«Զենքն իջեցրեց ու մի հատ անկապ շարժում եղավ». Լյուքս Ստեփանյանի սպանության գործով տուժող
ՀՀ վերաքննիչ քրեական դատարանում շարունակվեց Նոյեմբերյանի զորամասում նախորդ տարի մահացած զինծառայող Լյուքս Ստեփանյանի գործով մեղադրյալ Դավիթ Խաչատրյանի պաշտպան Երեմ Սարգսյանի կողմից ներկայացված բողոքի լսումը: Առաջին անգամ ցուցմունք տվեց տուժող Հրաչյա Սարգսյանը:
«Դավիթ Խաչատրյանը չէր ցանկանա վնասել ո՛չ ինձ, ո՛չ Լյուքս Ստեփանյանին»,- ասաց նա, ապա ներկայացրեց դեպքից մի քանի մանրամասներ.
«Մայիսի 15-ին դեպքը տեղի ունեցավ, չեմ հիշում, ես ինչ արած պետք է լինեի, որ Դավոն նման բան աներ: Դեպքից հետո ես չէի հիշում ինչ է եղել: Շատ ժամանակ անցավ, սկսեցի քայլել, աղոտ պատկերներ եմ սկսել հիշել դեպքի մասին: Նստած ենք եղել ամառանոցում, Լյուքսն էլ ինձ օգնում էր, Դավոն էլ ժամապահ էր: Մեզնից ժամ էր հարցնում, ժամ չկար, որ պատասխանեինք, Միշոն էր դուրս եկել լվացվելու, ինքն էլ ասաց, որ ժամ չունի, Լյուքսի հետ սկսեցին կատակ անել, ոչ մեկս դրան լուրջ չէինք վերաբերում, իրար հետ կատակ էինք անում, հաց էինք ուտում: Նենց էր անցնում օրը, որ մի ընտանիքից էինք մեզ զգում, թշնամական բան մեր մեջ չի եղել: Հիշեցի, որ կատակի ժամանակ Դավիթը զենքը պահեց մեր ուղղությամբ ու հիշեցի, որ ասացինք զենքը իջեցնի, իջեցրեց, կատակը շարունակվում էր, երկրորդ անգամ որ զենքը պահեց, նորից ասացինք իջեցնի, էլի իջեցրեց մի հատ անկապ շարժում եղավ, էլ չեմ հիշում, վերջին բանը, որ հիշում եմ բժշկի խոսքերն էին, որ գոռում էր, որ աչքերս չփակեմ, չքնեմ»:
Հ. Սարգսյանն ասաց, որ հետո է իմացել, որ կրակոցի հետևանքով Լյուքսը մահացե էլ, շատ ծանր է տարել. «Շատ ցավալի է, որ Լյուքսը էլ չկա, հավատս էլ չի գալիս, որ դառը իրականությունը սա է: Մեր մեջ թշնամական բան չի եղել, Դավիթի կամ Լյուքսի միջև էլ նման բան չկա: Հիշաչարություն չի եղել, մի հատ անկապ շարժում»:
Պատասխաելով հարցին, թե գտնո՞ւմ եք, որ Դավիթ Խաչատրյանն անզգուշաբար է կրակել, Հրաչյան ասաց. «Եթե Դավոյի տեղում նստած լիներ Լյուքսը, էլի չէի հավատա, որ իրենցից մեկը որևէ մեկիս ցանկանար վնաս տալ»:
Պատասխանելով դատավորի հարցին, թե ինչպե՞ս է տղայի առողջական շարժումը, ասաց, որ ձախ ձեռքով նույնիսկ մի բաժակ ջուր չի կարողանում վերցնել:
Դավիթ Խաչատրյանի պաշտպան Երեմ Սարգսյանի միջնորդություն ներկայացրեց, որ հարցաքննեն երկրորդ տուժողին, դատարանը մերժեց: Այնուհետև պաշտպանն ինքնաբացարկի միջնորդություն ներկայացրեց, որը բավարարվեց մասնակի:
Փաստաբանն իր խոսքում ասաց. «Դատարանն այս գործում ի սկզբանե ցույց տվեց, որ կանխակալ վերաբերմունք ունի: Դատարանն իր պրոֆեսիոնալիզմով պետք է բաց չթողներ այն հանգամանքը, որ տուժողն անվանեց անկապ շարժում: Այդ ի՞նչ եղավ, որ այդ ցուցմունքը հանկարծ դատարանի համար անկարևոր դարձավ: Բնականաբար, դատարանին դա չէր հետաքրքրում, քանի որ դատարանն ի սկզբանե ուներ կանխակալ մոտեցում: Հետևաբար, եթե դատարանին չեն հետաքրքրում այդ հանգամանքները, նշանակում է, որ այն արդեն որոշել է իր անելիքները: Տուժողն այստեղ ցուցմունք չտվեց, ընդամենը դիրքորոշում հայտնեց: Կարող է մեկը թևից քաշել է, դատարանին դա չէր հետաքրքրում: Ես նշում եմ, որ դատարանը շարունակում է պետական մարմինների որդեգրած քաղաքականությունը: Այս հանգամանքները հաշվի առնելով՝ գտնում եմ, որ դատարանն ակնահայտորեն կանխակալ վերաբերմունք է ցուցաբերում, ուստի դատարանին հայտնում եմ ինքնաբացարկ»:
Դատախազի կարծիքով, միջնորդությունն անհիմն է ու պետք է մերժվի: Դատարանը հեռացավ խորհրդակցական սենյակ՝ որոշելու բավարարե՞լ միջնորդությունը, թե՞ ոչ:
Հիշեցնենք, որ ըստ նախաքննության տվյալների, 2013-ի մայիսի 15-ին զորամասի 1-ին պահակախմբի մուտքի դիտորդ, նույն զորամասի ԿՍ-19 ժամկետային զինծառայող, շարքային Դավիթ Խաչատրյանը վիճաբանության մեջ էր մտել պահակախմբում ընդգրկված ԿՍ-19 ՀԴՆ-ի ժամկետային զինծառայող, շարքային Լյուքս Ստեփանյանի հետ, որի ժամանակ շարքային Դ. Խաչատրյանն իրեն ամրակցված ԱԿՄ տեսակի ինքնաձիգից կրակել է շարքային Լ. Ստեփանյանի ուղղությամբ: Արդյունքում վերջինս գլխի շրջանում ստացած հրազենային վնասվածքից տեղում մահացել էր, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել էր հրազենային վնասվածք:
Խաչատրյանի նկատմամբ հարուցվել էր քրեական գործ` ՀՀ քրեական օրենսգրքի միանգամից երկու հոդվածներով` ՀՀ քր. օր-ի 104 հոդ-ի 2-րդ մասի 6-րդ կետի հատկանիշներով՝ «սպանությունը՝ շատերի կյանքի համար վտանգավոր եղանակով» և ՀՀ Քր. Օր.-ի 112 հոդվածի 1-ին մասի հատկանիշներով` «դիտավորությամբ մեկ ուրիշին մարմնական վնասվածք պատճառելը»:
Այս տարվա հուլիսի 4-ին Տավուշի մարզի ընդհանուր իրավասության դատարանի կայացրած դատավճռով Դավիթ Խաչատրյանը դատապարտվել 17 տարի ազատազրկման:
Նախորդող հրապարակումներ՝
Հասարակական հնչեղություն ունեցող գործերով իրավական որոշում չենք տեսնում. Լ.Ստեփանյանի սպանության գործ
Լյուքս Ստեփանյանին սպանելու համար դատապարված Դ. Խաչատրյանը ուզում է միայն իր արածի համար պատժվել
Լյուքս Ստեփանյանի գործով ամբաստանյալը դատապարտվեց 17 տարի ազատազրկման
Լյուքս Ստեփանյանի սպանության գործով նախաքննության արդյունքները գոհացրել են գլխավոր դատախազին
Երբեք մի ասեք` երբե՛ք. Փաստաբան Երեմ Սարգսյանը պատասխանում է գլխավոր դատախազին
Սեյրան Օհանյա՞նն է կայացրել Լյուքս Ստեփանյանի գործով դատավճիռը. Պաշտպանական ճառ
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
