Սիլվիո Բեռլուսկոնին գոհ է դատավճռից
Իտալիայի նախկին վարչապետ Սիլվիո Բեռլուսկոնին գոհունակությամբ է ընդունել այն փաստը, որ դատարանը նրան որպես պատիժ տարեցների կենտրոնում հասարակական աշխատանքի է դատապարտել: «Լենտա.ռու»-ն հղում անելով «Associated Press» լրատվական գործակալությանը հայտնում է, որ այս մասին Բեռլուսկոնին հայտարարել է լրագրողների հետ հանդիպման ժամանակ:
Բեռլուսկոնիի խոսքերով` ինքն ուրախ է նման որոշման համար, քանի որ «ողջ կյանքի ընթացքում ձգտել է օգնել մարդկանց»:
«Ես երջանիկ կլինեմ օգտակար լինել»,- հավելել է նա:
Նշենք, որ ավելի վաղ Միլանի դատարանը վճռել էր, որ Բեռլուսկոնին իր պատիժը կրելու է հարկադիր հասարակական աշխատանքների տեսքով՝ տարեցների կենտրոնում:
Բեռլուսկոնիից առգրավել են անձնագիրը, նա չի կարողանա լքել Լոմբարդիյան` մշտական բնակության իր վայրը: Որպես բացառություն նրան թույլ կտրվի երեքշաբթիից չորեքշաբթի ընկած ժամանակահատվածում մեկնել Հռոմ, բայց պայմանով, որ հինգշաբթի օրը մինչև ժամը 23.00-ը կվերադառնա Միլան:
Հիշեցնենք, նաև, որ անցած տարվա օգոստոսին Իտալիայի Վճռաբեկ դատարանը հաստատել էր Բեռլուսկոնիին 4 տարվա ազատազրկման և ղեկավար պաշտոններ զբաղեցնելու երկամյա արգելքի որոշումը:
Հարկերից խուսափելու և ստվերային հիմնադրամներ ստեղծելու համար դատապարտված Բեռլուսկոնիի պատժաժամկետը ավելի ուշ հասցվել էր 1 տարվա: