«Հայկական երկաթգծեր» ՓԲԸ-ն կոնցեսիոն կառավարման հանձնելու գործընթացը կարող է ավարտվել 2008 թվականի սկզբին: Այս մասին, այսօր բրիֆինգի ժամանակ հայտնել է Տրանսպորտի և կապի նախարար Անդրանիկ Մանուկյանը: Նա նշել է, որ ընկերությունը կոնցեսիոն կառավարման հանձնելու նախնական մրցույթը տեղի է ունենալու այս տարվա հոկտեմբերին, որին մասնակցելու համար արդեն այսօր դիմել են 45 ընկերություններ, որոնց անունները նախարարը նախընտրեց չհրապարակել:

Նշենք, որ այս տարվա հունիսի 25-ին ՀՀ տրանսպորտի և կապի նախարարությունը «Հայկական երկաթգծեր» ընկերությունը կոնցեսիոն կառավարման հանձնելու նպատակով նախնական որակավորման մրցույթ անցկացնելու մասին հայտարարություն է արել, որին կարող են մասնակցել ինչպես հայրենական, այնպես էլ օտարերկրյա ընկերությունները: Նախկինում «Հայկական երկաթգծերի» կոնցեսիոն կառավարմամբ հետաքրքրվել էին Ռուսաստանն ու Ֆրանսիան:

Հիշեցնենք նաև, որ 2006 թվականի հոկտեմբերի 12-ին Հայաստանի կառավարությունը որոշում է ընդունել «Հայկական երկաթգծերը» 30 տարով հանձնել կոնցեսիոն կառավարման, հետագայում 20 տարի երկարաձգելու իրավունքով: Գործարքի պայմանների համաձայն, կոնցեսիոն կառավարման վերցնող ընկերությունը պետք է 10 տարվա ընթացքում 170 միլիոն դոլարի ներդրումներ իրականացնել: