Ձեր վստահելի աղբյուրը

Թուրքիայի մայրաքաղաքում որոտացած պայթյուններից հետո թուրքական իշխանությունները փորձում են սլաքներն ուղղել դեպի «Իսլամական պետություն» և քրդական ուժեր, որոնք մի քանի օր առաջ հայտարարել էին հրադադարի մասին:

«Ես հավանական չեմ համարում, որ պայթյուններն իրականացվել է քրդերի կողմից: Մյուս կողմից էլ անհասկանալի է «Իսլամական պետության»`  նման քայլի դիմելու շարժառիթները, չնայած Թուրքիայում կան «Իսլամական պետության» բջիջներ, սակայն նրանց կողմից նման քայլը անտրամաբանական է թվում»,-Panorama.am-ի հետ զրույցում կարծիք հայտնեց թուրքագետ Լևոն Հովեսփյանը:

Նրա խոսքով, այս պահին բարդ է պայթյունների իրականացման մեղավորների առումով տրամաբանական տարբերականեր մատնանաշել, բայց. «Սա ուղղված էր Թուրքիայում էական իրավիճակ փոխելուն»:

Լ. Հովսեփյանը չի բացառում, որ Թուրքիայում մի քանի տասնյակ մարդու մահվան պատճառ դարձած պայթյունները կարող են ձեռնտու լինել իշխող «Արդարություն և զարգացում» կուսակցությանը: Հետևաբար, չի բացառում, որ Անկարայում պայթյունների իրականացման գործում դեր է ունեցել նաև պետությունը:

«Թե Սուրուչում, թե Անկարայում տեղի ունեցած պայթյունների ժամանակ Թուրքիայի հատուկ ծառայությունները կարծես թե չեն վերահսկում իրավիճակը: Մյուս կողմից հարց է առաջանում, թե նման խոշորամասշտաբ ահաբեկչություններն ինչպե՞ս կարող են անտեսվել թուրքական հատուկ ծառայությունների կողմից: Սա հարցեր է առաջացնում, ո՞նց է լինում, որ նման խոշոր պայթյունների ժամանակ ծառայությունները որևէ տեղեկատվություն չեն ունենում, կամ էլ ունենում են, բայց հայտարարում են, որ անվտագության մարմինները որևէ կերպ չեն կարողացել կանխել»,-ասաց նա, միաժամանակ չբացառելով, որ պայթյունները կարող են լինել նաև ազգայնամոլական ինչ-ինչ ուժերի գործը, որոնց նպատակը երկրում անկայուն վիճակ ստեղծելն է:

Թուրքագետի կանխատեսմամբ, սրանից կփորձեն օգտվել որոշ ուժեր, բայց այս պահին վաղ է համարում կանխատեսումներ անել. «Այս պրոցեսները կարող են ԱԶԿ-ի համար հիմք հանդիսանալ երկրում պարեկային ժամ, ռազմական դրություն մտցնելու համար, և ընտրություններն անցկացնեն այս պայմաններում: Այստեղ պետք է տրամաբանական հարց տան՝ արդյոք նման պայմաններում ընտրությունների անցկացումը ձեռնտու չէ ԱԶԿ-ին: Նման պայմաններում անցկացված ընտրությունների արդյունքները կարող են նաև փոխվել»:

Անկարայում հնչած պայթյունների վերաբերյալ կարդացեք նաև՝
Սերժ Սարգսյանը ցավակցական հեռագիր է հղել Էրդողանին
Անկարայի բնակիչների համար արգելափակել է Twitter-ը և Facebook-ը
Անկարայի պայթյունից հայ երիտասարդ է վիրավորվել
Անկարայում զոհվերի թիվը հասել է 86-ի (լուսանկարներ)
Անկարայում երկու պայթյունից զոհերի թիվը հասել է 30-ի
Անկարայում ուժգին պայթյուն է գրանցվել, կան մեծ թվով զոհեր