Երևանի Կարեն Դեմիրճյանի անվան մարզահամերգային համալիրում ապրիլի 2-ից 4-ը կանցկացվի միջազգային 7-րդ «Կովկաս` շինարարություն և վերանորոգում EXPO 2010» մասնագիտացված ցուցահանդեսը:

Ինչպես հայտնեցին «Logos EXPO Center» ցուցադրությունների կենտրոնից, ցուցադրությունը կզբաղեցնի ավելի քան 10000 քառակուսի մետր տարածք: «Առաջին անգամ Հայաստանում կներկայացվեն Թուրքիայից, Վրաստանից ու Իրանից ամենախոշոր շինարարական բրենդերը:

Հենց այս իրադարձությունն էլ առիթ կհանդիսանա վերը նշված երկրների խոշոր շինարարական ընկերությունների ու Հայաստանի շինարարական ընկերությունների համագործակցության համար: Հայկական շինարարական ոլորտի ընկերությունների համար առաջին անգամ հնարավորություն է ընձեռվում տեղում հարաբերություններ հաստատել շինարարության ոլորտում խոշորագույն կազմակերպությունների հետ, որոնք կնպաստեն Հայաստանի տնտեսության մեջ միջազգային ներդրումների աճին:

Ցուցահանդեսի շրջանակներում կկազմակերպվեն շնորհանդեսներ ու «Նորագույն տեխնոլոգիաների կիրառումնը ժամանակակից շինարարության մեջ» և «Ինտերիերում ու էքստերիերում ժամանակաից դիզայներական մտքի ռացիոնալ օգտագործում» թեմաներով կլոր սեղաններ:

Ցուցահանդեսի նպատակն է նոր իրացման շուկաներ փնտրելը, Հայաստանի տնտեսությունում արտասահման ներդրումների գրավումը, երկրի տնտեսական պոտենցիալի ցուցադրումն ու նոր գործընկերների որոնումը:

Ցուցահանդեսին մասնակցում են ներդրումային, շինարարական ընկերությունների, նախագծերի, դիզայներական ընկերությունների շուկայում առաջատար դեր ունեցող ավելի քան 100 ընկերություններ:

Նշենք, որ ցուցահանդեսը կազմակերպել են «Logos EXPO Center»-ը և Հայաստանի արդյունաբերողների ու գործարարների միությունը: Այն անցկացվելու է էկոնոմիկայի նախարարության, Շինարարների միության, Դիզայներների միության և Ճարտարապետների միության աջակցությամբ: