Մի օրում, մի տարում հնարավոր չէ հազարավոր ձեռնարկությունների հետևից գնալ և ստուգումներ անել. Ֆինանսների նախարար
Այսօր Ազգային ժողովում լրագրողները ՀՀ ֆինանսների նախարար Գագիկ Խաչատրյանից հետաքրքրվեցին, թե վարչապետ Հովիկ Աբրահամյանը դեռ մեկ տարի առաջ հայտարարել էր, որ իրենք ամեն ինչ անելու են ստվերի դեմ պայքարելու և բոլորին հարկային դաշտ բերելու համար, այսօր որքանո՞վ է հաջողվել ստվերի դեմ պայքարել և ինչ արդյունքներ կան:
«Դուք աշխարհում մի պետություն գիտե՞ք, որտեղ մեկ տարում, երկու տարում նման հնարավորություն են ստեղծել: Ամենակարևորը մենք պետք է ընկալենք, որ կառավարությունը խնդիր է ձևակերպում»,- ասաց Գ.Խաչատրյանը:
Նրա խոսքերով՝ ունեն 350 միլիարդի հարկային վնասներ ներկայացրած ընկերություններ, որն իջացրել են 150 միլիարդով:
«Հիմա դա լավ է, թե վատ է: Հիմա, որ դուք գաք, ուսումնասիրեք, կհասկանաք, որ մի օրում, մի տարում հնարավոր չէ հազարավոր ձեռնարկությունների հետևից գնալ և ստուգումներ անել»,- ասաց Գ.Խաչատրյանը:
Լրագրողներից մեկը հետաքրքրվեց, թե Սամվել Ալեքսանյանին և Ալեքսանդր Սարգսյանին որքանո՞վ է հնարավոր եղել հարկային դաշտ բերել, Գ.Խաչատրյանն ասաց, որ միայն հսկիչ դրամարկղային խախտումների արդյունքում Սամվել Ալեքսանյանի ընկերությունները տուգանվել և նրանցից գանձվել է 250 միլիոն դրամ:
«Հարկային վարչարարությունն անընդհատ ամենօրյա պրոցես է, ոչ թե պետք է սպասես, որ մարդը խախտում անի, հետո գնաս քսան միլիարդի ակտ գրես, ինքն էլ չկարողանա վճարի»,- նշեց ֆինանսների նախարարը:
Ինչ վերաբերում է Ալեքսանդր Սարգսյանին, Գ.Խաչատրյանն ասաց. «Որ ասեք ինչ բիզնես ունի, ես կասեմ…չունի բիզնես»: