Ձեր վստահելի աղբյուրը

Գորիսում Սդղի գյոլ կոչվող տարածքում մայիսի 2-ին տեղի ունեցած միջադեպի գործով հերթական մեղադրյալը ազատ է արձակվել կալանքից. դատարանը բավարարել է գործով մեղադրյալ Դերենիկ Հակոբյանին գրավով ազատ արձակելու միջնորդությունը: Այդ մասին Panorama.am-ին տեղեկացրեց Հակոբյանի փաստաբան Արմեն Մելքոնյանը:

Վերջինը, հիշեցնենք, նաև Սյունիքի մարզպետ Սուրիկ Խաչատրյանի, որդու, այս գործով մեղադրյալ Տիգրան Խաչատրյանի պաշտպանն էր: Դատախազի որոշմամբ Տիգրան Խաչատրյանի նկատմամբ քրեական հետապնդումը դադարեցվել էր, իսկ նրա մասով քրեական գործը կարճվել: Դերենիկ Հակոբյանը Սուրիկ Խաչատրյանի վարորդի որդին է:

Բացի Հակոբյանից, Մելքոնյանը ստանձնել է նաև մյուս մեղադրյալների` Սյունիքի մարզպետի եղբոր` Սեյրան (Աղալար մականունով) Խաչատրյանի, մարզպետի եղբոր որդիների` Մայիս Խաչատրյանի ու Էյներ Խաչատրյանի պաշտպանությունը:
Փաստաբանը դժգոհ է նրանց մասով քրեական գործի նախաքննությունից:

«Օբյեկտիվ գնահատականներ տրված չեն մարդկանց արարքներին, հստակեցված չէ, թե կոնկրետ ում հարվածից է Մուշեղի քթի վնասվածքն առաջացել: Այն, ինչ շարադրել է վարույթն իրականացնող մարմինը որպես մեղադրյալ ներգրավելու որոշման մեջ, մեղմ ասած ծիծաղ է առաջացնում. 6 հոգու մի քթի կոտրվածքի համար մեղադրանք են առաջադրել, բայց նրանցից մեկն է քթի կոտրվածք առաջացրել», -ներկայացրեց փաստաբան Մելքոնյանը:

Նրա խոսքերով, մարդկանց արարքը պետք է հիմնավորվի և դրանց տրվի ճիշտ գնահատական, ինչը նախաքննական մարմինը` Քննչական կոմիտեն, չի կատարել:

«Ես կողմ եմ, որ ամեն ոք իր կատարածի համար պատասխան տա: Փառք Աստծո, նախաքննական մարմնով չի սահմանափակվում այս ամենը, դեռ կան դատարաններ, և մեր կռիվը դեռ շարունակվելու է», -հավելեց Մելքոնյանը:

Նա զայրացնող է համարում, որ գնահատականներ չեն տրվում Մուշեղ ու Հարություն Զաքարյան եղբայրների գործողություններին:

«Ոչ մեկ չի ասում, թե Զաքարյաններն իրավունք ունեի՞ն Դերենիկ Հակոբյանի ունքը պատռելու, իրավունք ունեի՞ն Յուրային, Շահումին մարմնական վնասվածքներ պատճառելու: Այսքան ժամանակ է նախաքննություն է իրականացվում, և այս արարքներին որևէ իրավական գնահատական չի տրվել: Ոչ մեկ չի խոսում, թե ինչից է կռիվը սկսել, իսկ կռիվը սկսել է այն բանից, որ գործով կալանավորված Յուրա Մանուչարյանը հանդգնել է Զաքարյանների մոտ մեքենայի ձայնային ազդանշան տալ: Դրա համար մարդկանց ծեծի են ենթարկել», -հայտարարեց Մելքոնյանը:

Հարցին, թե Տիգրան Խաչատրյանի նկատմամբ քրեական հետապնդումը դադարեցվեց իր պաշտպանական գործունեության շնորհի՞վ, թե Սուրիկ Խաչատրյանի գործոնը մեծ էր այդ հարցում, փաստաբանը պատասխանեց. «Եթե Սուրիկ Խաչատրյանի գործոնը աշխատեր, նա կթողնե՞ր, որ իր 20 տարեկան տղան երկու ամիս կալանավորված մնա, ո՞ր հերը կհամաձայներ հատկապես որ գիտեր, որ իր որդին ոչ մի վնաս չի հասցրել: Ի՞նչ Սուրիկ Խաչատրյանի գործոն»:

Ավելին, փաստաբանի խոսքով, հակառակը, ինքը տեսել է թշնամանք, «հակառակ գործողություններ» բոլոր Խաչատրյան մեղադրյալների նկատմամբ:

«Տիգրան Խաչատրյանը կալանավորվեց նրա համար, որ ինքը Սուրիկ Խաչատրյանի որդին է, ուրիշ ոչ մի բանի համար: Եթե նա լիներ ոչ հայտնի մարդու որդի, նրան չէին կալանավորի, մեղադրանք չէին առաջադրի», -հավելեց Մելքոնյանը:

Նա չբացառեց, որ առաջիկայում այլ մեղադրյալներ ևս ազատ արձակվեն:

Թեմային առնչվող հրապարակումներ`
Սուրիկ Խաչատրյանի որդու նկատմամբ քրեական հետապնդումը ենթակա է դադարեցման. Գլխավոր դատախազություն
Գորիսի ծեծկռտուքի գործով ձերբակալվածներից մեկը Սուրիկ Խաչատրյանի վարորդի որդին է
Գորիսի ծեծկռտուքի գործով 2 անձ ձերբակալվել է
Մուշեղ Զաքարյանի նկատմամբ կիրառված բռնությունների գործով մեղադրանք է առաջադրվել 5-րդ անձին