Ձեր վստահելի աղբյուրը

2015 թվականի հուլիսին հանրապետությունում անշարժ գույքի նկատմամբ իրականացվել է 16277 գործարք, որոնց քանակը 2015 թվականի հունիս ամսվա համեմատ աճել է 1.0 %-ով, իսկ 2014 թվականի հուլիսի համեմատ՝ նվազել 16.6 %-ով:

Ինչպես տեղեկանում ենք ՀՀ կառավարությանն առընթեր անշարժ գույքի կադաստրի պետական կոմիտեից, 2015 թվականի հուլիսին անշարժ գույքի նկատմամբ իրականացված գործարքներն, ըստ տեսակների, ունեն հետևյալ բաշխվածությունը. 2015 թվականի հուլիսին անշարժ գույքի նկատմամբ իրականացված 4611 օտարման գործարքի 73.4 %-ը կազմել է առուվաճառքը, 25.9 %-ը` նվիրատվությունը և 0.7 %-ը` փոխանակությունը: Անշարժ գույքի օտարման գործարքի քանակի 40.1 %-ն արձանագրվել է Երևան քաղաքում, իսկ օտարված անշարժ գույքի 39.8 %-ը հանդիսանում են բազմաբնակարան բնակելի շենքերի բնակարանները:

Ըստ Կադաստրի պետական կոմիտեի՝ 2015 թվականի հուլիսին, 2015 թվականի հունիսի համեմատ, անշարժ գույքի օտարման գործարքներն աճել են 8.2 %-ով, իսկ 2014 թվականի հուլիսի համեմատ՝ նվազել 4.7 %-ով:

2015 թվականի հուլիսին Երևան քաղաքում անշարժ գույքի առուվաճառքի գործարքների 65.9 %-ն արձանագրվել է բազմաբնակարան բնակելի շենքերի բնակարանների նկատմամբ: Երևան քաղաքում 2015 թվականի հուլիսին, 2015 թվականի հունիսի համեմատ, բազմաբնակարան բնակելի շենքերի բնակարանների առուվաճառքի գործարքների քանակն աճել է 20.6 %-ով, իսկ 2014 թվականի հուլիսի համեմատ՝ նվազել 11.6 %-ով:

Ինչ վերաբերում է գներին, ապա գնային ինդեքսների ուսումնասիրությունը թույլ է տալիս եզրակացնել, որ 2015 թվականի հուլիսին Երևան քաղաքում բազմաբնակարան բնակելի շենքերի բնակարանների, 1 քմ մակերեսի հաշվարկով, շուկայական միջին գները 2015 թվականի հունիսի համեմատ աճել են 0.02%-ով:

2015 թվականի հուլիսին մարզերում վաճառվել է բազմաբնակարան բնակելի շենքերի 352 բնակարան, որոնց քանակը, 2015 թվականի հունիսի համեմատ, աճել է 3.5 %-ով, իսկ 2014 թվականի հուլիսի համեմատ՝ նվազել 11.8 %-ով: Գնային ինդեքսների ուսումնասիրությունը թույլ է տալիս եզրակացնել, որ 2015 թվականի հուլիսին հանրապետության քաղաքներում, բացառությամբ Երևանը, բազմաբնակարան բնակելի շենքերի բնակարանների, 1 քմ մակերեսի հաշվարկով, շուկայական միջին գները 2015 թվականի հունիսի համեմատ աճել են 0.1%-ով: