Գինու և կոնյակի արտադրություն Արագածոտնում` ներդրումային ծրագրի շրջանակներում

11:48 03/05/2012 » Տնտեսություն

Գինու և կոնյակի արտադրություն Արագածոտնում` ներդրումային ծրագրի շրջանակներում

Ներդրումային ծրագրի շրջանակներում «ԳՈԼԴՆ ԳՐԵՅՊ ԱՐՄԱՍ» ՍՊԸ-ի կողմից 300 միլիոն դրամը գերազանցող ապրանքների ներմուծման դեպքում մաքսային մարմինների կողմից հաշվարկված ԱԱՀ-ի գումարների վճարման ժամկետը երկարաձգվեց երեք տարի ժամկետով: Այս մասին որոշումն ընդունվեց ՀՀ կառավարության այսօրվա նիստում:

«ԳՈԼԴՆ ԳՐԵՅՊ ԱՐՄԱՍ» ընկերության կողմից ապրանքները պետք է ներմուծվեին մինչև 2011թ. դեկտեմբերի 31-ը: Սակայն, ինչպես կառավարության այսօրվա նիստում նշեց ՀՀ էկոնոմիկայի նախարար Դիգրան Դավթյանը, ընկերության կողմից իրականացվող աշխատանքների ժամանակ առաջացել են որոշ բարդություններ, թե եղանակային պայմանների և թե անհրաժեշտ ապրանքների վերանայման պատճառներով, ինչի հետևանքով էլ ժամանակացույցը խախտվել է:

Մասնավորապես, 2011թ. հուլիսի կեսին արձանագրված անբարենպաստ եղանակներից հետո, որի արդյունքում էական վնաս է հասցվել սպասվող բերքի ծավալներին, փլուզվել է մոտ 150-200 մետր ցանկապատ, խափանվել է էլեկտրամատակարարումը` սյուների վայրընկման պատճառով, այրվել է ենթակայանը, ինչպես նաև փլուզվել է կառուցվող արհեստական լիճը: 2011-2012թ. ընկերության կողմից շարունակվել են վերականգնողական աշխատանքները: Այսպիսով, ըստ նախարարի, խախտվել է ներմուծման ժամկետները, քանի որ այն մասամբ դադարեցվել էր վերականգնողական աշխատանքների պատճառով:

Միաժամանակ, ելնելով աշխատանքների ծավալներից անհրաժեշտություն է առաջացել ներմուծել լրացուցիչ ապրանքներ, մասնավորապես, գյուղատնտեսական աշխատանքների իրականացման համար գործիքներ և տեխնիկա, գործարանի համար անհրաժեշտ մետաղական կոնստրուկցիաներ, լրացուցիչ խողովակներ, լաբորատոր սարքավորումներ, փայտյա տակառներ և այլն:

Այսպիսով, ներդրումային ծրագրով ընկերությունը նախատեսում ՀՀ Արագածոտնի մարզի մոտ 180 հա տարածքում իրականացնել խաղողի աճեցման և վերամշակման, գինու և կոնյակի արտադրություն, ինչպես նաև ստեղծել համապատասխան ենթակառուցվածքներ ագրոտուրիզմի զարգացման նպատակով:

Ծրագրի շրջանակներում արդեն իսկ ցանկապատվել է ամբողջ տարածքը, ձեռք է բերվել մոտ 30 միավոր գյուղտեխնիկա և մեքենաներ, մշակվել են հողատարածքները, որտեղ տնկվել է մոտ 350 հազար խաղողի վազ և մոտ 7.5 հազար պտղատու ծառ, իտալական մասնագետների կողմից լիովին ավարտված են գործարանի շինության արտաքին աշխատանքները:
Տ.Դավթյանը նշեց, որ ներկայումս ընկերությունում սկսվել են գործարանի շինության ներքին աշխատանքները, ներկրված սարքավորումների տեղադրումը, ինչպես նաև համապատասխան հողային աշխատանքները:

Նրա խոսքերով` ներդրումային ծրագրի շրջանակներում ընկերությունը նախատեսում էր ներդնել մոտ 6.2 մլրդ դրամ և ստեղծել մոտ 80 նոր աշխատատեղ, իսկ այս փոփոխության ընդունման դեպքում ներդրումների չափը կկազմի մոտ 6.6 մլրդ դրամ և կստեղծվի 100 աշխատատեղ:

ՀՀ վարչապետ Տիգրան Սարգսյանը նշեց, որ իտալացի մասնագետերի համագործակցությամբ ժամանակակից գործարան է կառուցում, որը այլ տնտեսությունների համար կլինի օրինակելի: «Կարծում եմ այդ փորձը կտարածվի գինեգործական այլ ընկերությունների վրա»,-ասաց նա: Ըստ նրա` դա կարևոր նշանակություն կունենան նաև ագրոտուրիզմի զարգացման համար:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց