Վոլոդյա Ավետիսյանի գործով վճռաբեկ բողոք է ներկայացվել

Իրավունք 16:12 22/10/2014

Վոլոդյա Ավետիսյանի գործով վճռաբեկ բողոք է ներկայացվել

Ազատամարտիկ, պահեստազորի գնդապետ Վոլոդյա Ավետիսյանի փաստաբան Արա Զաքարյանը հոկտեմբերի 20-ին վճռաբեկ բողոք է ներկայացրել:

«Հուսով եմ, որ Վճռաբեկ դատարանը կընդունի վարույթ և թույլ տված կոպիտ խախտումները կվերացնի»,- Panorama.am-ի հետ զրույցում ասաց Արա Զաքարյանը:

Նա նշեց, որ դատական այս ատյանում էլ որևէ արդյունքի չհասնելու դեպքում կշարունակեն պայքարը:

Հիշեցնենք, որ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի հուլիսի 17-ին կայացրած դատավճռով Վ. Ավետիսյանը դատապարտվել է 6 տարվա ազատազրկման: Վճռի համաձայն նաև պետբյուջեի պետք է բռնագանձվի նա 2000 դոլարին համարժեք դրամ։ Վերաքննիչ քրեական դատարանը Վոլոդյա Ավետիսյանի գործով անփոփոխ է թողել առաջին ատյանի դատարանի կայացրած դատավճիռը:

Հիշեցնենք` պահեստազորի գնդապետ Վոլոդյա Ավետիսյանը մեղադրվում էր ՀՀ քրեական օրենսգրքի 178-րդ հոդվածի 2-րդ մասի 2-րդ կետով կատարած հանցանքի համար` խոշոր չափերի խարդախություն: Մեղադրական եզրակացության համաձայն, Վոլոդյա Ավետիսյանին մեղադրանք է առաջադրվել այն բանի համար, որ նա, հանդիսանալով պահեստազորի գնդապետ, «խարդախությամբ հափշտակություն կատարելու ուղղակի դիտավորությամբ, կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Մաթոսյանի մոտ ձևավորված վստահությունը և դիմելով խաբեության, թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը, սակայն չունենալով նման պայմանավորվածություն, 2013-ի հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար»: Սակայն, ըստ մեղադրանքի, Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: