Գլխավոր դատախազ. Մարդու ճակատագրի նկատմամբ առավելագույն հարգանքով եմ վերաբերում
«Դա իմ տեսակը չէ, որ ես անձնական որևէ հարթություն պետական և պաշտոնական հարթության հետ շփոթեմ»,- լրագրողների հետ հանդիպման ժամանակ ասաց ՀՀ Գլխավոր դատախազ Գևորգ Կոստանյանը՝ պատասխանելով քննիչների նկատմամբ քրեական գործեր հարուցելու մասին հարցերին:
«Ամեն անգամ իմ զարմանքն ու մտահոգություն եմ հայտնում մի հանգամանքի վերաբերալ՝ կլինի քննիչ, ցանկացած պաշտոնյա, սովորական քաղաքացի, եթե նրանց գործողություններում տեսնում ենք առերևույթ հատկանիշներ, որոնք կարող են խոսել հանցագործության փաստի մասին, հարուցվում են քրեական գործեր: Քրեական գործերը չեն հարուցվում հասեցական, այլ փաստերի կապակցությամբ»,- նշեց նա:
Միաժամանակ Գլխավոր դատախազը հավելեց, որ չի կարծում՝ որևէ խտրականության կամ հատուկ մոտեցման հիմքեր տվել են իրենց գործողություններում, որովհետև իրենք իրականացնում են իրենց գործառույթը:
«Չեմ կարծում, որ ողջամիտ կլինի պնդել, որ որևէ սուբյեկտի, պաշտոնյայի կողմից լիազորությունների իրականացումն ինքնին դիտվում է լիազորությունների իրականացման գերակայության սահմանում: Միշտ անընդունելի է ինձ համար, որ պետական մարմնի կողմից իր գործառույթի իրականացումն անպայմանորեն մեկնաբանվում կամ փորձում են մեկնաբանել անձնական շարժառիթների լույսի ներքո: Նման մոտեցում երբևէ չեմ ունեցել և չեմ էլ ունենալու մի քանի պատճառներով՝ առաջին՝ մարդու ճակատագրի նկատմամբ բավականաչափ և առավելագույն հարգանքով եմ վերաբերում, որպեսզի ինձ թույլ տամ նման շքեղություն կամ ապօրինություն մարդու ճակատագիրը լուծել այս կամ այն մարդու հետ ենթադրյալ հակասություն ունենալու կամ չունենալու հետ կապված: Երկրորդ՝ անձնական որևէ խնդիր որևէ մեկի հետ չունեմ, չեմ ունեցել, ամենակարևորը՝ անձնական խնդիրներով պայմանավորված, ես չեմ կարծում, որ որևէ մեկը կարող է իրականացնել իր պաշտոնական լիազորությունները»,-ասաց Գևորգ Կոստանյանը՝ միաժամանակ հավելելով, որ Հատուկ քննչական կոմիտեի ղեկավար Աղվան Հովսեփյանի հետ էլ չունի խնդիրներ:
Գլխավոր դատախազը նաև հայտնեց, որ քննիչների մի մասի նկատմամբ հարուցված քրեական գործերը կարճվել են՝ սուբյեկտիվ կողմի բացակայության հիքմով:
Ինչ վերաբերում է Մարդու իրավունքների պաշտպանի հետ համագործակցությանը, Գևորգ Կոստանյանն ասաց. «Մարդու իրավունքների պաշտպանը կարևոր ինստիտուտ է և այդ ինստիտուտի հետ իմ համագործակցությունը թե իմ նախկին պաշտոններում, թե ներկայիս, իրականացվել և իրականացվում է օրենքի սահմանված կարգով, որովհետև այս կամ այն ինստիտուտի, պետական մարմնի, պաշտոնյանի հետ հարաբերությունները ևս սահմանվում են օրենքով, Սահմանադրությամբ»:
Լրահոս
Տեսանյութեր
Արևմտյան Հայաստանի ու արդեն Արցախի հուշարձանները՝ «ցեղասպանված հուշարձաններ»
