Վկաները պնդեցին, որ Վարդան Պետրոսյանի վրայից ալկոհոլի հոտ չեն զգացել
Վարդան Պետրոսյանի մասնակցությամբ դեռևս նախորդ տարվա հոկտեմբերին տեղի ունեցած ավտովթարի գործով դատական նիստը, որը ընթանում է Կոտայքի մարզի ընդհանուր իրավասության դատարանում, այսօր թևակոխեց վկաների հարցաքննության փուլ:
Առաջին վկան, որ հրավիրվեց դատական նիստերի դայլիճ, ազգությամբ եզդի Ղասմ Ասլանյանն էր, ով վթարից հետո իր ընկերոջ` Հայկ Վարդանյանի հետ միասին առաջին օգնությունն է ցուցաբերել տուժածներին: Նա ասաց, որ իրենք աշխատանքից տուն գնալիս տեսել են, որ «ԲՄՎ» մակնիշի ավտոմեքենան (այն վարել է Վարդան Պետրոսյանը) վարել է 30-40 կմ/ժամ արագությամբ:
«Հետո ես դուրս եկա ափգոնի, ինքն էլ ափգոն արեց, հետո կարմիր Վոլքսվագեն եկավ մի 80 արագությամբ պոկվեց, դրա հետևից ԲՄՎ-ն գնաց արագ: Էլ բան չտեսա: Եղվարդի ունիվերմագից մի քիչ վերև տեսա «ԲՄՎ»-ի միջից ծուխ ա դուրս գալիս, մոտեցա, տեսա ԲՄՎ-ն խփել ա Նիվին ու Նիվի միջից մարդիկ գոռում են` օգնեք-օգնեք: Մոտեցանք, որ օգնենք: Մեքենայի միջից սկզբում հանեցինք մի կնոջ, որին բան չէր ղել, ու ինքը անընդհատ գոռում էր, հետո հանեցինք մահացած երեխեքին: Ու հետո գնացինք ԲՄՎ-ի մոտ, տեսանք, որ վարորդը լռվել էր մեջը, ուզեցի հանեի, գոռաց` վախ-վախ ու ասեց` ես Վարդան Պետրոսյանն եմ, շա՞տ ա բան եղել, ասինք ահավոր բաներ ա եղել, ու ինքը գլուխը գցեց ներքև, ու ըտեղ ասեցինք` էս մարդն էլ ստեղ գնաց», -դատարանում պատմեց Ղասմ Ասլանյանը:
Այնուհետև, վկան ասաց, որ քիչ հետո դեպքի վայրում մեծ թվով մարդիկ են հավաքվել, կանչել են շտապօգնություն, եկել են փրկարար ծառայության աշխատակիցները:
«Փրկարարները որ էկան, նոր կարողացան Վարդան Պետրոսյանին հանել մեքենայի միջից», -հավելեց վկան:
Վկա Ասլանյանից դատարանում պաշտպանական կողմը հետաքրքրվեց, թե երբ ինքը մոտեցել է Վարդան Պետրոսյանին, զգացե՞լ է նրանից ալկոհոլի հոտ, վկան բացասական պատասխան տվեց:
«Չէ, ես ալկոհոլի հոտ չեմ առել»,- ասաց Ասլանյանը: Նույնը պնդեց նաև Ասլանյանի ընկերը` Հայկ Վարդանյանը, որը հարցաքննության հրավիրվեց նրանից հետո:
Երբ վկաներին հարց տալու հերթը հասավ Վարդան Պետրոսյանին, վերջինն ասաց, որ հարց չունի և շնորհակալություն հայտնեց իրեն ու Հակոբյաններին առաջին օգնությունը ցուցաբերելու համար:
Վկա Ասլանյանի նախաքննական և դատարանում տված ցուցմունքներում Վարդան Պետրոսյանի պաշտպան Նիկոլայ Բաղդասարյանը հակասություններ նկատեց. վկան ասաց, որ «Նիվա» մակնիշի մեքենայի աջ կողային հայելին կոտրվել է, երբ իր ընկեր Հայկը ոտքը դնելով դրա վրա, բարձրացել է մեքենայի վրա: Սակայն պաշտպան Բաղդասարյանը նկատեց, որ Ասլանյանն իր նախաքննական ցուցմունքում ասել էր, որ Նիվայի կողային հայելիները կոտրել են իրենք, մինչդեռ դատարանում վկան խոսում է միայն աջ կողային հայելու մասին ու հետաքրքրվեց` ո՞րն է ճիշտը:
«Այ ցավդ տանեմ, ես աջն եմ հիշում, ինչ անեմ», -արձագանքեց վկան:
Հարակից հրապարակում`
Վարդան Պետրոսյանի գործով տուժող կողմին զգուշացում կտրվի` պաշտպանին սպառնալու համար