Դատախազության օրվա միջոցառմանը առաջին անգամ ՀՀ նախկին գլխավոր դատախազներ են մասնակցել
ՀՀ գլխավոր դատախազության նիստերի դահլիճում այսօր տեղի է ունեցել հանդիսավոր նիստ՝ նվիրված դատախազության աշխատողի օրվան և դատախազության 97-րդ տարեդարձին: Դատախազության աշխատողի օրվա առթիվ ՀՀ Նախագահի ուղերձը ընթերցել է ՀՀ Նախագահի աշխատակազմի ղեկավար Վիգեն Սարգսյանը:
Գլխավոր դատախազության լրատվական ծառայությունից տեղեկացնում են, որ շնորհավորելով մասնագիտական տոնի առթիվ՝ ՀՀ գլխավոր դատախազ Գևորգ Կոստանյանը մաղթել է, որ յուրաքանչյուր տարի այս օրը նշելիս դատախազական համակարգի յուրաքանչյուր աշխատող իր մեջ հպարտանալու առիթ ունենա՝ թե՛ իր կատարած աշխատանքի, թե՛ իր գործընկերոջ կատարած աշխատանքի համար:
ՀՀ գլխավոր դատախազը ընդգծել է, որ յուրաքանչյուր դատախազի պատասխանատու, ազնիվ և արդյունավետ աշխատանքը մեխանիկորեն հանգեցնում է ամբողջ համակարգի գործունեության արդյունավետությանը:
ՀՀ դատախազության աշխատողի օրվա կապակցությամբ դատախազության համակարգում ներդրված ավանդի համար ՀՀ գլխավոր դատախազի հրամանով հատուկ հուշանվերներով են պարգևատրվել ՀՀ նախկին գլխավոր դատախազներ Արտավազդ Գևորգյանը, Սուրեն Օսիպյանը, Բորիս Նազարյանը, Արամ Թամազյանը և Աղվան Հովսեփյանը: Ի դեպ, ըստ աղբյուրի, առաջին անգամ դատախազության աշխատակցի օրվա պաշտոնական միջոցառմանը ներկա են ՀՀ նախկին գլխավոր դատախազները:
Մասնագիտական օրվա առթիվ ՀՀ գլխավոր դատախազի և պետական մյուս կառույցների ղեկավարների կողմից պարգևների, շնորհակալագրերի, հուշանվերների արժանացել են ՀՀ դատախազության մի շարք աշխատակիցներ: ՀՀ գլխավոր դատախազի հրամանով շնորհվել են նաև արտահերթ դասային աստիճաններ, մեդալներ և կրծքանշաններ:
Ըստ աղբյուրի, նիստին մասնակցել են ՀՀ նախագահի աշխատակազմի ղեկավար Վ. Սարգսյանը, ՀՀ ԱԺ նախագահ Գ. Սահակյանը, ՀՀ վարչապետ Հ. Աբրահամյանը, ՀՀ Կառավարությանն առընթեր ԱԱԾ տնօրեն Գ. Հակոբյանը, Ոստիկանության պետ Վ. Գասպարյանը, ՏԿ և ԱԻ նախարար Ա. Երիցյանը, ՀՀ ՊՆ Ս. Օհանյանը, ՀՔԾ պետ Վ. Շահինյանը, ՀՀ քննչական կոմիտեի նախագահ Ա. Հովսեփյանը, ԼՂՀ գլխավոր դատախազ Արթուր Մոսիյանը: