«Պիոներ պալատի մակարդակ է». Օպերային թատրոնի նորանշանակ գեղարվեստական ղեկավարն ուզում է հպարտանալ թատրոնով
Ալեքսանդր Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավար է նշանակվել հայ անվանի օպերային երգիչ և բեմադրիչ Գեղամ Գրիգորյանը: Լրագրողների հետ հանդիպման ժամանակ ասաց թատրոնի տնօրեն Անդրանիկ Արզումանյանը:
«Բազմից ասել եմ, որ մեր թատրոնին անհրաժեշտ է գեղարվեստական ղեկավար: Շնորհակալ եմ, որ Գեղամ Գրիգորյանն ընդունեց իմ հրավերը»,- ասաց նա՝ հավելելով, որ իր համար կարևորը Գ. Գրիգորյանի պրոֆեսիոնալիզմն է, փորձը:
Հիշեցնենք, որ Գեղամ Գրիգորյանը 8 տարի եղել է Ալեքսանդր Սպենդիարյանի անվան օպերայի և բալետի ազգային ակադեմիական թատրոնի գեղարվեստական ղեկավարը: Աշխատանքից ազատվել է 2008 թվականին՝ իր դիմումի համաձայն: Դրանից հետո թատրոնը գեղարվեստական ղեկավար չի ունեցել: Հաստիքը կրճատվել էր:
«Չէի կարող մնալ այդ ժամանակ, ինձ խանգարում էին, ուզում էին, որ դառնայի ողորմություն խնդրող: Չեմ սիրում այդ բանը»,- իր հեռանալու պատճառն այսպես ներկայացրեց Գեղամ Գրիգորյանը` չցանկանալով մանրամասնել:
Իսկ թե ինչո՞ւ համաձայնվեց վերադառնալ հարցին, նա պատասխանեց. «Պիոներ պալատի մակարդակի է, ուզում եմ հպարտանալ իմ թատրոնով: Ոչ թե մեծ փողեր ծախսելով պետք է հասնենք հաջողության, մեզ դա պետք չէ, այլ աճեցնել մի սերունդ, որ ամեն տեղ մեր պատիվը բարձր պահի»:
Գեղամ Գրիգորյանն ասաց, որ կան տաղանդավոր, շնորհալի երիտասարդներ, սակայն անհրաժեշտ է աշխատել նրանց հետ. «Այդ տաղանդավոր երիտասարդներին պետք է գտնել ու աշխատել նրանց հետ, ամենօրյա աշխատանք է պետք, որն էլ կբերի արդյունք»:
Պատասխանելով հարցին, այսօր շատ երիտասարդներ հեռանում են Հայաստանից, ինչպե՞ս նրանց պահել, նա ասաց, անգործության մատնված մարդիկ են գնում:
Գ. Գրիգորյանը կարծում է, որ պետք է ամեն տարի 4-5 նոր ներկայացում ունենան, նոր օպերաներ գրվեն. «Ներկայացումները պետք է շատ լինեն, թատրոնը պետք է աշխատի, մարդիկ պետք է աշխատեն»:
Ինչ վերաբերում է թատրոնի կադրերին, նորանշանակ գեղարվեստական ղեկավարն ասաց, որ բոլորին էլ ճանաչում է, բայց միայն աշխատանքը ցույց կտա. «Տեսնենք՝ ով ինչպես է աշխատում: Միգուցե մինչև հիմա աշխատելու հնարավորություն չեն ունեցել, հիմա կունենան»: