Ձեր վստահելի աղբյուրը

«Զվարթնոց» օդանավակայանի հին (կլոր) մասնաշենքի հետագա ճակատագիրը կորոշի կառավարությունը, իսկ մինչ այդ, Քաղավիացիայի գլխավոր վարչության խնդրանքով, իր դիրքորոշումը հայտնեց նաև Հանրային խորհուրդը և քանդման առաջարկին տվեց բացասական պատասխան:

Հանրային խորհրդի այսօրվա լիագումար նիստում Քաղավիացիայի գլխավոր վարչության պետ Արտյոմ Մովսեսյանն անդրադարձավ այն դիտարկումներին, թե ինչ համարժեք է առաջարկվում քանդման փոխարեն և հայտարարեց, որ համարժաքն արդեն արված է, դա օդանավակայանի նոր համալիրն է և թվարկեց դրա առավելությունները: «Եթե մենք ունենք այլ տեղերում փորձեր, երբ ինչ-որ շինություն քանդվում է նորը կառուցվելու առումով, մենք արդեն կառուցել ենք շինություն և ուզում ենք քանդել, որպեսզի կառուցենք այս ամենը»,- ասաց նա և հավելեց, որ այդտեղ նախատեսված չեն այլ գործունեություններ, որոնք առաջարկվում է նաև ՀԽ կողմից:

Արտյոմ Մովսեսյանը նաև առարկեց այն առաջարկը, որ հին շենքը կարելի է օգտագործել փոքր ավիացիայի զարգացման համար` նշելով, որ մեր երկրում փոքր ավիացիայի զարգացման հեռանկարները մեծ չեն: Ինչպես կոնցեսիոները, այնպես էլ ստեղծված գերատեսչական հանձնաժողովը կարծում են, որ այդ տարածքը պիտի օգտագործվի միայն ավիացիոն նպատակներով` որպես ուղևորների սպասարկումները մեծացնող կառույց:

«Մենք այլընտրանք չունենք այդտեղ, միմիայն ավիացիոն տեսանկյունով ենք ցանկանում այդ հատվածը զարգացնել, իսկ հին օդանավակայանը մեր կարիքները չի բավարարում»,- ասաց նա և հավելեց, որ կոնցեսիոն պայմանագրով շահագործման տարբերակները բաց է թողնված կոնցեսիոների հայեցողությանը: «Իսկ քանդել-չքանդելու հետ կապված մեր ուղղվածությունը պետք է լինի պատմամշակութային արժեք ներկայացնելուց: Քանի որ արժեք չի ներկայացնում, ընդգրկված չէ ցանկում, մենք ազատ ենք գործունեության մեջ: Այլ բան, որ ՀԽ-ն առաջարկություն է հայտնում, որ ներառվի պահպանվող հուշարձանների ցանկում»,- ասաց նա:

Նիստից հետո մի քանի լրագրողներ Մովսեսյանից հետաքրքրվեցին, թե ինչու է նա պաշտպանում կոնցեսիոների դրքորոշումը` լինելով կառավարության ներկայացուցիչ:

Մովսեսյանը նախ հայտարարեց, որ կառավարությունը դեռ հարցը չի քննարկել և ինքը անձնական տեսակետ է ներկայացրել: «Կոնցեսիոները ներկայացրել է բիզնես ծրագիրը, թե ինչ ուղղություններով է ուզում զարգանալ: Ես նաև օպոնենտի կարգավիճակով էի հանդես գալիս, քանի որ Հանրային խորհուրդը միայն մի ուղղվածություն ունի: Իրենց մոտ կա անցյալի նկատմամբ շատ վառ հիշողություններ, մի փոքր ավելի դուրս էին գալիս այն դաշտից, որով ես` որպես կառավարության ներկայացուցիչ, դիմել էի: Իրենք չպետք է որոշեն քանդել, թե` ոչ, դա կառավարությունը պետք է որոշի: Ես կառավարության դիրքորոշումը ներկայացնելու իրավունք չունեմ: Ես միշտ կողմ եմ առաջընթացների, նորարարության, փոփոխությունների: Եթե ինչ-որ բանի փոխարեն կարելի է ավելի լավը անել, կարելի է դա չունենալ, հիմա արվել է և կարելի է դա չունենալ»,- ասաց նա:

Panorama.am-ի դիտարկմանը, թե Հանրային խորհրդի ճարտարապետական ենթահանձնաժողովում հնչել է կարծիք, որ կարելի է ընդլայնել համալիրը հակառակ ուղղությամբ` դեպի ձախ, և ձեռք չտալ հին մասնաշենքին, Մովսեսյանն արձագանքեց. «Իրենք թյուրմացության մեջ են, ձախ կողմում ընդլայնվելու հնարավորություն չկա, ֆիզիկապես դա հնարավոր չէ»:

Նախորդիվ`

Հանրային խորհուրդը դեմ է «Զվարթնոցի» հին շենքի քանդմանը. «Հիմնավոր փաստարկներ չկան»

Գրիգոր Ազիզյան. «Զվարթնոց»-ի հին շենքը հնարավոր է ամրացնել, ժամանակին առաջարկվել է շենքի ամրացման վեց տարբերակ

Անահիտ Թարխանյան. «Զվարթնոցի» հին շենքի երեսպատումը բարբարոսաբար քանդվել է, բայց շենքը սեյսմակայուն է