Ձեր վստահելի աղբյուրը

Փառատոնը դեռ աճելու տեղ ունի, չնայած այն մեզ համար կայացել է և մեծ ձեռքբերումներ ունեցանք: Այս մասին այսօր լրագրողների հետ հանդիպմանն ասաց «ֆրեսկո» արդի արվեստի և հոգևոր ֆիլմերի երկրորդ փառատոնի ծրագրերի ղեկավար Աննա Կարապետյանն՝ ամփոփելով «ֆրեսկո» արդի արվեստի և հոգևոր ֆիլմերի երկրորդ փառատոնը:

Հիշեցնենք, որ փառատոնն անց է կացվել հունիսի 27-ից հուլիսի 5-ը: Բացումը տեղի է ունեցել Կարապի լճի տարածքում, որին հաջորդել են մարզերում բացօթյա դիտումներ, քննարկումներ, իսկ փակումը տեղի է ունեցել Մայր Աթոռի բակում:

«Փառատոնի հիմնական նպատակն է բարձրացնել հոգևոր, սոցիալական, բարոյական թեմաներ: Փառատոնն ունեցել է կամավորների մի մեծ բանակ, որը գիշեր ցերեկ մեկը մյուսին օգնելով՝ կայացնում էին փառատոնը»,-նշեց Աննա Կարապետյանը:

Նա հույս հայտնեց, որ նման փառատոնները կօգնեն հոգևորի և արվեստի վերականգնմանը. «Մեր կարգախոսն է` «Վնասվածը վերականգնելու կարիք կա»»:

Հանդիպմանը ներկա փառատոնի հոգևոր խորհրդատու Բագրատ եպիսկոպոս Գալստանյանն էլ նշեց, որ այս փառատոնը նոր հորիզոն, նոր եզրեր կարող է բացել կյանքում:

«Մեզ թվում է, թե հոգևոր կյանքը որևէ ձևով արդիական չէ այսօրվա աշխարհում, սակայն այս փառատոնը հակառակն է փաստում՝ ցույց տալով, թե ինչ հետաքրքրություն կա երիտասարդության շրջանում»,-ասաց հոգևոր պատասխանատուն՝ նշելով, որ փառատոնի կարևոր ասպեկտներից էր նաև զանազան խմբերի ներգրավվումը:

Նա նկատեց, որ «ֆրեսկո»-ն յուրահատուկ ներմշակութային երկխոսություն էր թե մեր իրականության, և թե աշխարհից եկող տարբեր ազդակների միջև, քանի որ փառատոնին ներկա էին ոչ միայն քրիստոնեական, այլ նաև մահմեդական երկրներից, ովքեր մեծ հետաքրքրությամբ էին մասնակցում:

Ծրագրերի ղեկավար Աննա Կարապետյանն անդրադառնալով կինոփառատոնի ընթացքում անցկացվող ճամբարներին՝ նշեց, որ դրանց անցկացման վայրերը պատահական չեն ընտրվում. «Ընտրում ենք հին վանքերը, որտեղ մեր երիտասարդները, հյուրերը կարող են ծանոթանալ տեղանքին: Այս տարվա ճամբարն անցկացվեց Հառիճավանքում»:

Բագրատ եպիսկոպոս Գալստանյանն էլ ընդգծեց, որ այս փառատոնն իր տեսակով որևէ ստանդարտի չի համապատասխանում. «Փառատոնների հանդեպ մեր ունեցած դասական ընկալումներից դուրս է»:

Ամփոփելով հանդիպումը՝ փառատոնի ծրագրերի ղեկավարն ավելացրեց, որ իրենց հիմնական նպատակն ընտրված ուղերձները տեղ հասցնելն է, այլ ոչ թե գնահատել գերազանց օպերատորական կամ դերասանական աշխատանքը:

«ֆրեսկո»-ի նախագահ Շահեն Նազարենկոն էլ նշեց, որ այս փառատոնը մարաթոնային գործընթաց է և անընդհատ աճելու ունակություն ու ներուժ ունի:

Նախորդող հրապարակումներ՝
Հայտնի է «Ֆրեսկոյի» ուղերձները լավագույնն արտահայտած ֆիլմերի ցանկը
Ավազե անիմացիայով և ռոք համերգով կտրվի «Ֆրեսկո» փառատոնի այս տարվա մեկնարկը
«Ֆրեսկո»-ի ողջ ծրագիրը նվիրվում է Հայոց ցեղասպանության 100-րդ տարելիցի հիշատակին