Ձեր վստահելի աղբյուրը

Երևանյան խանութներում նվազել են այն ցուցանակների թիվը, որոնցով տնտեսվարողները զգուշացնում էին. «Գնված ապրանքը ետ չի ընդունվում, չի փոխանակվում»: Նման եզրակացության եկել է «Իրազեկ և պաշտպանված սպառող» ՀԿ նախագահ Բաբկեն Պիպոյանը բրենդային ու ոչ բրենդային խանութներում կատարած ուսումնասիրություններից հետո:

Նա հիշեցնում է, որ ըստ «Սպառողների իրավունքների պաշտպանության մասին» օրենքի սպառողներն իրավունք ունեն 14 օրվա ընթացքում խանութ գնալ, եթե բացակայում է նույնանման ապրանքը, ապա այն ենթակա է վերադարձի, եթե այն չի օգտագործվել, առկա է դրամարկղային կտրոնը: Սակայն ցուցանակների նվազումը չի նշանակում, որ խնդիրը լուծված է, կան դեպքեր երբ տնտեսվարողը մի ցուցակ է փակցնում, թե որ դեպքերում սպառողը կարող է վերադարձնել կամ փոխանակել ապրանքը: Սա Պիպոյանի խոսքով, օրենքի խախտում է: Իսկ եթե տնտեսվարողը խախտում է օրենքի պահանջները, պետք է դիմել օրինակ էկոնոմիկայի նախարարության շուկայի վերահսկողության տեսչություն, դատարան կամ այլ մարմինների:

ՀԿ նախագահը Panorama.am-ին ասաց, որ Հայաստանում սպառողները ստիպված են առավել հաճախ գնված ապրանքը հետ տալ կամ փոխանակել, քանի որ որակի ու դրա սահմանման խնդիր կա:

«Այլ երկրներում որակի սահմանումը հստակ տրված է ու քաղաքացին լավ հասկանում է ինքը պատշաճ որակի ապրանք է փոխանակում, թե ոչ պատշաճ որակի»,-ասաց նա:

Կազմակերպությունը վերջերս բողոքներ է ստանում կոշիկների վերաբերյալ: Մի քանի քաղաքացիներ դժգոհել են, թե գնած կոշիկը շարքից շատ շուտ դուրս է գալիս, մյուսներն էլ դժգոհում են, թե կոշիկի հետևանքով ոտքերին այտուցներ ու վերքեր են առաջացել: Հիմնականում դժգոհողները ներկրված կոշիկ գնած քաղաքացիներն են:

ՀԿ նախագահը խոսել է տեղական արտադրողների հետ, փորձել հասկանալ խնդիրը: Մասնագետները նրան բացատրել են, որ յուրաքանչյուր կոշիկ պետք է ունենա ետնամսի որոշակի բարձրություն: Եթե դա չի ապահովվել, ապա ապրանքը չի կարող համարվել պատշաճ որակի և միանշանակ է, որ այն այտուց է առաջացնելու:

«Մի քանի տնտեսվարողներ ասում են, որ Չինաստանում կամ այլ երկրում, այն կոշիկները, որոնց ետնամասի բարձրությունն անհամապատսխան է եղել նորմերին, էժան գներով բերել են մեր երկիր: Ես դրա ապացույցները չունեմ, սակայն մեր քաղաքացին այս ու նման պարագաներում խնդիր է ունենում»,-ասաց Բ. Պիպոյանը:

Նրա խոսքով, ոլորտում բավականին դրական տեղաշարժ կա, ապրանքը փոխանակում են, սակայն դժվարությամբ են հետ վերցնում:

«Մեր հիմնական խնդիրն այն է, որ ոչ պարենային ապրանքների որակի սահմանում չունենք»,-ասաց նա:

Գնված ապրանքը փոխանակել կամ վերադարձնել քաղաքացիներին Պիպոյանը հիշեցնում է. «Շատ կարևոր է, որ սպառողը լինի տեղեկացված ու պահանջատեր մինչև վերջ»: