Վոլոդյա Ավետիսյանի գործով վերաքննիչ բողոքը մերժվեց

Իրավունք 16:04 16/09/2014

Վոլոդյա Ավետիսյանի գործով վերաքննիչ բողոքը մերժվեց

Վերաքննիչ քրեական դատարանը, դատավոր Կարինե Ղազարյանի նախագահությամբ, անփոփոխ է թողել ազատամարտիկ, պահեստազորի գնդապետ Վոլոդյա Ավետիսյանի գործով առաջին ատյանի դատարանի կայացրած որոշումը: Panorama.am-ի հետ զրույցում այս մասին ասաց Վ. Ավետիսյանի փաստաբան Արա Զաքարյանը:

Նշենք, որ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի հուլիսի 17-ին կայացրած դատավճռով Վ. Ավետիսյանը դատապարտվել է 6 տարվա ազատազրկման:

Իսկ թե ինչ հիմնավորմամբ է Վերաքննիչ դատարանը մերժել բողոքը, Վ. Ավետիսյանի պաշտպանն ասաց, որ այս պահին չի կարող ասել, պետք է որոշումը ստանա: Արա Զաքարյանը նշեց, որ միանշանակ դիմելու է Վճռաբեկ դատարան:

Վերքննիչ բողոքով փաստաբանը պահանջում էր բեկանել Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի` Վոլոդյա Ավետիսյանի վերաբերյալ հուլիսի 17-ին կայացրած դատավճիռը և գործն ուղարկել նույն դատարան` այլ կազմով քննության: Մերժելու դեպքում բեկանել դատավճիռը և կայացնել արդարացման դատավճիռ: Նշված խնդրանքը մերժելու դեպքում փոփոխել 17.07.2014թ. դատավճիռը, նշանակել արդարացի պատիժ և համաներման կիրառմամբ Վոլոդյա Ավետիսյանին ազատել պատժի կրումից:

Հիշեցնենք` պահեստազորի գնդապետ Վոլոդյա Ավետիսյանը մեղադրվում էր ՀՀ քրեական օրենսգրքի 178-րդ հոդվածի 2-րդ մասի 2-րդ կետով կատարած հանցանքի համար` խոշոր չափերի խարդախություն: Մեղադրական եզրակացության համաձայն, Վոլոդյա Ավետիսյանին մեղադրանք է առաջադրվել այն բանի համար, որ նա, հանդիսանալով պահեստազորի գնդապետ, «խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն չունենալով նման պայմանավորվածություն, 2013-ի հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար»: Սակայն, ըստ մեղադրանքի, Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: