Հունվարի 17-ից Սլովակիայում վերջնականապես դադարեցվել է ազգային արժույթի շրջանառությունը: Բոլոր գործարքներն իրականացվում են միայն եվրոյով: Այս մասին հաղորդում է AFP գործակալությունը` հղում կատարելով երկրի Կենտրոնական բանկի կատարած հայտարարության վրա:

Սլովակիան պաշտոնապես միացել է եվրոտարածքին հունվարի մեկից, սակայն դրանից հետո դեռ երկու շաբաթ վճարումների համար ընդունվում էր ինչպես եվրոն, այնպես էլ ազգային արժույթ հանդիսացող կռոնը:

Ինչպես հայտնում է Radio Slovakia International-ը, Կենտրոնական բանկը գանձել է 2007 թվականի վերջին տպագրված և շրջանառության մեջ առկա բոլոր թղթադրամների 72 տոկոսը: ԿԲ տվյալներով, հասարակության ձեռքին դեռ կա մոտ 43 միլիարդ կռոն (մոտ 1,4 միլիարդ եվրո):

Թղթադրամները կարելի է փոխել կոմերցիոն բանկերում մինչև ընթացիկ տարվա վերջը, մանրադրամները` մինչև հունիսի վերջը:
Նշենք, որ Սլովակիան դարձավ եվրոտարածքի 16-րդ երկիրը: Փոխարժեքը կազմեց 30,126 կռոն` մեկ եվրոյի դիմաց: