Ձեր վստահելի աղբյուրը

Անգամ այն տարիներին, երբ ՀՀ-ում գրանցվել է երկնիշ թվով արտահայտված տնտեսական աճ, այն քիչ անդրարդարձ է ունեցել մարդկային զարգացման վրա,- գնահատել է «Այլընտրանք» հետազոտական կենտրոնի հիմնադիր, պրոֆեսոր Թաթուլ Մանասերյանը և հրավիրվածներին ներկայացրել է Հայաստանի տնտեսության աճի և մարդկային զարգացման ճանապարհային քարտեզը:

«Մեր նպատակն է ներկայացնել այն քայլերը, - նշեց նա, որոնք հնարավորություն կտան ձևավորել բազմաճյուղ և մրցունակ ազգային տնտեսություն, վերականգնողական աճից անցում կատարել կայուն զարգացման և դրանց շնորհիվ ապահովել բնակչության բարձր կենսամակարդակ: Ի վերջո, մեր համոզմամբ, Հայաստանի տնտեսության զարգացումն ու բնակչության բարեկեցութան բարձրացումը խարսխված են, մի կողմից՝ տնտեսության մրցունակության, իսկ մյուս կողմից՝ տնտեսական անվտանգության բավարար մակարդակի ապահովման վրա»,-ըստ կենտրոնի հաղորդագրության, ասել է Մանասերյանը:

Միաժամանակ կարևորվել է տնտեսական աճի և ճանապարհային քարտեզի իրագործման հեռանկարները: Դրվատանքի է արժանացել Մանասերյանի կողմից առաջարկված անկախ փորձագետների տնտեսագիտական խորհուրդ հիմնելու առաջարկը, որը կոչված կլինի պարբերաբար մատնանշել տնտեսության խոցելի կողմերը, անկողմնակալ գնահատական տալ երկրում իրագործվող տնտեսական քաղաքականությանը, իրականացնել պետական ծրագրերի փորձաքննություն և կատարել տնտեսական կանխատեսումներ,-հայտնում է աղբյուրը:

Ելույթ ունեցողներն անդրադարձել են նաև Հայաստանի և հայության մրցակցային առավելությունների համակարգված բացահայտման և իրացման հարցերին:

Քննարկմանը մասնակցել են և ելույթներով հանդես եկան ՀՀ Ազգային Ժողովի փոխնախագահ Հերմինե Նաղդալյանը, ՀՀ Հանրային խորհրդի նախագահ Վազգեն Մանուկյանը, ՀՀ Հայրենական ապրանք արտադրողների միության նախագահ Վազգեն Սաֆարյանը, «Հանուն Կայուն Զարգացման» ասոցիացիայի նախագահ Կարինե Դանիելյանը, պրոֆ. Ալեքսանդր Մանասյանը, պրոֆ. Վարդան Բոստանջյանը, պրոֆ. Բենիկ Միրզոյանը, պրոֆ. Սամվել Ավետիսյանը, «Սոցիոմետր» կենտրոնի ղեկավար Ահարոն Ադիբեկյանը, Հայաստանի սպառողների միության նախագահ Արմեն Պողոսյանը անկախ փորձագետներ Արծրուն Պեպանյանը, Նիկիտա Զարուբյանը և այլոք: