10:48 07/09/2010 » Իրավունք

ՀԱԿ-ը Վարչական դատարանում բողոքարկում է քաղաքապետարանի որոշումը

Հայ ազգային կոնգրեսը հայց է ներկայացրել Վարչական դատարան` բողոքարկելով Երեւանի քաղաքապետարանի որոշումը` սեպտեմբերի 17-ին Ազատության հրապարակում Հայ ազգային կոնգրեսի հանրահավաքն արգելելու մասին: Այդ մասին Panorama.am-ին տեղեկացրեց ՀԱԿ-ը ներկայացնող փաստաբան Վահե Հովսեփյանը: Նիստը տեղի կունենա այսօր:

Փաստաբանի խոսքով, իրենք դատարանից պահանջում են անվավեր ճանաչել քաղաքապետարանի կայացրած որոշում, քանի որ ըստ Հովսեփյանի քաղաքապետարանը ակնհայտ ապօրինի որոշում է կայացրել: «Հնարավորություն եղել է Ազատության հրապարակում միջոցառում անցկացնել, այժմ նրանք արհեստական խոչընդոտ են ստեղծում, որ հենց Ազատության հրապարակում հանրահավաք չլինի», -նկատեց Վահե Հովսեփյանը:

Հիշեցնենք, որ ՀԱԿ-ը սեպտեմբերի 17-ին Ազատության հրապարակում հանրահավաք անցկացնելու մասին իրազեկում էր ներկայացրել քաղաքապետարան, սակայն այստեղ արգելել են հանրահավաք անցկացնել` նշելով, որ Ազատության հրապարակում նախատեսված է մեկ այլ միջոցառում կազմակերպել:

Հովսեփյանն ասաց, որ այն պահին, երբ ՀԱԿ-ի ներկայացուցիչները իրազեկել են հանրահավաքի մասին, քաղաքապետարանի միջոցառումների գրանցման մատյանում նույն օրը ոչինչ գրանցված չի եղել: «Մինչդեռ «Ժողովներ, հանրահավաքներ, երթեր և ցույցեր անցկացնելու մասին» օրենքով, առաջնությունը պետք է տրվի իրազեկված միջոցառմանը», -նկատեց փաստաբանը:
 

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց