Լրատվամիջոցներն ավելի շատ գրել են դատական համակարգի, քան դատախազության մասին. Հետազոտություն
Գլխավոր դատախազության գործունեության լուսաբանման հարցում լրատվամիջոցներն ավելի պասիվ նախաձեռնություն են դրսևորում, քան դատական իշխանության գործունեության կապակցությամբ: Այդ մասին այսօր հայտարարեց «Իրավունքների պաշտպանություն առանց սահմանների» հասարակական կազմակերպության նախագահ Հայկուհի Հարությունյանը` «Մեդիա կենտրոն»-ում ներկայացնելով էլեկտրոնային լրատվամիջոցներում ՀՀ դատական համակարգին վերաբերող հրապարակումների մասով իրականացրած ուսումնասիրության արդյունքները:
«Եթե դատական համակարգում գոյություն ունեցող հիմնախնդիրների վերաբերյալ լրատվամիջոցները նախաձեռնողականություն կդրսևորեն իրենց սեփական հետաքննությունն իրականացնել ու ներկայացնել, ապա դատախազության վերաբերյալ տվյալները եղել են ՄԻՊ հրապարակած զեկույցի կապակցությամբ: Ավելի քիչ են եղել դեպքեր, երբ լրատվամիջոցը փորձել է հրապարակումներով դուրս բերել այդ համակարգում գոյություն ունեցող խնդիրները», -հավելեց Հարությունյանը:
Նկատենք, որ հետազոտության թիրախում եղել են 2009-ի հունվարի 1-ից մինչև 2013-ի մայիսի 31-ը հրապարակված նյութերը և ուսումնասիրվել են շուրջ 26 էլեկտրոնային լրատվամիջոցների հրապարակումներ:
«Մեդիա կենտրոն»-ի կազմակերպած քննարկմանը ներկա ՀՀ դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանն իր հերթին նշեց, որ հետազոտությունից տպավորություն է ստացել` ոչ թե նպատակ են ունեցել հետազոտել հասարակական կարծիքը, այլ նպատակ են ունեցել հիմնավորել հասարակության բացասական կարծիքը:
Դեպարտամենտի պաշտոնյայի խոսքով, հետազոտողները զեկույցում նշում են, որ կա հասարակական անվստահություն դատական համակարգի նկատմամբ, սակայն չեն ներկայացվում հիմքերը` որտեղից նման եզրակացություն:
«Սա ուղղակի մի որոշ ժամանակահատվածի համար սղագրություն է մամուլից, որը գոնե ինձ և իմ ղեկավարած ծառայությանը ոչինչ չի տալիս» -նշեց Բաբայանը` նկատելով, որ օրինակ 2013-ից մինչ այժմ, երբ հետազոտություն չի կատարվել, դատական ատյաններում քաղաքացիները մեծ թվով գործեր են շահում:
Հարությունյանն ի պատասխան հստակեցրեց, որ իրենք ուղղակիորեն ներկայացրել են լրատվամիջոցի գնահատականը դատաիրավական համակարգի ու դատախազության գործունեության վերաբերյալ:
«Մենք հատուկ բացասական բառեր չենք փնտրել, փոփոխություն չենք կատարել լրատվամիջոցի ներկայացրած հրապարակումներում, վերցրել ու ներկայացրել ենք», -նկատեց Հարությունյանը:
Արսեն Բաբայանի արձագանքը հետևյալն էր. «Այսինքն, վերցրել եք մամուլի հրապարակած նյութը ու վերահրապարակել: Ես կարծում եմ, որ այս աշխատանքի իմաստն ընդհանրապես չկար: Մեծ հաշվով ստացվում է մամուլի տեսություն»: Բաբայանի խոսքով, ցածր իրավագիտակցության հետևանք է այս հետազոտությունը:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ