Կայացել է մարզպետների հետ հերթական խորհրդակցությունը

20:14 03/02/2012 » Տնտեսություն

Կայացել է մարզպետների հետ հերթական խորհրդակցությունը

ՀՀ փոխվարչապետ, տարածքային կառավարման նախարար Արմեն Գևորգյանի մոտ մարզպետների մասնակցությամբ այսօր կայացած հերթական խորհրդակցության ընթացքում քննարկվել են հողօգտագործողներին մատչելի գնով պարարտանյութ և դիզելային վառելիք տրամադրելու պետական ծրագրերի իրականացմանն առնչվող հարցեր, հայտնում են ՏԿՆ հասարակայնության հետ կապերի բաժնից: Գյուղատնտեսության նախարար Սերգո Կարապետյանը մարզպետներին տեղեկություններ է ներկայացրել դիզելային վառելիքի ձեռքբերման ծրագրի ընթացակարգերի մասին: Նշվել է, որ, ինչպես պարարտանյութի ծրագրի դեպքում, դիզելային վառելիքի տեղափոխման և համապատասխան խմբաքանակը համայնքներ հասցնելու գործընթացը ևս իրականացվելու է կառավարության ջանքերով` համապատասխան մարզպետի աջակցությամբ: Փոխվարչապետը մարզպետներին հանձնարարել է ՀՀ գյուղատնտեսության նախարարության հետ համագործակցված աշխատել` պատշաճ մակարդակով աշխատանքները կազմակերպելու համար:

Խորհրդակցության ընթացքում ՀՀ սփյուռքի նախարար Հրանուշ Հակոբյանը մարզպետներին ներկայացրել է «Արի տուն» ծրագրի և «Իմ Հայաստան» փառատոնի կազմակերպչական հարցեր: Նշվել է, որ մայրաքաղաքին մոտ գտնվող մարզերում այս անգամ եւս անհրաժշտություն կլինի հայուրընկալող ընտանիքների ընտրություն կատարել` «Արի տուն» ծրագրի մասնակիցների համար: Ըստ նախարարի` մարզպետների աջակցությունն անհրաժեշտ է նաև «Իմ Հայաստան» փառատոնին մարզային մշակութային խմբերի մասնակցության ապահովման, ժամանած խմբերի հյուրախաղերը մարզերում կազմակերպելու հարցերում:

Մարզպետներն աջակցության պատրաստակամություն են հայտնել միջոցառումների իրականացմանը: Փոխվարչապետն առաջարկել է հանդիպում կազմակերպել Տարածքային կառավարման, Սփյուռքի նախարարությունների պատասխանատուների և մարզպետարանների համապատասխան վարչությունների պետերի հետ` կազմակերպչական խնդիրները քննարկելու համար:
Խորհրդակցությանը քննարկվել են մի շարք այլ հարցեր ևս: Տեղեկացվել է, որ հանրապետության անտառածածկի որոշման մոնիտորինգի արդյունքներով բացահայտվել է, որ քարտեզներում առկա անճշտությունների հետևանքով ավելի քան 23 հազ. հա անտառ ընդգրկված չէ հանրապետության անտառային ֆոնդում: Փոխվարչապետը մարզպետներին հանձնարարել է աշխատնքներ սկսել համապատասխան պետական մարմինների հետ` փաստացի անտառածածկ տարածքն անտառային ֆոնդում ընդգրկելու և անհրաժեշտ ճշգրտումները կատարելու ուղղությամբ:

Խորհրդակցության անդրադաձ է եղել նաև ԿԱ անշարժ գույքի կադաստրի պետական կոմիտեի տվյալների բազաների ամբողջականացման հարցում համայնքապետերի աջակցությանը: Փոխվարչապետը կարևորել է կոմիտեի մարզային ստորաբաժանումների հետ համյանքապետերի համագործակցված աշխատանքը` քաղաքացիներին վերաբերող տվյալների համապատասխանեցման, ոչ լիարժեք բազան ամբողջականացնելու հարցում:

 

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց