Մահացել է ԱՆ նախկին նախարար, ակադեմիկոս Էմիլ Գաբրիելյանը
Կարճատև, ծանր հիվանդությունից հետո նախօրեին Ամերիկայի Միացյալ Նահանգներում վախճանվել է Հայաստանի Հանրապետության հանրային խորհրդի փոխնախագահ, ՀՀ գիտությունների ազգային ակադեմիայի նախկին փոխնախագահ, միջազգային բազմաթիվ ակադեմիաների անդամ, ազգային և միջազգային բարձր պարգևների արժանացած, առողջապահության նախարարության «Դեղերի և բժշկական տեխնոլոգիաների փորձագիտական կենտրոնի» տնօրեն, ակադեմիկոս Էմիլ Գաբրիելյանը:
Առողջապահության նախարարության տվյալների համաձայն` Է. Գաբրիելյանն աշխատանքային գործունեության ընթացքում զբաղեցրել է բազմաթիվ պատասխանատու պաշտոններ` Արթիկի շրջանի բուժմիավորման գլխավոր բժիշկ, Երևանի պետական բժշկական ինստիտուտի ռեկտոր, դեղաբանության ամբիոնի վարիչ, Գիտությունների ազգային ակադեմիայի փոխնախագահ, առողջապահության նախարար:
1992 թվականին նրա ջանքերով ստեղծվել է առողջապահության նախարարությանն առընթեր Դեղերի և բժշկական տեխնոլոգիաների գործակալությունը:
Ակադեմիկոս Է. Գաբրիելյանը մեծ ճանաչում է ունեցել հանրապետությունում և նրա սահմաններից դուրս: Նա մի շարք ակադեմիաների և գիտական խորհուրդների անդամ էր (Անոթաբանների միջազգային քոլեջի գիտական խորհրդի անդամ, «Արարատ» գիտությունների միջազգային ակադեմիայի անդամ, Նյու-Յորքի գիտությունների ակադեմիայի անդամ, Գիտությունների միջազգային ակադեմիայի ակադեմիկոս, Ինֆորմատիզացիայի միջազգային ակադեմիայի ակադեմիկոս, Ֆրանսիայի դեղագիտական ազգային ակադեմիայի թղթակից անդամ, Ռուսաստանի բնական և բժշկատեխնիկական գիտությունների ակադեմիաների իսկական անդամ և այլն):
1996-1998թթ. եղել է Առողջապահության համաշխարհային կազմակերպության Հիմնական դեղերի ծրագրի ղեկավար կոմիտեի անդամ:
Շուրջ 15 տարի Է. Գաբրիելյանը ղեկավարել է առողջապահության նախարարությունը, և այդ տարիներին բացվել են բազմաթիվ հիվանդանոցային համալիրներ, կենտրոններ, կլինիկական ինստիտուտներ և լաբորատորիաներ, որոնցից ախտորոշիչ կենտրոնն առաջինն էր ԽՍՀՄ-ում:
Է. Գաբրիելյանի անմիջական նախաձեռնությամբ 1988-ի երկրաշարժին հաջորդած ամիսներին Երևանում հիմնադրվել է Սթրես կենտրոնը: Նա նաև ակտիվ մասնակցություն է ցուցաբերել «Արմենիկում» հրատապ ծրագրին:
Մեծանուն գիտնականի ղեկավարած դեղերի և բժշկական տեխնոլոգիաների փորձագիտական կենտրոնը նրա շնորհիվ միջազգային ճանաչման է արժանացել, ստացել բազմաթիվ մրցանակներ, և Առողջապահության համաշխարհային կազմակերպության կողմից գնահատվել լավագույներից մեկը ԱՊՀ-ում:
Նշենք, որ Է. Գաբրիելյանը հեղինակ է 420-ից ավելի գիտական հրատարակությունների, այդ թվում 17 գրքի (մենագրություններ և դասագրքեր), ունի 10 հեղինակային վկայագիր: Լինելով դեղաբանների ընկերության նախագահ` ակադեմիկոս Գաբրիելյանը նաև «Առողջապահություն», ԳԱԱ «Փորձարարական և կլինիկական բժշկություն» խմբագրական կոլեգիաների, Ռուսաստանի Բժշկական գիտությունների ակադեմիայի «Փորձարարական և կլինիկական դեղաբանություն» ամսագրի խմբագրական խորհրդի և մի շարք այլ ամսագրերի խմբագրական կոլեգիաների և խորհուրդների անդամ էր:
Աշխատանքների արդյունքների և մատուցած ծառայությունների համար նա արժանացել է մի շարք մրցանակների, կոչումների, պարգևների, այդ թվում Ասպետների համաշխարհային կոնֆեդերացիայի «Մարդասիրության ասպետ» ազնվական տիտղոսի, ԽՍՀՄ Կարմիր խաչի «Պիրոգովի անվան» մեդալի, «Սեչենովի անվան», «Կրակովի անվան» մեդալների, «Ոսկե սկավառակ»-ի(ԱՄՆ) և «Պլատինե սկավառակ»-ի(Մեծ Բրիտանիա)` գիտական բացառիկ նվաճումների համար, Տոկիոյի Կիտազատո համալսարանի ոսկե մեծ մեդալի, «Չիժևսկու անվան» ոսկե մեդալի, ԽՍՀՄ բժշկական գիտությունների ակադեմիայի մեդալների, Միջազգային դեսպանի շքանշանի, UNESCO-ի «Կալինգա» մրցանակին: Գիտության բնագավառում մատուցված ծառայությունների համար Գաբրիելյանը ստացել է «Վ.Վերնադսկու անվան ոսկե աստղ» բարձրագույն շքանշանը: Հայաստանի Հանրապետության նախագահը 2000թ. Է. Գաբրիելյանին շնորհել է Մխիթար Հերացու մեդալ, իսկ 2008թ. Ամենայն Հայոց Կաթողիկոսը «Սուրբ Մաշտոց-Սուրբ Սահակ» շքանշանը:
Ի դեպ, ակադեմիկոս Է. Գաբրիելյանի կենսագրական տվյալներն ընդգրկված են տասից ավելի միջազգային և ազգային հանրագիտարաններում: