Ինչո՞ւ էր բլոգերը պատգամավորին պատկերացրել կիսամերկ մանեկենուհու կերպարով. Ուրիխանյանը դատի է տվել «alkhimik»-ին

15:17 25/12/2012 » Իրավունք

Ինչո՞ւ էր բլոգերը պատգամավորին պատկերացրել կիսամերկ մանեկենուհու կերպարով. Ուրիխանյանը դատի է տվել «alkhimik»-ին

Կիսամերկ մանեկենուհու մարմնով և ԱԺ պատգամավոր Տիգրան Ուրիխանյանի դիմանկարով ծաղրանկարը ֆլեշմոբի արդյունքում երեկ և այսօր տարածված է սոցիալական ցանցերի հայկական տիրույթում: Ծաղրանկարի հեղինակը «Livejournal»-ում «alkhimik» անունով հայտնի հայ բլոգեր Էդգար Բարսեղյանն է և այժմ դրա համար նա հայտնվել է դատարանում: Ազգային ժողովի «Բարգավաճ Հայաստան» խմբակցության պատգամավոր Տիգրան Ուրիխանյանը չի ճանաչում բլոգերին, չի լսել նրա մասին և այդ ծաղրանկարն անելու համար դատարանի միջոցով նրանից պահանջում է հրապարակային ներողություն ու 1 մլն դրամ:

«Չեմ ճանաչում այդ բլոգերին, պարզապես կիսահայտնի կայքերից մեկում տեսել եմ շատ անդուր և վիրավորանք հասցնող պատկեր: Ես մեծ գոհունակությամբ, ուրախությամբ ու գնահատականով եմ վերաբերվում իմ հասցեին ցանկացած քննադատության, այդ թվում շարժային-ծաղրանկարային ժանրին և երբևէ որևէ խնդիր չեմ տեսել այդ առումով»,-մեզ հետ զրույցում ասում է Ուրիխանյանը:

Նա վիրավորվել է, որովհետև ինչպես ինքն է ասում` «Որևէ մեկը իրավունք չունի որևէ այլ քաղաքացու վիրավորել: Անկախ նրանից` պատգամավո՞ր է, թե՞ ինչ-որ այլ զբաղմունքի տեր, բլոգեր է, թե կոշկագործ կամ թե գիտնական. որևէ մեկը իրավունք չունի որևէ այլ քաղաքացու վիրավորել», -նշում է պատգամավորը:

Բլոգերային համայնքը վստահ է, որ պատգամավորի այս քայլը իրենց ուղղված հարված էր, քանի որ, ինչպես բլոգեր Սամվել Մարտիրոսյանն է նշում, բլոգներում մարդիկ գրում են շատ ավելի ազատ:

«Մեկ միլիոն դրամով դատել բլոգերին, նշանակում է բլոգային գրառումների 90 տոկոսը դնել վտանգի տակ, որովհետև մարդիկ բլոգներում գրում են շատ ավելի ազատ», -ասում է բլոգեր Մարտիրոսյանը` ընդգծելով, որ եթե մարդը քաղաքական գործիչ է, պետք է պատրաստ լինի նման իրավիճակի:

Պատգամավորի պատկերացումներով, ծաղրանկարն այլ բան է: «Բազմաթիվ կայքերում կան այդպիսի ծաղրանկարներ, որոնց ես նորմալ եմ վերաբերում ու հանդուրժում եմ: Ծաղրանկարն այլ բան է կիսամերկ մանեկենուհու վրա մոնտաժված դիմապատկերը` այլ բան», ասում է պատգամավորը: Իսկ բլոգեր Մարտիրոսյանի պնդմամբ, ծաղրանկարը մեր ժամանակներում կատարելագործվել է: «Երբ մարդկանց մոտ հայտնվեց ֆոտոշոփ, նրանք ստացան ծաղրանկարը ուրիշ ոճով անելու հնարավորություն, քան դա ընդունված էր 20-րդ դարի առաջին կեսին», -ասում է բլոգերը:

Այն, որ բլոգերի դեմ դատական հայց է ներկայացվել մեկ այլ բլոգեր Տիգրան Քոչարյանը վատ նախադեպ է համարում: «Իմ կարծիքով, ծաղրանկարի համար դատի տալը քաղաքական գործչի թուլությունն է ավելի շատ: Ամեն դեպքում այդպիսի առիթով կպնել բլոգերներին, իմ կարծիքով, մեծ սխալ է», -նշում է Տիգրան Քոչարյանը: Նա զգուշացնում է` բլոգերային համերաշխությունը շատ ուժեղ է: «Բոլորս իրար հարգում, սիրում ենք և պետք է պաշտպանենք Էդգարին», -ասում է Քոչարյանը և նկատում, որ պատգամավորը կարող էր այլ ելքեր փնտրել Էդգար Բարսեղյանին խնդրելու հանել լուսանկարը համացանցից, այլ ոչ թե դատի տալ: Հետևաբար,  բլոգերը հակված է կարծել, որ Տիգրան Ուրիխանյանը դատական հայց ներկայացնելով Բարսեղյանի դեմ գումարի խնդիր է լուծում: «Չգիտեմ` գումարը շատ է, քիչ է, օրենքն այդպես է սահմանել, իսկ ես սահմանափակված եմ մեր օրենքներով», -բացատրում է պատգամավորը:

Ինչո՞ւ էր բլոգերը Ուրիխանյանին պատկերացրել կիսամերկ մանեկենուհու կերպարով

Այս հարցին բլոգերն անձամբ պատասխանել է իր անձնական բլոգում. Ամեն ինչ սկսվել է նրանից, որ Ուրիխանյանը շոուբիզնեսի կյանքը լուսաբանող կայքէջերից մեկի կողմից ճանաչվել է «Տարվա ամենաոճային քաղաքական գործիչ»: «Կարդալով նյութը էլ ավելի զարմացա, որ լինելով քաղաքական գործիչ, պարոն Ուրիխանյանը ոչ միայն համաձայնվել է այդ կոչումը իրեն շնորհելու հետ, այլ նաև հպարտորեն կիսվել է այդ լուրով իր ֆեյսբուքյան էջում։ Ես ոչ մի դեպքում չեմ ցանկանում վիճարկել պարոն Ուրիխանյանի ոճայնությունը. կոչումը շնորհողների մասնագիտական հմտությունները այդ հարցում հաստատ ավելի խորն են, քան իմը։ Բայց այն, որ անմիջապես պատկերացրեցի պարոն Ուրիխանյանի պաշտոնական դեֆիլեն ԱԺ նիստերի դահլիճում, փաստ է։ Փաստ է նաև, որ ոճայնության իմ ունեցած պատկերացումները միանգամից կապում են այդ բառը իգական սեռի հետ։

Այո, ես կարծում եմ, որ լուրջ տղամարդու համար, որի մասնագիտական գործունեությունը կապված չէ իր մարմնական, ֆիզիկական տեսքի հետ (օրինակ՝ մոդելի, դերասանի) ընդհանրապես սազական չէ ի ցույց աշխարհի դնել սեփական «նվաճումները» այդ ոլորտում։ Չէ, իհարկե հասկանում եմ, երբ ուրիշ ոչինչ չունես արած (խոսքը մասնագիտական գործունեության մասին է)՝ դա է մնում։ Այո, ես կարծում եմ, որ ոճայնությամբ հպարտանալը մանեկենուհիների, դերասանուհիների և այլ գեղեցկուհիների մենաշնորհն է: Հիմա փորձեք կարդալ այս տեքստը և մի պահ հարցնել ինքներդ ձեզ՝ ունե՞ի ես ուրիշ միջոց, որպեսզի այս մտքերս գրաֆիկական տեսքով պատկերեի։ Եվ եթե տեքստն ու պատկերը նույն գաղափարն են արտահայտում, ապա՝ արդյո՞ք այս տեքստն էլ է վիրավորում պարոն Ուրիխանյանին։ Եվ եթե վիրավորում է, միգուցե ես է՞լ դիմեմ դատարան, քանի որ նրա պաշտոնական կայքում տեղադրած նկարներն էլ արատավորում են իմ՝ ՀՀ քաղաքացուս պատիվը, արժանապատվությունը և գործարար համբավը։ Չէ՞ որ ես էլ կարծում եմ, որ ՀՀ պատգամավորը փոքր ինչ այլ զբաղմունք ու հպարտություն պետք է ունենա, քան «կյաժի» ու «ջիպի» հետ նկարվելն է», -գրել է բլոգեր Էդգար Բարսեղյանը։

Իսկ պատգամավորն էլ համոզված է, որ իր դեմ այս արշավն սկսվել է այն բանից հետո, երբ ինքը հայտարարում էր երկրում գոյություն ունեցող խնդիրների մասին: «Երբ ես համարձակություն ունեցա հայտարարել, որ Հայաստանում կան խնդիրներ, մարդիկ լավ չեն ապրում և այլն, սկսեցին հայտնվել իմ հասցեին վիրավորանքներ: Ես վստահ եմ, որ մեր դատական իշխանությունը կպաշտպանի իմ իրավունքները», -ասում է Ուրիխանյանը:

Դատական նախնական նիստը կայացել է երեկ, դեկտեմբերի 24-ին: Հաջորդ դատական նիստը Կենտրոն և Նորք Մարաշ վարչական շրջանների ընդհանուր իրավասության դատարանում նշանակված է արդեն նոր տարում` հունվարի 14-ին: Դատավորը Ռուբեն Ափինյանն է:

Բլոգերները դատարանից արդարացի որոշում են ակնկալում: «Ակնկալում եմ, որ ծաղրանկարների համար մարդկանց դատի չտան», -ասում է Քոչարյանը: «Եթե սկսեն բլոգերներին դատել, հայտնվելու ենք մի հետաքրքիր երկրների ցանկում, որտեղ դա դարձել է ավանդույթ», -իր հերթին նշում է Սամվել Մարտիրոսյանը:

Աղբյուր` Panorama.am

Հեղինակ` Հասմիկ Համբարձումյան

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց