 2006-2009թթ. ԵՊԲՀ ֆիզդաստիարակության ամբիոնում աշխատել է որպես լաբորանտ: 2008-2009թթ. հանդիսացել է Երևան քաղաքի ավագանու անդամ՝ ընտրված Կենտրոն համայնքից: 2010թ. մարտի 1-ից մինչ 2012-ի հունիսի 15-ը զբաղեցրել է ՀԱՕԿ-ի գլխավոր քարտուղարի պաշտոնը: 2006 թվականից մարտի 12-ից նախագահում է ՀՀ բասկետբոլի ֆեդերացիան: ՀՀ սպորտի վարպետ է, երկար տարիներ խաղացել է Հայաստանի հավաքականի կազմում, մասնակցել է միջազգային մրցաշարերի և նորանկախ Հայաստանի միջազգային կարգի առաջին մրցավարն է: Պարգևատրվել է «Հրանտ Շահինյան», ՀՀ ՊՆ «Անդրանիկ Օզանյան», «Զինվոր հայրենյաց» և պետական բժշկական համալսարանի 75-ամյակին նվիրված ոսկե մեդալներով:

Անձնական տվյալներ
Ամուսնացած չէ:

Անկուսակցական է:

ՀՀ քաղաքաշինության նախարար է նշանակվել Սամվել Թադևոսյանը: Ծնվել է 1959թ. հուլիսի 9-ին: Սովորել է Երևանի անասնաբուժական և անասնաբուծական ինստիտուտի Զոոինժեներական ֆակուլտետում (Ստացել է զոոինժեների մասնագիտություն), Տնտեսագիտության ֆակուլտետում (ստացել է տնտեսագետ-կազմակերպչի մասնագիտություն), Հայաստանի Պետական Ագրարային Համալսարանի «Ֆինանսներ և վարկ» ֆակուլտետում (Հայցորդ, Գիտական աշխատության թեմա` «ՀՀ պետական բյուջեի եկամուտների օգտագործման բարելավման ուղիները»): 1984-1990թթ. աշխատել է ՀՀ գյուղատնտեսության նախարարության «Հայթռչնարդ» ԱԱԿ-ում` առաջատար հաշվապահ (1984-1987թթ), վերահսկողության բաժնի ավագ վերստուգիչ (1987-1990թթ), 1990 -1993թթ. Հայագրոարդ, «Հայանասնահամալիր» ԱԱԿ-ում` Վերահսկողության-վերստուգման ծառայության պետ (1990-1992թթ), Կոմերցիոն կենտրոնի տնօրեն (1992-1993թթ), 1993-1998թթ. ՀՀ պետական հարկային տեսչությունում` տեսչական վարչության գլխավոր պետական հարկային տեսուչ (1993-1994թթ), Շահումյանի հարկային տեսչության պետի տեղակալ (1994-1995թթ), Էջմիածնի հարկային տեսչության պետ (1995-1998թթ), Շենգավիթի հարկային տեսչության պետ (1998թ), 1999 -1999թթ.` ՀՀ սոցիալական ապահովության պետական հիմնադրամի Կազմտեսչական վարչության պետ, 1999 -2001թթ. ՀՀ պետական եկամուտների նախարարությունում` վերահսկողության վարչության պետ, 2001- 2007թթ.` ՀՀ ԿԱ մաքսային պետական կոմիտում` նախագահի տեղակալ (2001-2004թթ), նախագահի խորհրդական (2004-2007թթ), 2008թ-ից մինչ 2012-ի հունիս` ՀՀ վերահսկիչ պալատի առաջին վարչության պետ, 2012 հունիսից` ՀՀ Ազգային Ժողովի 5-րդ գումարման պատգամավոր:

Կոչումներ
Հարկային ծառայության 3-րդ դասի ավագ խորհրդական
Մաքսային ծառայության գնդապետ

Հրապարակված գիտական աշխատություններ
«ՀՀ պետական բյուջեի եկամուտների օգտագործման բարելավման ուղիները» ատենախոսության շրջանակներում հրատարակվել է թվով 4 գիտական հոդված` նվիրված բյուջետային եկամուտների հավա-քագրման հիմնախնդիրներին

Անձնական տվյալներ
Ամուսնացած է, ունի երկու զավակ

Կուսակցական պատկանելությունը
Օրինաց Երկիր կուսակցության քաղ. խորհրդի անդամ

Նախորդող նորություն` Գործադիրի կազմը հայտնի է. ՀՀ նախագահը նշանակել է կառավարության անդամներին