Ես ամեն ինչ կանեմ, որ մեր սերունդների առաջ չամաչեմ. Ռոբերտ Նազարյան
2014 թվականին էլեկտրաէներգիայի սակագնի վերանայման ժամանակ սակագնի հաշվարկման հիմքում հաշվի են առել դոլար-դրամ փախարժեքը, որը եղել է 407.6 դրամ, սակայն այսօր այն արդեն 480 է: Այսօր խորհրդարանում լրագրողների հետ զրույցում ասաց Հանրային ծառայությունները կարգավորող հանձնաժողովի նախագահ Ռոբերտ Նազարյանը:
Լրագրողները նրան հիշեցրեցին, որ նախորդ տարի խոստացել էր, թե այս տարի էլեկտրաէներգիայի սակագինը չի թանկանա, Ռ.Նազարյանը պատասխանեց. «Տեսնում եք, որ իմ տառապանքը փորձ ունի, քանի որ նախորդ տարի այդ հարցին պատասխանել եմ, սակայն իմ խոսքը հանեցիք կոնտեքստից և այսօր շահարկում եք: Անցած տարի ես ասեցի հետևյալը՝ եթե դուք ինձ ասեք, որ սակավաջուր կլինի, թե չէ, դոլար-դրամ փոխարժեքն ինչպիսին կլինի, միջուկային վառելիքի գինն ինչպիսին կլինի և էլի բազմաթիվ գործոններ: Եթե մնար նույնն այս ամենը, ապա սակագինը չի փոխվի»:
Դիտարկմանը, թե այս տարին սակավաջուր չէ, Նազարյանը հակառակը պնդեց, թե տարին սակավաջուր է, լսել է Ջրային տնտեսության պետական կոմիտեի նախագահի խոսքը:
«Նա ասաց, որ այս տարի մեր ջրային ռեսուրսներն ավելի լավն են, քան նախորդ տարի: Մենք խոսում ենք էսօր սակագնի վերանայման հետ կապված 2014-2015 թթ-ի սակագնային տարվա մասին: Այսինքն՝ օգոստոսից այս տարվա օգոստոսի համար է սահմանվել սակագինը: Եթե դուք վերցնեք վիճվարչության տվյալները, վերցնեք բոլոր պատկան մարմինների տվյալները, ապա կտեսնեք, որ սակավաջուր տարի է եղել, և մեր փոքր հէկ-երը, հիդրոէլեկտրակայանները սահմանվածից ավելի քիչ էլեկտրաէներգիա են արտադրել միայն պայմանավորված սակավաջրությամբ»,- ասաց Ռ.Նազարյանը:
Նա միաժամանակ նշեց, որ միջուկային վառելիքի գինը չի փոխվել, բայց քանի որ պայմանագիրը դոլարով է, այստեղ արդեն լուրջ խնդիրներ են եղել:
Հարցին, թե իշխանությունները պատրա՞ստ են այն բողոքի ալիքին, որը կարող է առաջանալ սակագնի թանկացման արդյունքում, Ռ.Նազարյանը պատասխանեց, որ ինքը չի կարող պատասխանել այն հարցին, որին ինքն իրավունք չունի պատասխանելու:
«Մենք այս հարցերը պատադիր նաև իշխանության հետ կքննարկենք, կասենք, որ մեր դիրքորոշումը հետևյալն է, սակագնի մեծացումն այսպիսին պետք է լինի, և կան դրա համար կոչված պատկան մարմիններ, պետք է իրենք վերլուծություններ անեն և կարողանան համարժեք քայլերով այդ բարձրացմանը դիմակայեն, եթե սակագնի բարձրացում գնա»,- ընդգծեց Հանձնաժողովի նախագահը:
Այդուհանդերձ, եթե սակագինը բարձրանա, ապա Ռ.Նազարյանը կարծում է, որ այն չափով, որքանով սակագինը կթանկանա, կառավարությունը կգտնի հնարավոր միջոցներ, որպեսզի սոցիալապես անապահով խավերի համար:
Դիտարկմանը, որ դա մի մասին համար է, ի վերջո բնակչության մեծ մասը վճարունակ չէ, նա պատասխանեց. «Դուք հիմա ուզում եք, որ ես պատասխանեմ մեր ամբողջ երկրի տնտեսության հարցերի՞ն: Ես ձեզ խոստանում եմ, մեր ամբողջ ազգաբնակչությանը, պետք է ես անեմ իմ գործառույթների շրջանակներում այնպիսի բան, որ մեր էներգետիկան կարողանա շարունակել կայուն մնալ և կարողանա իր անվտանգ շահագործումն իրականացնել և կարողանա ձեզ անընդհատ էլեկտրաէներգիա մատակարարել: Ես պետք է հավասարակշռեմ այդ ռիսկերը: Վստահ ասում եմ, որ ցանկացած սակագնի հայտ, որ ես ստանում եմ, ամենածանրը դա տանում են մեր հանձնաժողովի այն պատասխանատուները, որոնք այս կամ այն կերպ առնչություն ունեն սակագնի հաշվարկման հետ: Ցավոք սրտի, սա է մեր իրականանությունը»:
Լրագրողի հարցին, թե արդյոք դատախազությունը անելիք չունի՞, քանի որ վատ մենեջմենթի պատճառով է ՀԷՑ-ում նման իրավիճակ ստեղծվել, Ռ. Նազարյանը ընդունեց, որ մենեջմենթի հետ կապված խնդիր կա: Սակայն, ըստ նրա, երբ հանձնաժողովն իր դիքորոշումը հայտնի, հրապարակավ կհիմնավորի, որ վատ մենեջմենթով պայմանավորված կամ թվացյալ փնթի աշխատանքով պայմանավորված՝ սակագնի մեջ ոչինչ չեն ներառելու:
«Սակագնում ներառելու ենք այն գործոնները, որոնք օբյեկտիվորեն պարտավոր ենք ներառել»,- ասաց նա:
Ռ.Նազարյանը նաև նշեց, որ չի կարող ասել՝ դատախազությունն այստեղ անելիք ունի, թե ոչ: Նրա խոսքերով՝ իրենք իրենց հիմնավորումներն ու իրավիճակը կներկայացնեն, եթե դատախազությունը կգտնի, որ անելիք ունի այդտեղ, թող զբաղվի:
Հանձնաժողովի նախագահի խոսքերով՝ ՀԷՑ-ը սահմանված կարգով իրենց ներդրումային ծրագրերը ներկայացնում են հանձնաժողովին, համաձայնեցնում են, նպատակները, թե արդյունքներն ինչպիսին կլինեն: Երբ Հանձնաժողովը իրենց թույլ է տալիս այդ ներդրումներն անել, դրանից հետո իրենք հաշվետվություն են ներկայացնում, որից հետո մոնիթորինգ են իրականացնում:
Այդ մոնիթորինգի արդյունքներով, ըստ Նազարյանի, վերջին տարիներին՝ 2007-2014 թվականներին 102 մլրդ դրամի ներդրումներ է արել ՀԷՑ-ը, որից 22.5 մլրդ-ը Հանձնաժողովը չի ընդունել երկու պատճառով: Առաջինը, որ առանձին դեպքերում շուկայականից բարձր գներով են գնումներ իրականացնել, և մի մասն էլ չի համապատասխանել բուն նպատակին, և այն ակնկալվող արդյունքները, որ պետք է լինեին, չեն ունեցել:
«Հիմա, սա վա՞տ մենեջմենթ է, թե՞ ոչ: Կարծում եմ՝ այո»,- ասաց նա:
Դիտարկմանը, որ եթե մարդիկ համատարած չվճարեն էլեկտրաէներգիայի դիմաց, ՀԷՑ-ը կսնանկանա, Ռ.Նազարյանը պատասխանեց, որ սնանկացումն էլ տարբերակներից մեկն է, բայց այսօր նման գործընթաց չկա. «Դուք ուզո՞ւմ եք այդ սոցիալական բունտը: Ես բոլորի կողմից եմ, պետք է հավասարակշռեմ բոլորի շահերը: Ես որևէ մեկին համոզելու ցանկություն չունեմ, ես իրականությունը և ճշմարտությունը ներկայացնելու ցանկություն ունեմ»:
Լրագրողի դիտարկմանը, թե հանրությունը Հանձնաժողովի խղճի վրա է թողնում սակագնի թանկացումը, հանձնաժողովի նախագահը պատասխանեց. «Իհարկե, այս բեռը, որ այսօր օրենքով վերապահված է և իր գործառույթներով դրված է մեր կառույցի վրա, ծանր խաչ է, որ պետք է տանենք: Բայց ես ամեն ինչ կանեմ, որ և այսօր, և վաղը, և տարիներ հետո մեր սերունդների առաջ չամաչեմ իմ արածից, դա ձեզ խոստանում եմ»:
Նախորդող հրապարակում ՝
Էլեկտրաէներգիայի սակագնի որոշակի թանկացում կլինի. Ռոբերտ Նազարյան
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
