Ձեր վստահելի աղբյուրը

Վարդան Պետրոսյանի փաստաբան Նիկոլայ Բաղդասարյանը դիմել է ոստիկանապետ Վլադիմիր Գասպարյանին` խնդրելով կարգապահական պատասխանատվության ենթարկել Կոտայքի մարզի քննչական բաժնի Նաիրիի քննչական բաժանմունքի ավագ քննիչ Հայկ Հակոբյանին: Այդ մասին Panorama.am-ին տեղեկացրեց Պետրոսյանի փաստաբան Նիկոլայ Բաղդասարյանը:

Գասպարյանին ուղղված նամակում Բաղդասարյանը ներկայացրել է հոկտեմբերի 20-ին Եղվարդ-Երևան ավտոճանապարհին տեղի ունեցած վթարի կապակցությամբ հարուցված քրեական գործի նախաքննությունը վարող Կոտայքի մարզի Նաիրիի քննչական բաժանմունքի ավագ քննիչ Հայկ Հակոբյանի կողմից թույլ տված խախտումները: Մասնավորապես, ինչպես նշեց Նիկոլայ Բաղդասարյանը, նոյեմբերի 5-ին քննիչ Հայկ Հակոբյանի կողմից որոշում է ընդունվել Վարդան Պետրոսյանին ձերբակալելու մասին, սակայն այդ օրը Վարդան Պետրոսյանը չի ձերբակալվել:

Ավելին, նոյեմբերի 6-ին ժամը 15:30-ին ավագ քննիչ Հայկ Հակոբյանը կազմել է ձերբակալման արձանագրություն, համաձայն որի. «Վարդան Պետրոսյանը (…) ձերբակալվել է: Ձերբակալված Վարդան Պետրոսյանը հանձնվել է ոստիկանության Նաիրիի բաժնի ՁՊՎ` նրան սահմանված կարգով արգելանքի տակ պահելու համար: Վարդան Պետրոսյանի ձերբակալման մասին 094-457-999 հեռախոսահամարով հայտնվել է նրա քույր` Աշխեն Պետրոսյանին»: Նույն արձանագրության համաձայն Վարդան Պետրոսյանին ձերբակալել են 06.11.2013թ. ժամը 15:00-ին»: «Իրականում ՀՀ ոստիկանության քննիչ Հայկ Հակոբյանը չի եղել Վարդան Պետրոսյանին ձերբակալելու ժամանակ: Վարդան Պետրոսյանը չի հանձնվել Նաիրիի քննչական բաժանմունք, Վարդան Պետրոսյանի քրոջ Աշխեն Պետրոսյանի հետ Հայկ Հակոբյանը ընդհանրապես չի խոսել», -հայտնեց պարոն Բաղդասարյանը:

Ներկայացնելով քննիչ Հակոբյանի կողմից թույլ տված մյուս կոպիտ խախտումը, փաստաբանն ասաց, Հակոբյանը խախտելով ՀՀ քր. դատ. օր. 63-րդ հոդվածի 2-րդ մասի 15-րդ և 16-րդ կետի պահանջը կասկածյալի հարցաքննության ժամանակ չի արձանագրել Վարդան Պետրոսանի խոսքերը և չի տրամադրել Վարդան Պետրոսյանին օրենքով իրեն հասանելի փաստաթղթերի պատճեները, որի վերաբերյալ ինքը փորձել է ներկայացնել դիտողություն և խնդրել իր դիտողությունը արտացոլել կասկածյալի հարցաքննության արձանագրության մեջ: «Սակայն քննիչ Հայկ Հակոբյանը, խախտելով ՀՀ քր. դատ. օր. 73-րդ հոդվածի 1-ին մասի 11-րդ կետի պահանջը, չի արձանագրել իմ դիտողությունն, այլ վերցնելով իմ ձեռքից գրիչը հնարավորություն չի տվել ավարտեմ նախադասությունը, թողել հեռացել է սենյակից, առանց առաջարկելու Վարդան Պետրոսյանին ստորագրելու արձանագրությունը», -փոխանցեց պարոն Բաղդասարյանը:

Նա նաև տեղեկացրեց, որ ինքը գրավոր միջնորդություն է ներկայացրել և խնդրել իրեն ծանոթացնել Վարդան Պետրոսյանի կասկածանքի բովանդակությանը, նրան վերագրվող արարքի փաստական կողմին և իրավաբանական որակմանը, Պետրոսյանի մասնակցությամբ կատարված քննչական կամ այլ դատավարական գործողությունների արձանագրություններին, բոլոր փորձաքննությունների եզրակացություններին և մասնագիտական ստուգումների արդյունքներին, տրամադրել փորձաքննություններ և մասնագիտական ստուգումներ նշանակելու մասին բոլոր որոշումների պատճեները, եթե այդպիսիք առկա են: Սակայն նույն քննիչը ստանալով փաստաբանի միջնորդությունը և Վարդան Պտրոսյանի նույնաբովանդակ պահանջը, այդ պահին նրանցից ոչ մեկին չի տրամադրել միջնորդության մեջ նշված փաստաթղթերը, սակայն հետագայում պարզվել է, որ այդ փաստաթղթերը առկա են եղել:

«Նշված փաստաթղթերից մի մասը ինձ քննիչը տրամադրել է ՀՀ ոստիկանության Նաիրիի քննչական բաժնում նույն օրը ժամը 17:30-ին, իսկ իմ պաշտպանյալին մինչ օրս որևէ փաստաթուղթ (բացառությամբ` ձերբակալելու մասին արձանագրությանը, որպես մեղադրյալ ներգրավելու մասին որոշմանն, իր իրավունքների և պարտականությունների վերաբերյալ հուշաթերթիկի) չի տրամադրել և չի ծանոթացրել փորձագետների կողմից տրված եզրակացություններին», -հավելեց փաստաբան Բաղդասարյանը:

Քննիչի կողմից տարրական մասնագիտական խախտում է կատարվել նաև Վարդան Պետրոսյանին հարցաքննության ժամանակ երբ դա կատարվել է առանց նրա փաստաբանի ներկայության: Վկայակոչելով կալանավորումը որպես խափանման միջոց կիրառելու մասին քննիչի` նոյեմբերի 9-ի որոշումը, փաստաբանն ասաց, որ քննիչ Հակոբյանը դրա մեջ նշել է. «Վարդան Պետրոսյանը … հրաժարվել է որոշումը ստանալ և որևէ ցուցմունք տալ …»: Սակայն Կոտայքի մարզի ընդհանուր իրավասության դատարանում, փաստաբանի փոխանցմամբ, քննիչ Հակոբյանի միջնորդության քննության ընթացքում ի պատասխան դատարանի հարցին, քննիչը հայտնել է, որ որևէ արձանագրություն չի կարող դատարանին ներկայացնել, որ Վարդան Պետրոսյանը որպես մեղադրյալ հարցաքննության ժամանակ հրաժարվել է ցուցմունք տալուց:

Ինչ վերաբերում է քննիչի կողմից նշված պատմությանը, թե փաստաբանը գնացել է «խաշ ուտելու», Բաղդասարյանը հերքեց և ասաց, որ դա քննիչի հորինած պատմությունն է: «Նույն օրը, նոյեմբերի 9-ին, օրը ժամը 13:00 քննիչը վերստին եկել է հիվանդանոց և արդեն իմ մասնակցությամբ առաջադրել է մեղադրանք և ծանոթացրել է իր միջնորդության հետ, սակայն Վարդան Պետրոսյանից ցուցմունք չի վերցրել, պատճառաբանելով, որ բժիշկները թույլ չեն տվել: Այդ դեպքում ինչ՞ու է նույն քննիչը իր որոշման մեջ գրում, որ Վարդան Պետրոսյանը հրաժարվել է ցուցմունք տալուց: Հավելեմ նաև, որ դատական նիստի ժամանակ Վարդան Պետրոսյանը հայտնեց, որ երբ նա գտնվելով վերակենդանացման բաժնում հայտնել է, որ նա ի վիճակի չէ ցուցմունք տալ, քննիչ Հայկ Հակոբյանը մի քանի մարդու ներկայությամբ հայտնել է, որ «դեռասանն, մեյմունություն է անում»: Քննիչ, Հայկ Հակոբյանը դատական նիստի ժամանակ չհերքեց Վարդան Պետրոսյանի այդ հայտարարությունը», -դատական նիստում կատարվածը փոխանցեց փաստաբանը:

Այս ամենից ելնելով, Նիկոլայ Բաղդասարյանը ոստիկանապետ Վլադիմիր Գասպարյանին խնդրել է ոստիկանության ծառայողի էթիկայի կանոնները խախտելու համար քննիչ Հայկ Հակոբյանին ենթարկել կարգապահական պատասխանատվության:

Վարդան Պետրոսյանի նկատմամբ մեղադրանք է առաջադրվել ՀՀ Քրեական օրենսգրքի 242-րդ հոդվածի 3-րդ մասի հատկանիշներով՝ «Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության կամ տրանսպորտային միջոցների շահագործման կանոնները խախտելը որն անզգուշությամբ առաջացրել է երկու կամ ավելի մարդու մահ»: Այս արարքը ՀՀ Քրեական օրենսգրքով պատժվում է ազատազրկմամբ` 4-ից 10-ը տարի ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը երեք տարի ժամկետով: Կոտայքի մարզի ընդհանուր իրավասության դատարանը նոյեմբերի 9-ին բավարարել էր նախաքննական մարմնի միջնորդությունը, և այժմ նա կալանքի տակ է:

Ավելի վաղ Panorama.am-ը տեղեկացրել էր, որ հոկտեմբերի 20-ին Եղվարդ-Երևան ճանապարհի 2-րդ կմ-ին «ԲՄՎ-320» և «ՎԱԶ-2121» մակնիշի մեքենաների բախումից մահվան ելքով վթար էր տեղի ունեցել: Վարդան Պետրոսյանը վարել է «ԲՄՎ-320» մակնիշի մեքենան: Վթարի հետևանքով դերասան Վ. Պետրոսյանը տեղափոխվել էր «Էրեբունի» բժշկական կենտրոն: Բացի Պետրոսյանից, վթարի հետևանքով ծանր վնասվածքներով հիվանդանոցներ էր տեղափոխվել ևս 6 մարդ: «Վազ 2121» մակնիշի մեքենայի ուղևորներից հորեղբոր որդիներ Էդգար և Էդուարդ Հակոբյանները մահացել էին: