Պերմյակովի գործով Փոստանջյանը կասկածներ ունի
«Եթե ցանկություն կար լուծում տալ այս հարցին, ապա Պերմյակովը այս պահի դրությամբ պետք է լիներ Հայաստանի Հանրապետության քրեակատարողական հիմնարկում»,-այսօր լրագրողների հետ հանդիպման ժամանակ հայտարարեց ԱԺ «Ժառանգություն» խմբակցության անդամ Զարուհի Փոստանջյանը:
Նրա պնդմամբ, Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովի գործը Հայաստանին հանձնելը «հասարակությանը մոլորեցնելու քայլ է»:
«Պահանջը մինչ այսօր էլ պարզ չէ, թե ի՞նչն են հանձնելու, գործի ո՞ր մասն են հանձնում: Սա հանրության տրամադրությունները ամբողջ գործընթացից շեղելու համար է»,- նկատեց Փոստանջյանը:
Պատգամավորը, որ նախկինում փաստաբան է եղել, նշեց, որ «անհիմն հայտարարություն են արել», քանի որ առանց մեղադրյալի արդար դատավարություն հնարավոր չէ իրականացնել:
«Եթե Պերմյակովը գտնվում է ռուսական 102-րդ ռազմաբազայում, պետք է գնան, նրան ձերբակալեն և հանձնեն ՀՀ իրավապահ մարմիններին: Ուղղակի հայտարարել, որ գործին լուծում է տրվելու, դա խաբեբայություն է»,- հավելեց իրավաբան պատգամավորը:
Ավելի վաղ Գլխավոր դատախազությունը հաղորդագրություն էր տարածել` տեղեկացնելով, որ կայացվել է իրավական որոշում՝ ՌԴ քննչական մարմնի վարույթում քննվող Պերմյակովի քրեական գործը՝ սպանության մասով, ՀՀ իրավապահներին փոխանցելու վերաբերյալ: Ընթացակարգային հարցերի կարգավորումից հետո գործը կփոխանցվի ՀՀ քննչական կոմիտեի վարույթ:
«Հստակ ժամկետներ այս պահին նշել հնարավոր չէ: Սակայն հստակ է, որ սպանության գործը քննելու են ՀՀ իրավապահները, արդարադատությունն իրականացնելու են ՀՀ դատարանները, մեղադրանքը պաշտպանելու է գործով հսկողություն իրականացնող դատախազը, դատավճիռը կայացվելու է Հայաստանի Հանրապետության անունից», -նշված էր դատախազության հաղորդագրության մեջ:
Նախորդող հրապարակում`
Ավետիսյանների ողբերգական սպանության գործով դատավճիռը կկայացվի Հայաստանի Հանրապետության անունից. Գլխավոր դատախազություն