Սյունիքում նման դեպքեր հաճախ են լինելու. Ալումյանը՝ Գորիսում ծեծկռտուքի մասին (տեսանյութ)
Գորիսի Սդղի գյոլ կոչվող տարածքում Սյունիքի մարզպետ Սուրիկ Խաչատրյանի որդու՝ Տիգրան Խաչատրյանի մասնակցությամբ տեղի ունեցած ծեծկռտուքը, որի հետևանքով տուժել են Զաքարյան եղբայրները, կնախատեսելի էր: Այսօր այդ մասին լրագրողների հետ հանդիպման ժամանակ հայտարարեց Փաստաբանների պալատի անդամ Հայկ Ալումյանը՝ շեշտելով, որ ինքն այս հայտարարությունն անում է ոչ որպես Բուդաղյանների փաստաբան:
«Կանխատեսելի էր ոչ թե այն առումով, որ ծեծին մասնակցել է Տիգրան Խաչատրյանը, կանխատեսելի էր, որովհետև անպատժելիության մթնոլորտը ստեղծում է պարարտ հող նման դեպքերի համար: Իսկ էն որ 2013-ի հունիսի մեկից որոշ մարդկանց նկատմամբ անպատժելիության կանխավարկած է գործում, բոլորս տեսնում ենք: Անմեղության կանխավարկածը ցավոք, փոխարինվել է անպատժելիության կանխավարկածով այս մարդկանց նկատմամբ, որի հետևանքները մենք դեռ երկար կզգանք: Վատ կանխատեսումներ ունեմ, որ մենք հաճախ ենք տեսնելու նման դեպքեր Սյունիքում, եթե մարդիկ չտեսնեն, որ արդարադատություն, իրականում կա»,-հայտարարեց փաստաբանը:
Ավելի վաղ Panorama.am-ը տեղեկացրել էր, որ Գորիսում Սուրիկ Խաչատրյանի որդու՝ Տիգրան Խաչատրյանի մասնակցությամբ ծեծկռտուք էր տեղի ունեցել, ինչի հետևանքով տարբեր վնասվածքներ էին ստացել Հարություն և Մուշեղ Զաքարյանները: Վերջինները նախաքննության շրջանակներում ճանաչվել են տուժողներ: Մուշեղ Զաքարյանի մոտ ախտորոշվել էին քթի միջնապատի և քթոսկրի կոտրվածքներ, իսկ Հարություն Զաքարյանի մոտ՝ ախտորոշվել էր «աջ աչքի վնասվածք, կոպի պատռվածք»: Դեպքը տեղի է ունեցել մայիսի 2-ին, կա հարուցված քրեական գործ, բայց մինչ այժմ որևէ մեկին մեղադրանք չի առաջադրվել: