Այս տարվա հուլիսի 1-ից հանրային շարժական բջջային կապի կանխավճարային հեռախոսաքարտերը հաճախորդներին տրամադրում են գրավոր պայմանագրի հիման վրա: Այսօր միաձայն նման որոշում կայացրեց Հանրային ծառայությունները կարգավորող հանձնաժողովը: Որոշման համաձայն, պայմանագիր կնքելիս բաժանորդը պետք է ներկայացնի անձը հաստատող փաստաթղթի պատճենը: Մինչև այս տարվա հուլիսի 1-ը իրացված հանրային շարժական բջջային կապի կանխավճարային հեռախոսաքարտեր ունեցող բաժանորդների հետ գրավոր պայմանագրերը պետք է վերակնքվեն մինչև 2007թ. նոյեմբերի 1-ը:

Ինչպես նշեց հանձնաժողովի ներկայացուցիչ Գ. Գևորգյանը, որոշումը պայմանավորված է Հայաստանի հանրային շահի և ազգային անվտանգության շահերի պաշտպանության անհրաժեշտությամբ: Բացի այդ, նման սկզբունք գործում է եվրոպական մի շարք երկրներում: Ֆունդամենտալ գիտությունների ազգային կենտրոնի ղեկավարի խոսքով սակայն, որոշումը չի կարող ապահովել ազգային անվտանգության պաշտպանությունը, քանի որ բաժանորդների անձնական տվյալները կփոխանցվեն Հայաստանին չպատկանող ընկերությանը: Ներկայումս Հայաստանում բջջային կապի ծառայություններ են մատուցում «ԱրմենՏել» և «ՎիվաՍել» ընկերությունները:

Հիշեցնենք, որ անցած տարվա նոյեմբերի 13-ին կնքված փոխհամաձայնության հուշագրով հունական OTE-ն «Արմենտել ՀՁ» ՓԲԸ-ի բաժնետոմսերի 90%-ը ռուսական «Վիմպելկոմին» էր վաճառել 341 միլիոն 888 հազար եվրոյով: Բացի այդ, «Վիմպելկոմն» իր վրա էր վերցրել նաև ընկերության մոտ 40 մլն եվրո ընդհանուր պարտքը մարելու պարտավորությունը: Իսկ մարտի 22-ի կառավարության նիստում գործադիրը որոշել է «Վիմպելկոմին» վաճառել նաև իրեն պատկանող «ԱրմենՏելի» բաժնետոմսերի 10 տոկոսը: Գույքի վաճառքի գին է սահմանվել հուշագրով սահմանված գնորդի կողմից ձեռք բերված` ընկերության բաժնետոմսերի 90 տոկոսի գնի 1/9 մասին համարժեք գումարը: