«Բա որ էստեղ նստածներից մեկը վերցնի ու Պուտինին նամակ գրի». Բագրատյան (տեսանյութ)
ԱԺ-ում առաջին ընթերցմամբ քննարկվում է կառավարության կողմից ներկայացված «Եկամտային հարկի» մասին և «Շահութահարկի մասին» ՀՀ օրենքներում փոփոխություններ և լրացումներ կատարելու մասին նախագիծը:
Ըստ այդ նախագծի՝ արտագնա աշխատանքի մեկնողները, ովքեր շինարարության հետ կապված աշխատանքներ իրականացնելու նպատակ ունեն, պետք է պայմանագիր կնքեն Հայաստանում գործող որևէ համապատասխան կազմակերպության հետ և հետագայում 13 տոկոս եկամտահարկը և 5 տոկոս շահութահարկը վճարեն ՀՀ պետբյուջե, այլ ոչ թե տվյալ երկրի բյուջե:
Այս նախագիծը հարուցել է մի շարք պատգամավորների վրդովվմունքը: ՀԱԿ խմբակցության պատգամավոր Հրանտ Բագրատյանը նշեց, որ ԱԺ-ում քննարկվում է լրջագույն օրենք՝ թեթևամիտ ձևով:
«Հազար ներողություն էս բառի համար: Էսպիսի օրենքներն էսպես ափալ-թափալ չեն բերվում: Առաջինը ուզում եմ հարցնել՝ Ռուսաստանին հարցրե՞լ եք, որ նման օրենք եք ընդունում, էսպե՞ս ենք մեր գործընկերային պարտականությունները կատարում, բա որ էստեղ նստածներից մեկը վերցնի ու Պուտինին նամակ գրի»,- ասաց Հ.Բագրատյանը և հավելեց. «Ես հոգնել եմ արտասահմանյան հայ օլիգարխներից, դրանք էս պետությունը մի օր կքանդեն, արդեն մենք լրիվ քանդում ենք հարկային դաշտը, առաջին անգամ եմ տեսնում, որ ուղղակի հարկերը՝ շահութահարկ, եկամտահարկ դիֆերենցեն ըստ աշխատանքների, սովորաբար նման դիֆերենցման կարելի է ենթարկել անուղղակի հարկերը»:
Պատգամավորի խոսքերով՝ նման քայլի սովորաբար գնում են սահմանափակ ժամանակահատվածի համար և այստեղ, ըստ նրա, իրեն պետք չէ հակառակում համոզել. «Ա՛յ ախպեր, ես ստեղ եմ աշխատում, պիտի 24 տոկոս եկամտահարկ տամ, գնամ Ռուսաստան աշխատեմ՝ 13: Ի՞նչ եք ասում, ասում եք՝ արտագաղթի՞: Հոգնե՞լ եք մեզանից: Ես սենց բան առաջին անգամ եմ տեսնում: Պարո՛ն Սահակյան, ոնց կարող ա նման օրինագիծ մտնի Ազգային ժողով, մենք, ինչ է, դարձել ենք մաֆիոզ Ազգային ժողո՞վ: Ո՞նց կարելի է սենց բան թույլ տալ»:
ՀՀ ֆինանսների փոխանախարար Վախթանգ Միրումյանը պատասխանելով պատգամավորի հարցերին, նշեց, որ ճիշտ է՝ միևնույն չափի եկամուտը նույն դրույքաչափով պետք է հարկվի, սա աքսիոմա է, որը չի էլ փորձում վիճարկել. «Բայց կարծում եմ, որ մեր առջև ծառացած կոնկրետ խնդիր ենք կարգավորում, և այն օգուտները, որ կստանանք խնդիրների կարգավորումից ավելի են, քան հարկման հորիզոնական կամ ուղղահայաց արդարության սկզբունքը»:
Նա նաև հավաստիացրեց, որ ՌԴ-ի հետ որևէ խնդիր չունեն, քանի որ ԵՏՄ-ին անդամակցող յուրաքանչյուր պետություն ինքն է որոշում հարկման դրույքաչափերը և որևէ սահմանափակում չկա այս հարցում: «Այս նախագծով մենք չենք նպաստում արտագաղթին, բայց գիտակցում ենք, որ այսօր իրականությունը այն է, որ մեր քաղաքացիների զգալի մասն իրենց աշխատանքը կատարում է դրսում: Եթե այսօր դա է իրականությունը, ապա մենք դաշտ ենք ստեղծում, որպեսզի նրանց աշխատանքը օրինական ձևակերպում ստանա Հայաստանում և արտերկրում նրանց աշխատանքի օգուտներից օգտվի նաև Հայաստանը»,- ասաց Վ.Միրումյանը:
«Թողեք արձանագրեմ, որ ասում եք ճիշտ եք, բայց… Ձեր բայցը սպանում է արդեն ու բայցից հետո որևէ պատասխան չլսեցի ձեզանից: Էն մարդը, ով գնացել է Նովոսիբիրսկում աշխատելու, ուրեմն էնտեղ էլ պետք է հարկ մուծի: Դա է ԵՏՄ-ի տրամաբանությունը, որին ի դեպ կողմ չեմ քվեարկել: Ի՞նչ է նշանակում Հայաստանն ուզում է օգուտ ունենա: Օգուտ եք ուզում ունենալ, այնպես արեք, որ մարդիկ չարտագաղթեն: Հիմա էլ ասում եք ՝չէ, օրենքներ ստեղծենք, որ մարդիկ արտագաղթեն, հետո արտագաղթողներից փող ստանանք: Ես չեմ կարող ձեր բացատրությունները նույնիսկ տրամաբանությանը հարիր համարել»,- ասաց Հրանտ Բագրատյանը: