Վարդան Պետրոսյանի գործով տուժող կողմին զգուշացում կտրվի` պաշտպանին սպառնալու համար
Այսօր Կոտայքի մարզի ընդհանուր իրավասության դատարանում շարունակվող Վարդան Պետրոսյանի մասնակցությամբ գործով դատական նիստի ժամանակ Պետորսյանի պաշտպան Նիկոլայ Բաղդասարյանը հանդես եկավ միջնորդությամբ` խնդրելով դատարանին տուժող կողմից պարբերաբար ստացվող սպառնալիքների համար իր նկատմամբ պաշտպանական միջոց կիրառել ու Արթուր և Հայկ Հակոբյաններին նախազգուշացնել:
Նշենք, որ նախորդ դատական նիստն անցել էր լարված մթնոլորտում. տուժող կողմի ներկայացուցիչները սպառնալիքներ էին տեղացել Պետրոսյանի պաշտպան Նիկոլայ Բաղդասարյանի հասցեին:
Տուժող կողմի ներկայացուցիչ փաստաբան Ռուբեն Բալոյանը, ըստ էության, չառարկեց միջնորդությանը և ասաց, որ Նիկոլայ Բաղդասրայանին որևէ վտանգ չի սպառնում, և նման բնույթի միջնորդություն ներկայացնելն ուղղակի նրա աշխատաոճն է:
Դատավոր Վաղինակ Մկրտչյանը սաստեց պաշտպաններին` ասելով. «Այստեղ անձնական խնդիրներ լուծելու դաշտ չէ, դուք այստեղ եկել եք մեկդ տուժող կողմի, մյուսդ էլ ամբաստանյալին պաշտպանելու համար: Ձեր հարցերը լուծեք օրենքով սահմանված կարգով: Եթե դուք հանդիպել եք դրսում ինչ-որ հարցեր եք քննարկել,ապա դա այստեղ լուծելու հարց չէ: Փոխարենը ապացույց հետազոտենք, անցնենք դատաքննությանը, անընդհատ ձեր միջև լարվածության հարցն ենք քննարկում, լսում ձեր հայտարարությունները»:
Ինչևէ, փաստաբան Նիկոլայ Բաղդասարյանի պաշտպանության համար սահմանված միջոցներ ձեռնարկելու վերաբերյալ միջնորդությունը դատարանը որոշեց բավարարել` կիրառելով պաշտպանության միջոց զգուշացնել Արթուր և Հայկ Հակոբյաններին: Դատավոր Վաղինակ Մկրտչյանն ասաց, որ հաջորդ նիստին նրանք գրավոր կնախազգուշացվեն պաշտպանվող անձի կյանքի անվտանգության մասին ու կվերցվի համապատասխան ստորագրություն նրանցից:
Միջնորդությունը բավարարելուց հետո, դատարանն անցավ վկաների հարցաքննության փուլին:
Նկատենք, որ նախորդ դատական նիստից հետո, դատարանի դիմաց տեղի ունեցած ընդհարման ժամանակ տուժող կողմի ներկայացուցիչ փաստաբան Ռուբեն Բալոյանը, ըստ լրատվամիջոցներից մեկում հրապարակված հոդվածի, «արա»-ով է խոսել պաշտպանական կողմը ներկայացնող նրա գործընկեր Նիկոլայ Բաղդասարյանի հասցեին: Այդ տեղեկության հիման վրա Փաստաբանների պալատի նախագահ Արա Զոհրաբյանի որոշմամբ կարգապահական վարույթ է հարուցվել փաստաբան Բալոյանի նկատմամբ: Բալոյանը սակայն բազմիցս հերքել է, որ նա նման կերպ է խոսել Բաղդասարյանի հասցեին:
Նշենք, որ փաստաբանի նկատմամբ կարգապահական վարույթ հարուցելու մասին հարցը վերջնականապես կարող է լուծվել Պալատի խորհրդի համապատասխան որոշմամբ:
Լրահոս
Տեսանյութեր
Ամեն սարի գլխին, փեշին, անտառներում հայկական հետքեր են. Քաշաթաղի հուշարձանները՝ մեկ գրքում
