Ձեր վստահելի աղբյուրը

«Եթե փոքր ու միջին ձեռնարկությունները էլեկտրաէներգիայի թանկացման դիմաց ևս խոշորի օրինակով չսուբսիդավորվեն կառավարության կողմից, ապա փոքր բիզնեսը կանգնելու է փակվելու վտանգի առաջ»,- այս մասին Panorama.am-ի թղթակցի հետ զրույցում ասաց Հայաստանի գործատուների միության նախագահ Գագիկ Մակարյանը:

Հիշեցնենք, որ Կառավարության օգոստոսի 13-ի նիստում ՀՀ վարչապետ Հովիկ Աբրահամյանը հայտարարեց` կառավարությունը չի պատրաստվում իր վրա վերցնել էլեկտրաէներգիայի սակագնի տարբերությունը խոշոր բիզնեսի համար: Մինչ ՀԷՑ-ում ընթացող աուդիտի ավարտը կառավարությունը ստանձնել է սակագնի տարբերությունն ազգաբնակչության համար: Հովիկ Աբրահամյանը նաև հայտարարեց, որ ՓՄՁ-ների հարցը պետք է քննարկի Նախագահի հետ:

Նշենք, որ ՓՄՁ բազմաթիվ ներկայացուցիչները պարզել են, որ նախկին 41.85 դրամի փոխարեն օգոստոսի 1-ից էլեկտրաէներգիայի 1 կվտ/ժամի համար պետք է վճարեն 48.78 դրամ:

Գագիկ Մակարյանը կարծում է, որ այս որոշումը բացասական ազդեցություն կթողնի ՓՄՁ-ների վրա: Ըստ նրա՝ մեկ տարվա ընթացքում թանկացած գազի, էլեկետրաէներգիայի գները առաջին հերթին ազդում են փոքր և միջին բիզնեսի վրա. «Թանկացումները բիզնեսի եկամտաբերությունը նվազեցնում են, հետևաբար՝ բիզնեսը կկորցնի իր վճարունակությունը»:

Այս ամենին զուգահեռ, Գ.Մակարյանը գտնում է, որ ՓՄՁ-ները ապրանքները գրեթե չեն թանկացնի. «Առանց այն էլ ազգաբնակչությունն անվճարունակ է, էլ ուր թանկացնեն: Կարծում եմ՝ փոքր և միջին ձեռնարկությունները լուռ ու մունջ ցավը իրենց մեջ կրելով, աստճանաբար վճարունակությունը կկորցնեն, ինչ էլ իր հերթին կբերի ՓՄՁ-ների փակմանը: Մեկ կամ երկու տարի հետո մենք կտեսնեք, որ մեծ թվով ընկերություններ այլևս չեն գործում»:

Տնտեսագետի խոսքերով՝ Հայաստանում ինստիտուցիոնալ բարեփոխումներ են հարկավոր, հակառակ դեպքում, երկիրը տնտեսական լուրջ խնդիրների առաջ կկանգնի:

Գ.Մակարյանը նաև տեղեկացրեց, որ անցկացված հարցումների համաձայն՝ Հայաստանում 45%-ը պետության քաղաքականությունը ՓՄՁ-ների նկատմամբ անբավարար է գնահատել: Հարցվածների 53%-ը նշել է, որ առևտրի ոլորտում տեղի է ունեցել անկում, 81%-ը իրենց վիճակը համարել է անբավարար, ինչը նշանակում է, որ նրանք գնում են դեպի փակման:

«ՓՄՁ քաղաքականությունը 180 աստիճանի բարելավման կարիք ունի»,-ասաց նա՝ հավելելով, որ այս հարցման արդյունքները մեկ անգամ ևս հաստատում են՝ բիզնեսը չի կարող նման միջավայրում գոյատևել:

Ըստ նրա՝ պետք է առողջ միջավայր լինի, որ բիզնեսը զարգանա: Գ.Մակարյանը կարծում է, որ եթե այս քաղաքականությունը շարունակվի, ապա ավելի շատ ՓՄՁ-ներ կփակվեն: Նրա խոսքերով՝ եթե 1-1,5 տարվա ընթացքում փակվել է 18 հազար փոքր և միջին ձեռնարկություն, ապա այս տեմպերով շարունակելու դեպքում՝ երկու-երեք տարի հետո ՓՄՁ-ների 50 տոկոսը կփակվեն:

Գ.Մակարյանը նաև արդարացի չի համարում այն, որ մինչև ՀԷՑ-ում աուդիտի ավարտը, կառավարությունն իր վրա է վերցրել օգոստոսի 1-ից թանկացած էլեկտրաէներգիայի սուբսիդավորումը, քանի որ, ըստ նրա, ավելի հրատապ ծրագրեր կան, որոնք կարելի էր սուբսիդավորել: Մասնավորապես, Գ.Մակարյանը, առաջարկում է այդ գումարները ծախսել երկրաշարժից անօթևան մնացած ընտանիքներին բնակարաններով ապահովելու համար:

«Այսօր Գյումրիում արդեն երկրորդ սերունդն ապրում է տնակներում: Ավելի լավ է՝ այդ 4 հազար ընտանիքներին բնակարաններ տրամադրեին: Դա ավելի բարոյական է, քան էլեկտրաէներգիայի սակագնի սուբսիդավորումը»,- ասաց նա:

Գ.Մակարյանի հաշվարկներով՝ պետության կողմից 7 դրամ սուբսիդավորման ընդհանուր գումարը երեք ամսում կազմելու 11 մլն դոլար, իսկ այդ գումարով հնարավոր էր շենքեր կառուցել և մարդկանց բնակարաններով ապահովել: