Ձեր վստահելի աղբյուրը

Այսօր Ակբա–Կրեդիտ Ագրիկոլ բանկը Երևանի կենտրոնում նոր մասնաճյուղ բացեց: Թվով 55-րդ՝ «Սայաթ-Նովա» մասնաճյուղը գտնվում է Սայաթ-Նովա պողոտայի 8-րդ շենքի 21/1 հասցեում:

Մասնաճյուղի պաշտոնական բացմանը ներկա էին ՀՀ Կենտրոնական բանկի նախագահ Արթուր Ջավադյանը, բանկի գլխավոր գործադիր տնօրեն Հակոբ Անդրեասյանը:

Ինչպես լրագրողների հետ զրույցում նշեց Ակբա–Կրեդիտ Ագրիկոլ բանկի գլխավոր գործադիր տնօրեն Հակոբ Անդրեասյանը, այս մասնաճյուղի բացումը իրենց համար կարևոր նշանակություն ունի, քանի որ այսօր բանկի հիմնադիր տնօրեն Ստեփան Գիշյանի ծննդյան օրն է, և այս ձևով փորձում են հարգանքի տուրք մատուցել նրա հիշատակին:

«Մենք մեր հարգանքի տուրքն են մատուցում մի մարդու, ով լուրջ ներդրում է ունեցել ՀՀ տնտեսության ոլորտում՝ իր մասնագիտական բարձր կարողությունները ի նպաստ դնելով բանկային ոլորտի կայացման, ինչպես նաև գյուղատնտեսության ոլորտի զարգացման գործում»,- ասաց Հակոբ Անդրեասյանը:

Նա տեղեկացրեց, որ այս տարի նախատեսում են բացել այլ մասնաճյուղեր: Մասնավորապես, նախատեսվում է առաջիկայում բացել «Տերյան» մասնաճյուղը, որտեղ արդեն հարդարման վերջին աշխատանքներն են իրականացվում: «Մեր հիմնական նպատակն է լինել ազգաբնակչությանը մոտ գնտվող բանկ, որպեսզի մարդիկ բանկում գործարքներ կատարելու համար այցելեն իրենց բնակավայրերին մոտ մասնաճյուղեր՝ խնայելով իրենց ժամանակը»,- նշեց Հակոբ Անդրեասյանը՝ հավելելով, որ այս տարի Երևանում 1-2 մասնաճյուղեր կբացեն, իսկ մարզերում, մասնավորապես, խոշոր քաղաքներում, կբացեն բանկի երկրորդ կամ երրորդ մասնաճյուղը:

Բանկի գլխավոր գործադիր տնօրենն ասաց, որ «Սայաթ-Նովա» մասնաճյուղում առաջարկելու են բանկում գործող ծառայություններն իրենց ամբողջ ծավալով, սակայն այն հիմնականում լինելու է որպես փոքր և միջին ձեռնարկությունների սպասարկման կենտրոն:

Փորձել ենք բոլոր պայմանները ստեղծել, որպեսզի բանկի հաճախորդների համար բանկային ծառայություններից օգտվելու գործընթացը ավելի հաճելի և հեշտ լինի: Անձնակազմի անդամները վերապատրաստվել են, աշխատելու է պրոֆեսիոնալ թիմ, որը կկարողանա ընդունել, քննարկել ՓՄՁ-ների զարգացմանը վերաբերող բոլոր ծրագրերը»,- ընդգծեց բանկի գլխավոր գործադիր տնօրենը:
Նա նաև հայտնեց, որ բանկում հիմնականում աշխատելու են երիտասարդներ և այս քաղաքականությունը շարունակական բնույթ է կրելու, որպեսզի երիտասարդ մասնագետներին ապահովեն համապատասխան աշխատանքով:

«ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ» ՓԲԸ-ն ստեղծվել է 1995թ.-ին՝ Եվրամիության «TACIS» ծրագրի շրջանակներում: Որպես բանկի ստեղծման մոդել` ընտրվել է ֆրանսիական «Կրեդի Ագրիկոլ» բանկի մոդելը: 2003 թվականին «Կրեդի Ագրիկոլ» բանկային խմբի կողմից իրականացվող խորհրդատվական և տեխնիկական աջակցությունը վերածվել է գործընկերային համագործակցության, ինչի հետևանքով էլ հիմնադրվեց Հայաստանում առաջին լիզինգային ընկերությունը՝ «Ագբա Լիզինգ» վարկային կազմակերպությունը:  «ԱԿԲԱ-ԿՐԵԴԻՏ ԱԳՐԻԿՈԼ ԲԱՆԿ»-ի գործունեության վերջին 10 տարիների ընթացքում բանկի մասնաճյուղերի թիվը բազմապատկվել է 6 անգամ, մասնաճյուղերի թիվը հասել է 55-ի: Բանկն ունի 1160 աշխատակից այն պարագայում, երբ 1995 թվականին աշխատակիցների թիվը կազմել է ընդամենը 12: