Ձեր վստահելի աղբյուրը

Կրծքագեղձի քաղցկեղը պահանջում է համալիր բուժում և բազմակողմանի մոտեցում, իսկ համալիր բուժման դեպքում բավականին մեծ նշանակություն ունի ճառագայթային բուժումը: Այս մասին Panorama.am-ի թղթակցի հետ զրույցում նշեց ուռուցքաբան-ռադիոլոգ Ներսես Քարամյանը:

Նրա խոսքերով` ճառագայթային բուժումը սովորաբար կիրառվում է որպես հետվիրահատական բուժման բաղադրիչ. «Այսօր հիմնականում կատարվում են օրգանը պահպանող վիրահատություններ, այսինքն` կուրծքը պահպանվում է և ամբողջությամբ չի հեռացվում: Այստեղ մեծ դերակատարում ունի հետվիրահատական ճառագայթային բուժումը, որի նպատակն է կանխել հետագայում հիվանդության կրկնությունը»:

Ըստ մասնագետի` վերջին տարիների ընթացքում ճառագայթային բուժման մեթոդները մեծ զարգացում են ապրել, և այսօր կան մի շարք տեխնոլոգիաներ, որոնց կիրառումը հնարավորություն է տալիս քաղցկեղի բուժման առումով առավել մեծ արդյունքների հասնել:

Անդրադառնալով այս տարի Ուռուցքաբանության ազգային կենտրոնում տեղադրված գծային արագացուցչին` Ն.Քարամյանը նշեց, որ այս սարքը քաղցկեղների ճառագայթային բուժման համար նախատեսված այլ սարքերից տարբերվում է նրանով, որ ճառագայթները նպատակային ուղղվում են քաղցկեղի օջախի վրա, իսկ շրջակա հյուսվածքները չեն վնասվում, ինչի հետևանքով բուժման արդյունավետությունը բարձրանում է:

«Կարծում ենք, որ սարքի կիրառումը զգալիորեն կբարելավի հիվանդների ճառագայթային բուժման արդյունքները», - ասաց Ներսես Քարամյանը:

Հարցին, եթե Հայաստանում կիրառվում են ճառագայթային բուժման ժամանակակից մեթոդներ, այդ դեպքում ինչո՞ւ են մարդիկ բուժման նպատակով այլ երկրներ գնում, ուռուցքաբանն ասաց, որ խնդիրը կապված է իրազեկման հետ:

«Պետք է աշխատենք այնպես անել, որ մարդիկ քաջատեղյակ լինեն մեր երկրում կիրառվող տեխնոլոգիաների մասին: Իհարկե, լավ մեթոդից լավն էլ կա, ուստի մարդիկ նախընտրում են այլ երկրներում համապատասխան բուժում ստանալ»,- նշեց նա` միաժամանակ հավելելով, որ իրականում պետք է իմանալ, թե որ դեպքում է հարկավոր հիվանդին այլ երկիր տեղափոխել:

«Մեզ մոտ բոլոր տեսակի վիրահատություններ կատարվում են, սակայն լինում են դեպքեր, երբ որոշ ուռուցքների տեղակայման առումով մեր երկրում վիրահատությունը դժվար է կատարել և անհրաժեշտություն է առաջանում կիրառել այնպիսի բարդ տեխնոլոգիաներ, որոնք առայժմ Հայաստանում չկան»,- ընդգծեց Ն.Քարամյանը:

Այդուհանդերձ, ըստ նրա, նախորդ տարիների համեմատ Հայաստանում այսօր փոխվել են քաղցկեղի, ինչպես նաև ճառագայթային բուժման մեթոդները. «Ավելի գրագետ մոտեցում են ցուցաբերում ինչպես վիրաբույժները, այնպես էլ քիմիաթերապևտները: Կարելի է ասել, որ բուժման որակը մեր երկրում անհամեմատ բարձրացել է»:

Ուռուցքաբանը նկատեց նաև, որ այստեղ նաև մեծ նշանակություն ունի մարդկանց մոտեցումը: Ն.Քարամյանը գտնում է, որ վերջին տարիներին մարդիկ ավելի հետևողական և ուշադիր են իրենց առողջության նկատմամբ, ուստի շուտ դիմելու դեպքում հնարավոր է լինում ժամանակին կանխարգելել քաղցկեղը:

Ինչ վերաբերում է կրծքագեղձի քաղցկեղին, ապա ըստ մասնագետի` վերջին տարիներին ինչպես ամբողջ աշխարհում, այնպես էլ Հայաստանում աճել են կրծքագեղձի քաղցկեղի դեպքերը: Հիվանդությունը նաև երիտասարդացել է՝ դիմում են 25-30 տարեկան աղջիկներ:

«Դա կապված է նրա հետ, որ ամբողջ աշխարհում ռիսկի գործոնները շատացել են: Խոսքը վերաբերում է կենսակերպին, սնունդին, շրջակա միջավայրին, ինչպես նաև ժառանգականությանը: Եթե նախկինում հիվանդանում էին 50 տարեկանից բարձր կանայք, ապա այսօր` 25-30 տարեկանները: Սակայն դրա հետ միասին նվազել է մահացության ցուցանիշը: Դա խոսում է այն մասին, որ հիվանդության աճին զուգահեռ բարձրանում է բուժման արդյունավետությունը»,- ընդգծեց Մ.Քարամյանը:

Մասնագետի դիտարկմամբ, եթե 10-15 տարի առաջ կրծքագեղձի վիրահատությունից հետո ասում էին, որ հիվանդի կյանքը կերկարի միջինը 5 տարով, ինչը լավ արդյունքն էր համարվում, ապա այսօր` 10-15 տարով: