«Վերջին ժամանակներս ֆինանսաբանկային տերմինաբանությունը համալրվեց այնպիսի նոր հասկացություններով, ինչպիսիք են բանկային ռիսկերի ապահովագրություն, ծառայողների պատասխանատվության ապահովագրություն, գրավադրված գույքի ապահովագրություն, էլեկտրոնային հանցագործություններից ապահովագրություն և վերջապես այսպես կոչված Բի-Բի-Բի (BBB) հավաստագիր: ՎՏԲ-Հայաստան բանկը ՀՀ բանկային համակարգի այն հետևողական բանկերից է, որ ձեռնամուխ եղավ իր ռիսկերի ապահովագրման գործում օգտվել վերոնշյալ գրեթե բոլոր ապահովագրական ծառայություններից, դրանով իսկ նպաստելով նաև ժամանակակից ֆինանսական աշխարհի մշակույթի ներմուծմանը Հայաստան»,-նշված է բանկի մամլո ծառայության տարածած հաղորդագրության մեջ:

Ըստ աղբյուրի, ՎՏԲ-Հայաստան բանկը շարունակում է վճարել ոչ միայն իր ընթացիկ պահպանման ծախսերի դիմաց, այլև այնպիսի ռազմավարական նպատակների համար, ինչպիսիք են բանկային ռիսկերի, բանկում գրավադրված գույքի և ներդրված ավանդների ապահովագրումը:

ՀՀ ապահովագրական համակարգն էլ իր հերթին ի վիճակի է ապահովել ժամանակակից ապահովագրական ծառայությունների և պրոդուկտների ներմուծումը, ապահովել բանկային համակարգի հետզհետե աճող պահանջարկը: Որպես օրինակ. վերջին մեկ տարվա ընթացքում «Լոնդոն-Երևան» ապահովագրական ընկերությունը Բի-Բի-Բի հավաստագրի ներքո ՎՏԲ-Հայաստան բանկի ռիսկերն ապահովագրելով կատարեց բանկի օգտին ապահովագրական զգալի վճարումներ` երորդ անձանց պատասխանատվության ապահովագրման գծով:

Նշենք, որ այդ ռիսկերը վերաապահովագրված են եղել միջազգային բարձր վարկանիշ ունեցող վերաապահովագրական խոշոր ընկերություններում: Հատկանշական է նաև ապահովգրական ընկերությունների ընտրության հարցը, որի նկատմամբ ՎՏԲ-Հայաստան բանկը մշտապես դրսևորում է սահմանափակ և հավասարակշռված մոտեցում: