«Եթե լինի քաղաքական կամք, Կոռուպցիայի դեմ պայքարի խորհուրդը կարող է աշխատել»
Կոռուպցիայի դեմ պայքարի խորհրդի արդյունավետությունը նրանում է, որ այն ոչ միայն այդ խորհրդից է կազմված լինելու, այլև փորձագիտական հանձնախումբ և մոնիտորինգային խումբ է ունենալու, նրա մեջ մտնելու են հասարակական կազմակերպություններ, Հանրային խորհրդից ներկայացուցիչներ, ինչպես նաև ԱԺ ընդդիմադիր խմբակցություններից: Այսօր լրագրողների հետ հանդիպմանը խոսելով ՀՀ կառավարության որոշմամբ Կոռուպցիայի դեմ պայքարի խորհուրդ ստեղծելու մասին՝ ասաց «Թրանսփերենսի ինթերնեշնլ» հակակոռուպցիոն ՀԿ-ի տնօրեն Վարուժան Հոկտանյանը:
«Փորձ է արվում ինստիտուցիոնալ հիմքեր ստեղծել կոռուպցիայի դեմ պայքարի համար, սակայն այն չի աշխատի, եթե չլինի դիսկուսիա»,-նշեց Հոկտանյանն՝ ավելացնելով, որ իրենք առայժմ ձեռնպահ կմնան և չեն մասնակցի մրցույթին:
Քննարկմանը ներկա ԱԺ պատգամավոր, «Ժառանգություն» խմբակցության անդամ Թևան Պողոսյանն էլ նշեց, որ առայժմ չի կարող ներկայացնել իրենց խմբակցության դիրքորոշումը, քանի որ իրենք հրավեր չեն ստացել, միայն հրավեր ստանալուց հետո կարձագանքեն. «Իմ անձնական կարծիքով` լավ է, որ եվրոպական մոդելի վրա է ստեղծված խորհուրդը: Նմանատիպ խորհուրդներ մենք ունեցել ենք, փորձ եղել է 2003-ից, երբ Հայաստանում ընդհանրապես հակակոռուպցիոն բառը օգտագործվեց, բայց միասնական կոորդինացումը, ինստիտուցիոնալ մոտեցումը բացակայում է: Այստեղ երկու էլեմենտ է ավելացել, բայց թե ինչպիսի կապեր են լինելու, և խորհուրդը ինչեր է անելու, դեռ պարզ չէ: Վախենում եմ, որ սա ևս կմնա թղթի վրա՝ որպես գեղեցիկ մի քայլ»:
Երևանի հակակոռուպցիոն կենտրոնի ղեկավար, Երիտասարդ իրավաբանների ասոցիացիայի վարչության անդամ Մարատ Ատոմյանն էլ ընդգծեց, որ իրենց համար մի փոքր անհասականալի է կառավարության որոշումը. «Իմաստ չկա Հայաստանում ստեղծել հակակոռուպցիոն ինստիտուտներ, որոնք, ինչպես կյանքը ցույց է տվել չեն գործում: Մենք կողմնակից ենք, որ Հայաստանում ստեղծվի անկախ մի մոդել, որը հակակոռուպցիոն պրոպագանդայով զբաղվի, ուսումնական և վերլուծական աշխատանքներ տանի»:
Ըստ Մ.Ատոմյանի` այդ անկախ մոդելը պետք է մոտավորապես օմբուդսմենի ինստիտուտի ճանապարհով ստեղծվի:
Անդրադառնալով Կոռուպցիայի դեմ պայքարի խորհրդի ղեկավարող անձնակազմին՝ Թևան Պողոսյանն ասաց. «Ցավոք սրտի, մենք ամեն ինչ տանում ենք անձերի վրա: Այստեղ պետք է լինի պաշտոնների խնդիր, ոչ թե անձերի, միշտ վարչապետը նույն մարդը չի լինում: Պետք է գաղափարին նայենք, ոչ թե անուններին»:
Հարցին, թե կառավարությունն այս խորհրդով ինչ խնդիր է լուծում, Թ.Պողոսյանը պատասխանեց. « Աշխատատեղերի հարց, իմիտացիա, ամեն ինչի լավ համախմբավծություն»:
Ամփոփելով խոսքը՝ «Թրանսփերենսի ինթերնեշնլ» հակակոռուպցիոն ՀԿ-ի տնօրենն ասաց. «Եթե լինի քաղաքական կամք, խորհուրդը կարող է աշխատել, սակայն ես այժմ այն չեմ տեսնում»: