Բուլղարիան մտադիր է կարճ ժամանակամիջոցում ապահովել Ադրբեջանից գազի ներկրումը
Բուլղարիան մտադիր է կարճ ժամանակամիջոցում ապահովել Ադրբեջանից գազի ներկրումը: Այս մասին «Euronews»-ի փոխանցմամբ, ադրբեջանցի իր գործընկերոջ հետ բանակցություններից հետո հայտարարել է Բուլղարիայի էկոնոմիկայի և էներգետիկայի նախարար Դրագոմիր Ստոյնևը:
«Ադրբեջանից 1 միլիարդ խորանարդ մետր գազը, որի մատակարարման մասին մենք պայմանագիր ենք ստորագրել 2013թ.-ին, պետք է ներկրվի Հունաստանի հետ կապող գազամուղի (interconnector) միջոցով: Գազամուղի տեխնիկական նախագիծը պետք է պատրաստ լինի այս տարի: Ապրիլի վերջին կսկսենք լուծել նախագծի ֆինանսավորման հարցերը: Դրանում մասնակցելու նախնական ցանկություն են արդեն հայտնել մի քանի բանկեր: Հաջորդ տարի կսկսվի գազամուղի կառուցումը»,- նշել է Ստոյնևը:
Ադրբեջանի էներգետիկայի նախարար Նատիգ Ալիևն, իր հերթին, հայտարարել է, որ Բուրղարիայի և Ադրբեջանի միջև հարաբերությունները զարգանում են ռազմավարական գործընկերության մակարդակի:
«Բուլղարիա գազի մատակարարման խնդրի իրական լուծումը մենք գտել ենք նախորդ տարի, երբ «Բուլղարգազ» ընկերության, «Շահ Դենիզ» կոնսորցիումի և Ադրբեջանի պետական նավթային ընկերության միջև ստորագրվեց 1 միլիարդ խորանարդ մետր գազի մատակարարման մասին պայմանագիր, որը ենթադրում է գազամուղի կառուցման անհրաժեշտություն»,- ասել է Նատիգ Ալիևը:
Վերջինս ընգծել է, որ «Հարավային գազային միջանցք» նախագիծը, որը գնահատվում է 50 միլիարդ դոլար, կերաշխավորի դեպի Եվրոպա գազի լրացուցիչ մատակարարում, և արդեն 2018-2019թթ.-ին այն Եվրոպային և Թուրքիային կապահովի լրացուցիչ 16 միլիարդ խորանարդ մետր գազ:
«Ներկայում Կասպից ծովից գազի մատակարարման այլ վստահելի երկարաժամկետ ուղիներ մենք չունենք»,- հավելել է Ալիևը:
Նշենք, որ Ադրբեջանում «Շահ Դենիզ 2» հանքավայրի արդյունահանմամբ զբաղվող ընկերությունների կոնսորցիումը (բրիտանական BP`25,5%, նորվեգական Statoil`25,5%, ֆրանսիական Total`10%, ռուսական ЛУКОЙЛ` 10% և ադրբեջանական SOCAR` 10%) նախորդ տարի որոշել են հրաժարվել դեպի Եվրոպա գազի մատակարարման NABUCCO նախագծից և նախապատվությունը տվեցին TAP (Տրանսադրիատիկ գազատար) նախագծին:
«Հարավային գազային միջանցք» նախագիծը կոչված է Կասպից ծովից գազ մատակարարել Եվրոպա՝ շրջանցելով Ռուսաստանին: Այդ նախագծի իրականացման հիմքում ընկած է TAP գազատարի կառուցումը: Գազի մատակարարումը դեպի Եվրոպա նախատեսվում է իրականացնել հետևյալ աշխարհագրությամբ. Կասպից ծովից գազը կմատակարարվի Թուրքիայի տարածքով՝ TANAP գազատարով (կառուցումը նախատեսված է ավարտել 2018թ.-ին) մինչև Եվրոպայի սահման, ապա 800կմ-ոց TAP գազատարով կմատակարարվի Եվրոպա: TAP գազատարը ձգվում է հունա-թուրքական սահմանի հյուսիսով, անցնում է Ալբանիան և Ադրիադիկ ծովով դեպի Իտալիա, որտեղ էլ ինտեգրվելու է գոյություն ունեցող բաշխիչ համակարգում: Ծրագրվում է TAP գազատարը շահագործել 2019թ.-ից:
Նշվում է, որ TAP գազատարը կարող է ապահովել տարեկան մինչև 20 միլիարդ խորանարդ մետր գազի մատակարարում դեպի Եվրոպա, ինչը կարող է բավարերել Եվրամիության ընդհանուր պահանջարկի առավելագունը 5%-ը: Ռուսաստանը ներկայում ապահովում է ԵՄ պահանջարկի մոտ 40%-ը: «Եվրոստատի» տվյալներով՝ ներկայում Բուլղարիայի գազի ողջ պահանջարկը՝ 100%-ը ապահովվում է ռուսական գազի ներկրումներով:
Նախորդող՝
Ռուսաստանը, Ուկրաինան ու Եվրամիությունը կանգնած են նոր գազային պատերազմի շեմին
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները