«Ոսկե ծիրան». Մեկ շաբաթ կինոյի հետ, մեկ շաբաթ կինոյի «աշխարհում»

11:25 07/07/2012 » Մշակույթ

«Ոսկե ծիրան». Մեկ շաբաթ կինոյի հետ, մեկ շաբաթ կինոյի «աշխարհում»

Ամառային այս օրերին Երևան են շտապում կինոաշխարհի մի շարք ներկայացուցիչներ` մասնակցելու «Ոսկե ծիրան» կինոփառատոնին, որն արդեն 9-րդ անգամ է անցկացվելու: Այն մեկնարկելու է վաղը ու մեկ շաբաթ շարունակ հայ հասարակությունը կարող է դիտել 170 լիամետրաժ, կարճամետրաժ խաղարկային և վավերագրական ֆիլմեր: Այդ ֆիլմերից 65-ն ընդգրկված են մրցութային ծրագրում` խաղարկային, վավերագրական, «Կորիզ» (կարճամետրաժ ֆիլմեր) և «Հայկական համայնապատկեր» բաժիններում:

Խաղարկային մրցույթում ներկայացված է 12 ֆիլմ: Խաղարկային ֆիլմերի միջազգային ծրագրի ժյուրիի կազմը կղեկավարի աշխարհահռչակ կինոռեժիսոր, Կաննի փառատոնի մրցանակակիր և 2011 թ. Ժյուրիի անդամ Վիկտոր Էրիսեն:
Վավերագրական մրցույթում ևս ներկայացված է 12 ֆիլմ: Վավերագրական ֆիլմերի մրցույթի ժյուրիի կազմը կղեկավարի ռուս

«Հայկական համայնապատկեր» մրցույթը, որ ներկայացնում է հայազգի ռեժիսորների ֆիլմերը, ներկայացնում է 6 լիամետրաժ խաղարկային, 5 կարճամետրաժ խաղարկային, 15 վավերագրական ֆիլմ: «Հայկական համայնապատկեր» ծրագրի ժյուրիի անդամներն են Լի Սանգ Յոնգը (փառատոնային ղեկավար. Հարավային Կորեա), չեխ կինոքննադատ Էմիլիա Հավիրովան, շվեյցարիացի պրոդյուսեր Ադելինա ֆոն Ֆուրցենբերգը, ռուսաստանից փառատոնի տնօրեն Սիտորա Ալիևան, կինոռեժիսոր Վալերի Բալայանը, ԱՄՆ-ից գրող Վիկեն Բերբերյանը:

«Կորիզ» կարճամետրաժ ֆիլմերի մրցույթում ներկայացված է 39 ֆիլմ: «Կորիզ» մրցութային ծրագրի ժյուրիի անդամներ են` Ալյոնա Շումակովա (Իտալիա), Ալեքսեյ Մեդվեդև (Ռուսաստան), Տորուն Նյեն (Նորվեգիա):
Բացի մրցութային ծրագրից, երևանյան կինոփառոտնի ընթացքում, ինչպես միշտ, լինելու են նաև արտամրցութային ծրագրեր` «Երևանյան պրեմիերաներ», «Հետահայաց ցուցադրություններ» և «Հարգանքի տուրք»: «Հարգանքի տուրք» ծրագրի շրջանակներում նախատեսվում են «Յուրի Երզնկյան 90», «Ֆրունզե Դովլաթյան 85», «Անդրեյ Տարկովսկի 80» հոբելյանական երեկոները: «Երևանյան պրեմիերաներ» ծրագրի շրջանակներում կներկայացվեն մի շարք հեղինակավոր ֆիլմերի պրեմիերաներ: «Ռեժիսորներ առանց սահմանի» ծրագիրը կներկայացնի արվեստում սահմանների չեզոքացմանն ուղղված բազմաթիվ ֆիլմեր: «Հետահայաց ցուցադրություններ» ծրագրում նախատեսված են Էլդար Շենգելայայի, Ագնեշկա Հոլանդի, Անդրեյ Տարկովսկու, Ալեքսանդր Սոկուրովի ֆիլմերի ցուցադրությունները:

«Գիրք և կինո» ծրագրի շրջանակներում կներկայացվեն հայ և արտերկրի դասական ու ժամանակակաից գրողների ստեղծագործությունների էկրանավորումները. «Շորն ու Շորշորը», «Նամուս», «Պեպո» (Համո Բեկնազարյան), «Խաթաբալա» (Յուրի Երզնկյան), «Տերն ու ծառան» Դմիտրի Կեսայանց), «Տժվժիկ» (Արման Երիցյան), «Հնձան» (Բագրատ Հովհաննիսյան), «Ֆաուստ» (Անդրեյ Սակուրով), «Մոլեգին հողմերի դարավանդը» (Անդրեա Առնոլդ), «Օլիվեր» (Մերոլ Ռիդ), «Մահը Վենետիկում» (Լուկինո Վիսկոնտի), «Թիթեղյա թմբուկը»( Ֆոլքեր Շլյոնդորֆ) :

Երևանի Սբ. Զորավոր եկեղեցում` ի հիշատակ Միքելանջելո Անտոնիոնիի, Տոնինո Գուեռայի, Թեոդորոս Անգելոպուլոսի մատուցվելու է պատարագ, նրանց նվիրված անցկացվելու է նաև հուշ երեկո: «Ոսկե ծիրան» Երևանի 9-րդ միջազգային կինոփառատոնի շրջանակներում պատմության մեջ առաջին անգամ կհանձնվի հատուկ մրցանակ հոգևոր, մշակութային և մարդասիրական արժեքների քարոզչության և համաշխարհային կինոարվեստում բերած նշանակալի ավանդի համար: Հայ առաքելական եկեղեցու սահմանած «Եղիցի լույս» մրցանակն այս տարի կշնորհվի հռչակավոր ռուս կինոռեժիսոր Ալեքսանդր Սոկուրովին:

«Ոսկե ծիրան» կինափառատոնի ընթացքում անցկացվելու են նաև վարպետության դասեր (Մարինա Ռազբեշկինա, Վիկտոր Էրիսե, Ռոլանդ Ղազարյան, Միքայել Օբստրուպ, Վադիմ Աբդրաշիտով): Փառատոնի ընթացքում նախատեսված են համերգներ, բացօթյա ցուցադրություններ:

Այնպես որ, առաջիկա մեկ շաբաթվա ընթացքում կինոարվեստը լինելու է Հայաստանի մշակութային կյանքի կենտրոնում, ու արդեն միջազգային ճանաչում ունեցող մեր կինոփառատոնը, Հայաստան բերելով կինոարվեստի հայտնի դեմքերի, հանրահայտ ֆիլմեր, հնարավորություն է ընձեռում մեզ էլ անմասն չմնալ ու հետ չընկնել ընդհանուր ընթացքից:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց