«Թունաքիմիկատների գերեզմանոցի վիճակը բարդ է, խնդիրը միայն սողանքը չէ…»
«Հայ կանայք հանուն առողջության և առողջ միջավայրի» հասարակական կազմակերպության գործադիր տնօրեն Լիլիկ Սիմոնյանն այսօրվա ասուլիսում նշեց, որ Չեխական «Արմինկա» թունանյութերի և թափոնների ծրագրի տնօրեն Յինդրիխ Փեթրլիկի ու չեխական կազմակերպության փորձագետների հետ մեկ շաբաթ առաջ այցելել են Ողջաբերդ ու Գեղադիր գյուղերի միջև տեղակայված ժամկետանց թունաքիմիկատների գերեզմանոց, որը տարիներ շարունակ լուրջ սպառնալիք է հանդիսանում շրջակա միջաբայրի ու մարդկանց առողջության համար:
Թունաքիմիկատների գերեզմանոցի այցելությունն իրականացվել է երկրների միջև համագործակցության և «Հայաստանի գյուղական համայնքներում աղքատության կրճատմանը նպաստելու նպատակով քիմիական անվտանգության բարելավման ոլորտում ձեռք բերված փորձի տարածում» խորագրով նախօրեին մեկնարկած ծրագրի շրջանակներում:
«Թունաքիմիկատների գերեզմանոցը ժամանակին կառուցվել է հանրապետության տարբեր շրջանների պահեստներում հավաքված թունաքիմիկատների համար` որպես ժամանակավոր կացարան:
Մոտավորապես 500 տոննայից ավելի թունաքիմիկատներ թաղվել են այդ գերեզմանոցում: Բանը նրանում է, որ գերեզմանոցը գտնվում է սողանքային գոտում ու ծանրությունից թույները քայքայվել են, իջել. գերեզմանոցը սահում էր»,-ասաց Լ. Սիմոնյանը:
Ըստ նրա, 1982 թվականից մինչ օրս մոտ 12.5 մ գերեզմանոցը ներքև է իջել: Այդ մասին տեղեկացնելով կառավարությանը, կազմակերպությունը հասել է նրան, որ սողանքային գոտում ջրատար խողովակներ են դրվել, որ ջրի հոսքը գերեզմանոցի խորքը չգնա, տարածքը ցանկապատվել է, իսկ ճահիճը` վերացվել: Սակայն 2 տարի հետո սողանքների պատճառով ցանկապատը նույնպես քանդվել է:
6 ամիս առաջ, ըստ նրա, թունաքիմիկատների գերեզմանոցը քանդել են և մի քանի պարկ ու մի քանի շիշ թունանյութեր հանվել են: «Թե ի՞նչ էին տարել, ի՞նչ չէին տարել, չենք կարող ասել, տեսել ենք այն` ինչ կար»,-ասաց ՀԿ գործադիր տնօրենը:
Նա նշեց, որ այդ մասին բանավոր դիմել են կառավարությանը, ապա Արտակարգ իրավիճակների նախարարությանը, քանի որ այդ մարմինն է զբաղվում գերեզմանոցի հսկողութամբ:
Նախարարությունը, ըստ նրա, թունաքիմիկատները կրկին թաղել է:
«Իսկ այժմ, երբ գնացինք գերզմանոց, տեսանք, որ թումբը լրիվ հավասարեցված էր հողին, մեխանիզմներ, բուլդոզերներ էին մտել, բացի այդ թունաքիմիկատների տարբեր տեսակներ խառնված էին իրար: Ովքե՞ր էին արել, ի՞նչ նպատարով, բա՞ն էին տարել այնտեղից, թե՞ ոչ, չենք կարող ասել, բայց փաստը այն է, որ թունանյութերի մի մասը գետնի երեսին էին գտնվում»,-ներկայացրեց Լ. Սիմոնյանը:
Պարզվում է` դեպքի մասին տեղյակ են եղել նաև արտակարգ իրավիճակների նախարարությունում, վերջիններս իրենց հերթին դիմել են կառավարություն, ու այժմ հետաքննություն է իրականացվում:
Վերջում ՀԿ գործադիր տնօրենը նշեց, որ բանավոր դիմումից հետո, նրանք պատրաստվում են գրավոր դիմումով խնդիրը ներկանացնել կառավարություն, քանի որ անձրևները կողողեն թունաքմինիկատներն ու թունաքիմիկատներով անձրևաջուրը կհոսի ներքև, իսկ ներքևում ամառանոցային ավան ու գյուղեր են տեղակայված: Վերջին հաշվով, թունաքիմիկատներով ողողված այդ ջրերը թափվում են Գետառ ու Հրազդան:
Հարակից նորություն` ԵՐԵՎԱՆԻՆ ՎՏԱՆԳ Է ՍՊԱՌՆՈՒՄ. «ԹՈՒՆԱՔԻՄԻԿԱՏՆԵՐԻ ԳԵՐԵԶՄԱՆՈՑԸ ՇԱՐԺՎՈՒՄ Է »
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին