Խաբեությամբ հափշտակել է չորս ուսանողի վարձը
Քրիստինա Նեբոգովան, ով «Ֆիզիկական կուլտուրայի հայկական պետական ինստիտուտ» ՊՈԱԿ-ի հետ կնքած վճարովի ծառայությունների մատուցման պայմանագրի հիման վրա վարել է կարճատև մերսման դասընթացներ, չորս ունկնդրի ուսման վարձը խաբեությամբ հափշտակել է: Այս մասին տեղեկանում ենք Դատական տեղեկատվական համակարգից:
Նրան մեղադրանք է առաջադրվել Քրեական օրենսգրքի 178 –րդ հոդվածի 1-ին մասի (Խարդախությունը՝ խաբեության կամ վստահությունը չարաշահելու եղանակով ուրիշի գույքի զգալի չափերով հափշտակությունը կամ ուրիշի գույքի նկատմամբ իրավունք ձեռք բերելը) և 325 –րդ հոդվաի 1-ին (Իրավունք վերապահող կամ պատասխանատվությունից ազատող վկայական կամ պաշտոնական այլ փաստաթուղթ կեղծելը՝ կեղծողի կողմից անձամբ կամ այլ անձի կողմից դրանք օգտագործելու կամ իրացնելու նպատակով կամ այդպիսի փաստաթուղթ իրացնելը կամ նույն նպատակներով կեղծ կնիքներ, դրոշմներ, ձևաթղթեր, տրանսպորտային միջոցների պետհամարանիշներ պատրաստելը կամ իրացնելը, ինչպես նաև ակնհայտ կեղծ փաստաթուղթ օգտագործելը) հատկանիշներով:
Նախաքննությամբ պարզվել է, որ Քրիստինա Նեբոգովան, «Ֆիզիկական կուլտուրայի հայկական պետական ինստիտուտ» ՊՈԱԿ-ի հետ կնքած վճարովի ծառայությունների մատուցման պայմանագրի հիման վրա վարելով կարճատև մերսման դասընթացներ, նույն դասընթացի 16-րդ խմբի ունկնդիրներ Լիլիթ Դանիելյանի, էդուարդ Դավթյանի, Արթուր Մարուքյանի և էդուարդ Զաքարյանի ուսման վարձերի՝ ընդհանուր 440.000 ՀՀ դրամ գումարը ինստիտուտի ռեկտորատի որոշմամբ զեղչելու և այդ փաստը նշված ունկնդիրներից թաքցնելու, ինչպես նաև շահադիտական նպատակով փաստաթղթերում կեղծ տեղեկություններ մտցնելու եղանակով խարդախությամբ այդ գումարին տիրանալու նպատակով, 2012 թվականի նոյեմբեր-դեկտեմբեր ամիսներին «Ֆիզիկական կուլտուրայի հայկական պետական ինստիտուտ» ՊՈԱԿ-ի իր աշխատասենյակում Լիլիթ Դանիելյանին և էդուարդ Դավթյանին հայտնել է նրանց ուսման վարձերի զեղչման հնարավորության մասին և այդ պատրվակով նրանցից վերցրել դիմումներ։
Նույն ժամանակահատվածում, առանց Արթուր Մարուքյանի և էդուարդ Զաքարյանի գիտության, իր ղեկավարած ամբիոնի աշխատակցուհի Գոհար Ղարիբյանին խնդրել է վերջիններիս անուններից նրանց ուսման վարձերի զեղչման վերաբերյալ դիմումներ լրացնել և շահադիտական նպատակով զեղչման ենթակա գումարները հափշտակելու դիտավորությամբ վերը նշված չորս ունկնդիրների վերաբերյալ կազմել է ուսման վարձերը զեղչելու իրավունք վերապահող կեղծ զեկուցագիր, որը դիմումների հետ 2012 թվականի նոյեմբերի 16-ին ներկայացրել է ինստիտուտի ռեկտորատի նիստին։
Քրիստինա Նեբոգովայի զեկուցագրի հիման վրա նույն օրը ռեկտորատի նիստի որոշմամբ Լիլիթ Դանիելյանի, էդուարդ Դավթյանի, Արթուր Մարուքյանի և էդուարդ Զաքարյանի ուսման վարձերն ամբողջությամբ զեղչվել են։ Այնուհետև հանցավոր դիտավորությունն ավարտին հասցնելու նպատակով, Քրիստինա Նեբոգովան Արթուր Մարուքյանին և էդուարդ Զաքարյանին չի հայտնել նրանց ուսման վարձի զեղչման ռեկտորատի որոշման մասին, իսկ Լիլիթ Դանիելյանին և էդուարդ Դավթյանին խաբեությամբ հայտնել է, թե ուսման վարձի զեղչման վերաբերյալ նրանց դիմումները մերժվել են, և չարաշահելով վերջիններիս վստահությունը, ուսման վարձի գումարներն անձամբ վճարելու կեղծ խոստումներով հիշյալ չորս ունկնդիրից ստացել և խաբեությամբ հափշտակել է զգալի չափերի՝ ընդհանուր 440.000 ՀՀ դրամ գումար։
Քրիստինա Նեբոգովայի նկատմամբ խափանման միջոց է ընտրվել չհեռանալու մասին ստորագրությունը: Դատավարությունը շարունակվում է: