Ձեր վստահելի աղբյուրը

Մի քանի ամսվա ընդմիջումից հետո Հայաստանը ձու է ներկրել: Սննդամթերքի անվտանգության ծառայության մամուլի խոսնակ Արմինե Սուքիասյանի՝ Panorama.am-ին տրամադրևած տվյալների համաձայն, աշնան ընթացքում ձու ներկրվել է երկու անգամ հարևան Իրանից:
«Սեպտեմբերի 21-ին Հայաստան ձու է ներմուծվել Իրանի Իսլամական Հանրապետությունից, հաջորդ անգամ հոկտեմբերի 13-ին: Երկու անգամ էլ ներմուծվել է 308 880 հատ խմբաքանակով»,-ասաց Ա. Սուքիասյանը:

Ինչո՞ւ է Հայաստանը ստիպված ձու ներմուծել, ինչո՞ւ ինքնաբավ երկիր չի դառնում

Թռչնաբույծների միության նախագահ Սերգեյ Ստեփանյանը Panorama.am-ի հետ զրույցում ասաց, որ Հայաստանը տարվա մեջ մի քանի անգամ ստիպված կլինի ձու ներկրել այնքան ժամանակ, քանի դեռ տոհմային տնտեսություն չունի: Նրա վստահեցմամբ, այս շուկայում ամեն ինչ բնականոն հունով է ընթանում, ոչ մի ինտրիգ չկա:

«Հանրապետությունում ձվի դիֆիցիտ գոյություն չունի: Մենք կարողանում ենք մեր պահանջարկը ծածկել: Բայց ամեն տարի սեպտեմբերի վերջ-հոկտեմբերի սկիզբ տեղի է ունենում հասակավոր թռչունների ելք և նոր վառեկների հոսք: Այդ ընթացքում բնականաբար ձվատվությունը նվազում է»,-բացատրեց միության նախագահը:

Նրա խոսքով, տարեց հավերին երիտասարդներով փոխելու, կոմլեկտրավորելու գործընթացը հայաստանյան բոլոր թռչնաբուծարաննեում տեղի է ունենում միաժամանակ:

Դա էլ ունի իր բացատրությունը: Տոհմային տնտեսության բացակայության պայմաններում վառեկներն էլ դրսից են բերվում, իսկ այդ երկրները վառեկներն արտահանում են միայն իրենց երկրի պահանջարկը բավարարելուց հետո:

«Մենք չենք կարողանում գործընթացն աստիճանաբար իրականացնել, այսինքն սկսել օգոստոսից, որպեսզի նման խնդիր չառաջանա: Ստիպված միանգամից են բոլոր տնտեսությունները ներկրում: Հիմա արդեն հոկտեմբերի 25-ից վառեկները սկսել են ձու ածել, միանգամից ձվարտադրության ծավալները կավելանան»,-ասաց Ստեփանյանը:

Վառեկները բերում են Ռուսաստանից, Վրաստանից, Պարսկաստանից, Ուկրաինայից, նրանք տոհմային տնտեսություն ունեն, իսկ մենք չկարողացանք մեր տոհմային տնտեսությունը պահպանել:

«Վրաստանում պետությունը աջակցեց, տոհմային տնտեսություն ստեղծեցին: Վրաստանը նախկինում մեր երկրից էր ձու ներմուծում, հիմա նրանք տոհմային տնտեսություն ունեն, դարձել են ինքաբավ երկիր, մեզ էլ ասում են, եթե ուզում եք, ձու կարող ենք ձեզ վաճառել»,-ասաց նա:

Panorama.am-ի զրուցակցի խոսքով, այս տարի ձու ներկրող ընկերություններից մի քանիսը խելացի են գտնվել, միությունից հարցրել են՝ արդյո՞ք ձեռնտու կլինի ներկրելը:

«Մենք էլ իրավիճակը ներկայացրել ենք, էդ մարդիկ էլ մինչև օրս չեն ներկրել՝ հասկանալով, որ եթե նման բան անեն, կարող է չկարողանան իրացնել կամ էլ շատ էժան իրացնեն, ինչպես պատահեց «Սոպրանո» ընկերության հետ: Հունվարին ձու բերեց մինչև Զատիկ չէր կարողանում իրացնել»,-ասաց միության նախագահը:

Ստեփանյանի խոսքով, ձվի պահանջարկի ավելացմանը մեծապես նպաստել են խմորեղենի արտադրությամբ ձբաղվող ձեռնարկությունները:
«Այս տարի միրգը քիչ էր, փոխարենը մեծ է եղել խմորեղենի պահանջարկը. օրական մոտ 200 արկղ, ամեն արկղում 360 հատ ձու, նման բան չէր եղել: Նախորդ տարիներին մենք 100, ամենաշատը 110 արկղ ենք նրանց մատակարարել: Հիմա դա էլ իրենց չի բավարարում, ստիպված խմորեղեն արտադրողզ ձեռնարկությունները գնում են սուպերմարկետներից են առնում, դրա համար էլ շատ արագ սպառվում է»,-ասաց միության նախագահը:

Ոլորտի մասնագետը շուկային անծանոթ մարդկանց խորհուրդ է տալիս ձու չներկրել ու «այս շուկան չփչացնել»:
«Մեր ձեռքը շուկայի պուլսի վրա է գտնվում, եթե հանկարծ կզգանք, որ մեծ քանակի պահանջարկ կա, ինչը հնարավոր է միայն դեկտեմբերի 10-ից սկսած, ապա մենք շտապ ինքներս թարմ ձու ներկրել»,-ասաց Ստեփանյանը:

Թռչնաբույծների միության նախագահի խոսքով, տնտեսվարողները մինչ հավերի սերնդափոխություն իրականացնելն ունակ են մեծ քանակությամբ ձու արտադրել, սակայն աչքների առաջ ունեն 2010-ի դառ փորձը, «երբ կառավարությունը նեցուկ չկանգնեց արտադրողներին, որպեսզի ձվի փոշու արտադրություն կազմակերպվի, որի պահանջարկը արտերկրում շատ մեծ է: Դրա համար այսօր ոչ մի սեփականատեր ռիսկի չի գնում, պահում է այնքան գլխաքանակ, որ մի քիչ պակաս լինի, բայց ավել չլինի»:

Սննդամթերքի անվտանգության ծառայությունից հայտնեցին, որ մի քանի ընկերություններ ձու ներկրելու թույտվություն ստանալու համար դիմել են իրենց, սակայն հարցի վերաբերյալ որոշում կայացնելու համար դեռ պետք է մի շարք ուսումնասիրություններ անցկացվեն: