Ձեր վստահելի աղբյուրը

Վերջին օրերին, ադրբեջանական լրատվամիջոցներն անընդհատ անդրադառնում են Նախիջևանում տեղակայված առանձին համազորային բանակի մարտական պատրաստականության բարձրացման ուղղված քայլերին: Նախօրեին, Ադրբեջանի կառավարության նիստում ծավալուն ելույթ է ունեցել երկրի նախագահ Իլհամ Ալիևը, ով ևս անդրադառնալով Նախիջևանի թեմային, հայտարարել է, որ Նախիջևանում տեղակայված առանձին համազորային բանակը համալրվում է նոր, ժամանակակից սպառազինությամբ. ռազմական և տրասնպորտային ուղղաթիռներով, «Т-72» и «Т-90» տիպի տանկերով, հակատանկային սարքավորումներով, նշելով, որ դրանց թիվը պետք է անընդհատ աճի: Ի դեպ, առաջիկայում նախատեսվում է Թուրքիայի պաշտպանության նախարար Իսմեթ Յըլմազի այցը Նախիջևան: Պաշտոնապես նշվում է, որ այցի նպատակըԿուալա Լումպուրում DSA-2014 ցուցահանդեսին մասնակցությունն է:

Թուրքագետ Լևոն Հովսեփյանը Panorama.am-ի հետ զրույցում ասաց, որ Նախիջևանի 5-րդ կորպուսն առանձին համազորային բանակի վերակազմավորելու հարցն առաջին հերթին նշանակում է, որ այդ բանակն ինքնուրույն ռազմական գործողությունների իրականացման հնարավորություն է ստանում:

«Նման վերակազմավորումը կարող է պայմանավորված լինել նաև Թուրքիայի ջանքերով: Այս դեպքում՝ նախիջևանյան զորամիավորումն էլ ավելի կարող է ինտեգրվել թուրքական ռազմական համակարգին: Բանակի ինքնուրույնության մեծացմանը զուգահեռ մեծանում է հատկապես Թուրքիայի դերակատարությունը, փոխարենը` նվազում Բաքվի վերահսկողությունը, այդ հարցում պաշտոնական Բաքվի լծակները աստիճանաբար դառնում են սահմանափակ` ի տարբերություն թուրքականի:

Թուրքիան արդեն իսկ լուրջ դեր է ստանձնել Նախիջևանի ռազմական ստորաբաժանումների արդիականացման գործում: Կարելի է փաստել, որ նախիջևանյան զորամիավորումը գտնվում է թուրքական զինված ուժերի վերահսկողության տակ, իսկ հավանական պատերազմի դեպքում նախիջևանյան ճակատի բացումը կարող է պայմանավորված լինել նաև թուրքական գործոնով»,- ասաց պարոն Հովսեփյանը:

Նրա խոսքերով, թուրքական կողմն իրականացնում է զորամիավորման զինծառայողների, սպայական կազմի վերապատրաստումն ու վարժեցումը, բացի այդ, Նախիջևանում առկա է մշտական թուրքական ռազմական կոնտինգենտ:

«Նախիջևանի զորամիավորման հետ սերտ համագործակցության մեջ է թուրքական ցամաքային զորքերի 3-րդ բանակը, որը կոչված է իրականացնելու Թուրքիայի արևելյան սահմանների պաշտպանությունը: Վերջին շրջանում հաճախակի են դարձել թուրք բարձրաստիճան զինվորականների այցելությունները Նախիջևան, տարբեր նշանակության ռազմական ապրանքների ու տեխնիկայի մատակարարումները այդ զորամիավորմանը: Նախիջևանի զորամիավորման մարտական պատրաստության ու օպերատիվ պլանավորման մեջ թուրքական կողմի դերակատարությունը վերջին տարիներին զգալիորեն մեծացել է և չափազանցություն չի լինի ասել, որ Նախիջևանում, հատկապես ռազմական ոլորտում, ավելի շատ տեր ու տիրական է զգում իրեն Թուրքիան, քան Ադրբեջանը»,- հավելեց Լ. Հովսեփյանը:

Ռազմական փորձագետ Դավիթ Սոֆիյանը հիշեցրեց, որ նախիջևանյան բանակի ստեղծման որոշումը կայացնելուց հետո շատ կարծիքներ հնչեցին, որ նախաձեռնության հեղինակը Իլհամ Ալիևի ռազմական հարցերով օգնական Վահիդ Ալիևն է:

«Կառուցվածքային առումով, մինչ այժմ դեռ հիմնովին փոփոխություններ չեն եղել այնտեղ, այդ իսկ պատճառով բանակի առջև դրված խնդիրը, կարծես թե, մնում է նույնը»,- ասաց ռազմական փորձագետը:

Դ. Սոֆիյանը նշեց, որ հնարավոր պատերազմի դեպքում, Նախիջևանում տեղակայված զորքերը անկասկած Թուրքիայից սնուցում ստանալու հնարավորություն են ստանալու, ինչն առավել վտանգավոր կդարձնի իրավիճակը սահմանի այդ հատվածում:

«Ամեն դեպքում, Նախիջևանում տեղակայված զորքերը կորպուսի, թե առանձին բանակի կարգավիճակով լինեն, դրանք ոչ միայն մշտապես գտնվում են թուրքական բանակի անմիջական աջակցության ներքո, այլ  իրենցից վտանգ են ներկայացնում»,- հավելեց նա: