Ձեր վստահելի աղբյուրը

Ազատամարտիկ, պահեստազորի գնդապետ Վոլոդյա Ավետիսյանի փաստաբան Արա Զաքարյանը  նախօրեին վերաքննիչ բողոք է ներկայացրել` պահանջելով արդարացում, բեկանել դատավճիռն ու գործն ուղարկել նույն դատարան այլ կազմով քննելու: Panorama.am-ի հետ զրույցում ասաց փաստաբան Արա Զաքարյանը:

Նա նշեց, որ եթե երկու խնդրանքներն էլ մերժեն, ապա գոնե գործը պատժաչափի մասով փոխեն, նշանակեն արդարացի պատիժ և համաներման կիրառմամբ ազատեն պատժի կրումից:

Փաստաբանն ասաց, որ արդարացում պահանջում է այն հիմնավորմամբ, որ դատարանն անթույլատրելի նյութերի հիման վրա է մեղադրական դատավճիռ կայացրել: Նա հիշեցրեց, Երևան քաղաքի բնակիչ Ալբերտ Մաթոսյանն ու նրա կինը հստակ ցուցմունք են տվել, որ Վ. Ավետիսյանի հետ հանդիպելուց առաջ արդեն տեղյակ էին, որ նա չի կարող օգնել իրենց որդուն այլ զորամաս տեղափոխելու հարցում, կարող է միայն նույն զորամասում այլ աշխատանքի անցնելու հարցում օգնել, ինչն իրենց համար ի սկզբանե անընդունելի տարբերակ էր:

«Նրանք Վոլոդյայի հետ հանդիպման գնացել էին բացառապես մեկ նպատակով` ունի արդյոք նա ծանոթներ, ովքեր կարող էին օգնել իրենց որդուն այլ զորամաս տեղափոխելու հարցում: Հետևաբար, տվյալ դեպքում խարդախության փորձ օբյեկտիվորեն չի կարող լինել»,- ասաց փաստաբանը:

Հիշեցնենք` պահեստազորի գնդապետ Վոլոդյա Ավետիսյանը մեղադրվում էր ՀՀ քրեական օրենսգրքի 178-րդ հոդվածի 2-րդ մասի 2-րդ կետով կատարած հանցանքի համար` խոշոր չափերի խարդախություն: Մեղադրական եզրակացության համաձայն, Վոլոդյա Ավետիսյանին մեղադրանք է առաջադրվել այն բանի համար, որ նա, հանդիսանալով պահեստազորի գնդապետ, «խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն չունենալով նման պայմանավորվածություն, 2013-ի հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար»: Սակայն, ըստ մեղադրանքի, Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից:
 
Նախորդող հրապարակումներ`
«Ժառանգության» հայտարարությունը` Վոլոդյա Ավետիսյանի դատավճռի մասին
Գագիկ Սարուխանյանը Վոլոդյա Ավետիսյանի դատավճիռը իրավական բեսպրեդել է համարում (տեսանյութ)
Վոլոդյա Ավետիսյանը դատապարտվեց վեց տարվա ազատազրկման
Արդեն յոթ ամիս է, որ իմ քաղաքական հայացքների համար բանտարկված եմ. Վոլոդյա Ավետիսյանի հայտարարությունը
Իմ նկատմամբ քաղաքական հետապնդում է իրականցվում. Վոլոդյա Ավետիսյանը մանրամասներ է ներկայացրել
Վոլոդյա Ավետիսյանի գործով առաջին դատական նիստը կկայանա մարտի 26-ին
«Հերթական անգամ դատարանները թքեցին արդարադատության երեսին». Ավետիսյանի պաշտպանը նոր քայլերի կդիմի