Ձեր վստահելի աղբյուրը

ՀՀ նախագահ Սերժ Սարգսյանը Լոռու մարզ կատարած աշխատանքային այցի շրջանակներում այցելեց Թեղուտի հանքավայր:

Երկրի ղեկավարը շրջեց հանքավայրի տարածքում, այցելեց հանքավայրի հանքահարստացուցիչ ֆաբրիկայի մանրացման արտադրամաս:

Ս.Սարգսյանը ընկերության վարչական համալիրում ներկա գտնվեց նաև Թեղուտի լեռնահարստացուցիչ կոմբինատի շինարարության և պղինձ-մոլիբդենային հանքավայրի շահագործման ծրագրի շնորհանդեսին:

Լրագրողներին ներկայացնելով Թեղուտի հանքահարստացուցիչ ֆաբրիկայում իրականացված աշխատանքները` «Վալլեքս» խմբի ընկերությունների նախագահ Վալերի Մեջլումյանը նշեց, որ 2007թ-ի նոյեմբերի սկզբին իրենք սկսեցին շինարարական ակտիվ աշխատանքները և հույս հայտնեց, որ մինչև տարեվերջ կսկսեն արտադրությունը:

«300 մլն դոլարից ավել գումար է ծախսվել մինչ օրս: Այսօրվա դրությամբ 1200 հոգի է աշխատում, բացի այդ, ունենք արտասահմանից ժամանած աշխատողներ»,-նշեց Վ.Մեջլումյանը:

Նրա խոսքերով, երկու տարվա ընթացքում առաջինը Հայաստանում իրենք կստանան միջազգային էկոլոգիական սերտիֆիկատ, որը նշանակում է, որ իրենք արել ենք ամեն ինչ, որպեսզի բնությանը հասցված վնասը լինի ամենաչնչինը:

Վ.Մեջլումյանը, անդրադառնալով Թեղուտի հանքավայրի շահագործման հետ կապված բնապահպանների բարձրացրած հարցերին, նշեց, որ իրենք միշտ կապի մեջ են թե հարակից համայնքների ապրողների հետ, թե երիտասարդ բնապահպանների հետ, որոնք ունեն ոչ ճշգրիտ պատկերացում, թե ինչպիսի վիճակում է գտնվում Հայաստանը, որն է ճիշտ ուղին տնտեսության զարգացման համար:

«Մենք աշխատում են բոլորի հետ կապ պահել և ունենալ բաց քաղաքականություն:
Իսկ տարածքի բնակիչները վերջին տարիներին դիրքորոշումը դեպի լավն է գնում, հասկացել են, որ մեր ցանկությունն է ունենալ այստեղ հնարավորին չափով արտադրոթյուն և հրավիրել աշխատանքի հենց տեղում ապրող մարդկանց»,-նշեց Վ.Մեջլումյանը:

Նրա խոսքերով, ինքը ծնունդով այդ շրջանից է, նրա հարազատ Ծաղկաշատ գյուղը 20 կմ հեռավորության վրա է Թեղուտից:

«Ես հավատում եմ, որ եթե մենք լինենք իսկապես շատ պինդ մեր որոշումներում, ապա կարող է ստացվել այնպես, որ բացի լեռնային հանքարդյունաբերությունից այստեղ կունենանք նաև հանգստյան գոտի և փիրուզի զարդարանքների արտադրության գոտի»,-հավելեց Վ.Մեջլումյանը:

Պաշարների մեծությամբ Թեղուտի պղինձ-մոլիբդենային հանքավայրը ՀՀ-ում երկրորդն է՝Քաջարանի հանքավայրից հետո:Ծրագրի առաջին փուլում նախատեվում է տարեկան 7 միլիոն տոննա հանքաքարի արդյունահանում և վերամշակում:
Կիրառվող տեխնոլոգիան ապահովում է պղնձի կորզումը խտանյութ՝83%-ով, իսկ մոլիբդենի կորզումը՝67%-ով: