Սահմանադրական դատարանի որոշման եզրափակիչ մասի 7-րդ կետը չի կարող գործել. Իրավաբան
«Կուտակային կենսաթոշակների մասին» օրենքի վերաբերյալ ապրիլի 2-ին Սահմանադրական դատարանի կայացրած որոշման եզրափակիչ մասի 7-րդ կետը չի կարող գործել, որովհետև ՍԴ-ն վիճարկվող նորմերը ճանաչել է ոչ միայն Սահմանադրությանը հակասող, այլ նաև անվավեր: Այդ կարծիքին է Իրավաբանական գիտությունների դոկտոր (Բեռլին) Գոռ Հովհաննիսյանը:
Նրա պնդմամբ, քանի որ ՍԴ բոլոր որոշումները Սահմանադրության պահանջով ուժի մեջ են մտնում հրապարակման պահից, ուստի կուտակային օրենքի տվյալ նորմերն արդեն անվավեր են, հետևաբար հնարավոր չէ հետաձգել իրավաբանական ուժ չունեցող նորմերի ուժը կորցնելու ժամկետը, որովհետև դրանք այդ ուժն այլևս չունեն:
«Սահմանադրական դատարանն ինքը խախտել է Սահմանադրական դատարանի մասին օրենքի 68-րդ հոդվածի 15-րդ մասի դրույթը, որտեղ օրենսդիրը բառացի ՍԴ-ին պարտադրում է հետաձգելու դեպքում ակտը ճանաչել միմիայն Սահմանադրությանը հակասող, բայց ոչ երբեք անվավեր: ՍԴ-ի այս սխալը նշանակում է, որ հետաձգված ժամկետի ընթացքում արդեն անվավեր օրենքի հիման վրա ընդունված բոլոր վարչական ու դատական ակտերը հակասահմանադրական կլինեն, որովհետև կընդունվեն գոյություն չունեցող օրենքի հիման վրա: Հետևաբար, բոլոր այդ ակտերը ենթակա կլինեն բեկանման», -Panorama.am-ին ասաց իրավաբանը:
Նկատենք, որ Սահմանադրական դատարանի որոշման եզրափակիչ մասի 7-րդ կետով սահմանվում էր ՀՀ Սահմանադրությանը հակասող ճանաչված իրավանորմերի ուժը կորցնելու վերջնաժամկետը` սեպտեմբերի 30-ը: 7-րդ կետում նշվում էր հետևյալը.
«…7. Հաշվի առնելով, որ «Կուտակային կենսաթոշակների մասին» Հայաստանի Հանրապետության օրենքը, մասնավորապես՝ սույն որոշման եզրափակիչ մասի 1-5 կետերով Հայաստանի Հանրապետության Սահմանադրությանը հակասող ճանաչված իրավադրույթները համակարգային առումով փոխկապակցված են Հայաստանի Հանրապետության շուրջ 50 օրենքներով և ութ տասնյակից ավելի այլ նորմատիվ իրավական ակտերով նախատեսված իրավակարգավորումների հետ, որոնց շատ դրույթներ սույն որոշման հիման վրա օրենքով սահմանված կարգով ենթակա են վերանայման, ինչպես նաև նկատի ունենալով օրենքի պահանջը՝ համակարգային առումով իրավական անվտանգությունը չխաթարելու վերաբերյալ, Հայաստանի Հանրապետության Սահմանադրության 102-րդ հոդվածի 3-րդ մասի և «Սահմանադրական դատարանի մասին» Հայաստանի Հանրապետության օրենքի 68-րդ հոդվածի 15-րդ մասի հիման վրա սույն որոշմամբ Հայաստանի Հանրապետության Սահմանադրությանը հակասող ճանաչված իրավանորմերի ուժը կորցնելու վերջնաժամկետ սահմանել 2014 թվականի սեպտեմբերի 30-ը՝ հնարավորություն տալով Հայաստանի Հանրապետության Ազգային ժողովին և Հայաստանի Հանրապետության կառավարությանը՝ իրենց իրավասության շրջանակներում «Կուտակային կենսաթոշակների մասին» Հայաստանի Հանրապետության օրենքի և դրա հետ համակարգային առումով փոխկապակցված այլ օրենքների ու նորմատիվ իրավական ակտերի իրավակարգավորումները համապատասխանեցնելու սույն որոշման պահանջներին։
Սույն որոշման պահանջներից բխող նոր իրավակարգավորումներից ելնելով և հաշվի առնելով Հայաստանի Հանրապետության Սահմանադրության 42-րդ հոդվածի 4-րդ մասի պահանջները` վերահաշվարկման են ենթակա մինչ այդ կատարված կուտակային վճարները»:
Նշենք, որ Սահմանադրական դատարանի որոշումը հրապարակվելուց հետո սկզբում` ԱԺ պետաիրավական հարցերի մշտական հանձնաժողովի նախագահ Դավիթ Հարությունյանը, այնուհետև` ՍԴ անդամ Ֆելիքս Թոխանն ու այսօր էլ վարչապետ Տիգրան Սարգսյանը հստակեցրել են, որ վիճահարույց «Կուտակային կենսաթոշակների մասին» ՀՀ օրենքի դրույթները կգործեն մինչև սեպտեմբերի 30-ը:
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները